Hromtaý kásiporyndar arasynda spartakıada ótkizdi

AQTО́BE. 25 mamyr.  Hromtaý qalasynda elimiz Táýelsizdiginiń 25 jyldyǵyna arnalǵan Eýrazııalyq topqa kiretin (ERG) «Qazhrom»TUK» AQ  XIII sporttyq oıyndary ótti. Bul týraly egemen.kz tilshisi habarlady. Úsh kún aralyǵynda kompanııanyń barlyq fılıaldary, otandyq taý-ken kesheniniń iri kásiporyndary – Dóń taý-ken baıytý kombınaty, «Kazmarganes» ken basqarmasy, Aqtóbe jáne Aqsý ferroqorytpa zaýyttarynyń shamamen 300 úzdik sportshysy jarystyń voleıbol, shaǵyn fýtbol, ústel tennısi, shahmat, kir sporty, basketbol, gorodkı jáne darts túrlerinen ózara synǵa tústi. Osy úsh kúnde Dóń taý-ken baıytý kombınatynyń dene shynyqtyrý-saýyqtyrý kesheniniń sporttyq alańy kásiporyn jumysshylarynyń ǵana emes, qala turǵyndarynyń da nazaryn aýdardy, olar óz komandalarynyń shashbaýyn kóterip, jankúıer boldy. Spartakıadanyń sharty boıynsha sporttyń eki túrinen – gorodkı jáne dartstan ótken syndarǵa  mindetti túrde kásiporyn basshylary jáne kásipodaq jetekshileri qatysty. «Osyndaı aýqymdy spartakıadanyń bizdiń Hromtaý qalasynda ótkizilip jatqany óte súısinerlik. Jáne bul óz nátıjesin beredi. Mysalǵa, Aqsý ferroqortypa zaýytynyń «Metallýrg» sport úıiniń tárbıelenýshileri Qazaqstanda jáne odan tysqary jerlerde ótkizilgen jarystarda bıik tuǵyrdan kórinip júr. Dóń taý-ken baıytý kombınatynyń voleıbol komandasy sýperlıgada oınaıdy, Aqtóbe ferroqorytpa zaýytynyń jas gandbolshylary  birneshe ret álem chempıony ataǵyn ıelendi. «Qazhrom» spartakıadasy – bizdiń ujymnyń  birigýine kómektesetin ıgi dástúrlerdiń biri, dedi «Qazhrom» TUK» AQ prezıdenti Vıktor Tıl. Spartakıada qorytyndysy boıynsha eki jyl qatarynan Aqtóbe ferroqorytpa zaýytynyń jumysshylary birinshi oryndy jeńip aldy. Ekinshi oryndy Dóń taý ken baıytý kombınatynyń sportshylary, úshinshi oryndy Aqsý ferroqorytpa zaýytynyń komandasy ıelendi. Barlyq jeńimpazdar jáne júldegerler medaldarmen, kýboktarmen, dıplomdarmen jáne aqshalaı syılyqtarmen marapattaldy. Biraq «Qazhrom» jumysshylary úshin bıylǵy sporttyq jarystar osymen aıaqtalmaıdy. Tamyz aıynda kompanııa quramasy Aqsý ferroqorytpa zaýyty bazasynda ótkiziletin Eýrazııalyq toptyń alǵashqy spartakıadasyna qatysady. Satybaldy Sáýirbaı. Derek, foto: egemen.kz