Atyraý oblysynyń ákimi Túrkııa bas konsýlymen túrikshe sóılesti

ATYRAÝ. 25 mamyr. Atyraý oblysynyń ákimi Nurlan Noǵaev Túrkııanyń Aqtaý qalasyndaǵy bas konsýly Korhan Kengıýrıýdy qabyldady. Kezdesý barysynda ákim qonaqpen túrik tilinde áńgimelesti. Bul týraly egemen.kz tilshisi habarlady. Kezdesýde Atyraý oblysy men Túrkııa Respýblıkasy arasyndaǵy qarym-qatynastyń damýy men odan ári órbýi sóz boldy. Oblys ákimi Nurlan Noǵaev Qazaqstan táýelsizdik alǵan jyldan beri eki eldiń saýda-ekonomıkalyq salasynda iskerlik qarym-qatynastyń ornaǵanyna, osy oraıda, Atyraý oblysy sheteldik ınvestorlar úshin qolaıly aımaqqa aınalǵanyna toqtaldy. Aımaqtyń ınvestısııalyq tartymdylyǵynyń belgisi retinde jalpy aýdany 3,5 gektar bolatyn «Ulttyq ındýstrııalyq munaı-hımııalyq tehnoparkin» aıtýǵa bolady. Bul nysannyń maqsaty – ınfraqurylymdyq nysandardy salý, iske qosý, hımııalyq, munaı-hımııalyq jáne aralas óndiristerdi damytý. Qazirgi tańda arnaıy ekonomıkalyq aımaqta 14 qatysýshy tirkelgen. Bıylǵy jyldyń birinshi toqsanynda óńirdiń syrtqy saýda aınalymy 68,9 mıllıon dollardy qurasa, eksport kólemi 6,4 mıllıon dollarǵa teń bolǵan. Statıstıka departamentiniń málimetinshe, Atyraý oblysynda túrkııalyq kapıtaldyń úlesi bar 21 kompanııa tirkelgen. Kezdesý kezinde bas konsýldyń aýdarmashysy ákimniń qazaqsha sózin túrik tiline aýdarsa, qonaqtyń sózin túrik tilinen orys tiline aýdaryp otyrdy. Osy kezde oblys ákimi  Nurlan Noǵaev bas konsýlmen túrik tilinde sóılese bastady. «Men biletin túrikterdiń bári qazaqtar sóılegende baıyrǵy túrik tilin estigendeı bolasyń deıtin. Sebebi, qazaq tili ejelgi túrik tiline óte uqsas» – dedi Nurlan Noǵaev. Ákimniń osy sózinen keıin sheteldik meımannyń sózin orysshaǵa aýdaryp otyrǵan tilmásh memlekettik tilde túsindire jóneldi. «О́te durys aıtasyz. Qazaq tili rasymen ejelgi túrik tiline uqsaıdy, – dedi bas konsýl Korhan Kengıýrıý – Qazaqstannyń batysy biz úshin Qazaqstannyń qaqpasy bolyp esepteledi. Qazaq jeri túrik halqy úshin qasıetti jer sanalady. Biz eki baýyrlas el arasyndaǵy qarym-qatynasty nyǵaıtýǵa múddelimiz». Joldasbek Shópeǵul. Derek: egemen.kz. Foto: Rahym Qoılybaev.