Shymkent farmasevtıka zaýyty

ónimderi Eýroodaq standartymen shyǵarylady Polsha kásipkerlerimen birles­ken «Hımfarm» zaýyty búginde Qazaq­stannyń farmasevtıka salasyndaǵy kóshbasshysyna aınalǵan. Dári-dármektiń 200-den asa túrin shyǵarýǵa maman­danǵan, elimizdegi tegin medısı­nalyq kómek kórsetýge qajetti dári­lerdiń úshten birin shyǵaryp otyrǵan kásiporyn jaqynda antıbıotık untaqtaryn aseptıkalyq jolmen bólip shyǵarý sehyn iske qosty. Jańa joba «SANTO» kompanııa­synyń jańa jetistigi ǵana emes, álemdik naryqtaǵy Qazaqstan úlesiniń alǵan qomaqty ornyn da kórsetedi. Konveıerden alǵashqy bolyp shyqqan sefalosporın antıbıotıginiń ózinen 14 túrli dári jasalady eken. Negizinde, bul antıbıotıkter buryn da shyǵarylyp kelgen. Biraq GMP standartynyń talaby boıynsha bólek jeli bolýy kerek. Zaýyt tamyz aıynda taǵy bir jelini iske qospaqshy. Sonda jylyna 40 mln. quty antıbıotık shyǵarylady. «Hımfarm» AQ bas dırektory Ijı Ýrbanes jańa óndiristiń far­masevtıkalyq saladaǵy ınnovasııalyq damýdyń jaqsy kórsetkishi ekendigin aıtady. Búginde elimiz boıynsha myńdaǵan adamdarǵa jumys taýyp berip otyrǵan zaýyt Qazaqstandaǵy farmasevtıka naryǵynda kóshbasshy ekendigin osyndaı isimen taǵy dáleldep otyr. Buǵan deıin ónimin Qyrǵyzstan, Tájikstan, Túrikmenstan jáne Moń­ǵolııa memleketterine eksportqa shyǵaryp kelgen zaýyt endi onyń kólemin eselemek. «Kórshi elder arasynda bizdiń ónimderimizge asa qyzyǵýshylyq tanytyp otyrǵan memleket, ol – Reseı. Eýroodaq standartymen shyǵarylyp jatqan «SANTO» kompanııasynyń dári-dármekterin eksporttaýdaǵy negizgi áriptesimiz osy memleket bolady», – deıdi zaýyttyń bas dırektory. Baqtııar TAIJAN, «Egemen Qazaqstan» Ońtústik Qazaqstan oblysy