Elbasy Nursultan Nazarbaev «Astana» halyqaralyq qarjy ortalyǵyn basqarý jónindegi keńestiń múshelerimen kezdesti, dep habarlady Prezıdenttiń baspasóz qyzmeti.
Keńes músheleri qatarynda EQDB prezıdenti S.Chakrabartı, JP Morgan Chase International Dırektorlar keńesiniń tóraǵasy D.Frenkel, The Blackstone Group tóraǵasy ári negizin qalaýshylardyń biri S.Shvarsman, Reseı Sberbankiniń prezıdenti ári basqarma tóraǵasy G.Gref sııaqty bedeldi qarjy ınstıtýttarynyń basshylary bar.
Kezdesý barysynda Qazaqstandaǵy qarjy qyzmetiniń jetekshi halyqaralyq ortalyǵy retindegi Astana halyqaralyq qarjy ortalyǵynyń aldaǵy jumysynyń máseleleri álemdik úzdik tájirıbeler negizinde talqylandy.
Qazaqstan Prezıdenti Ortalyqty qurý isi elimizdiń ekonomıkasyn ártaraptandyrýǵa jáne onyń qazirgi jaǵdaıdaǵy ornyqtylyǵyn qamtamasyz etýge baǵyttalǵan qurylymdyq reformalar aıasynda júzege asyrylyp jatqanyn atap ótti.
– Jobany zańnamalyq turǵydan qamtamasyz etý maqsatymen konstıtýsııalyq zań qabyldandy, ınvestorlardyń jumysy úshin teńdessiz jaǵdaılar jasaldy. Derbes pishim boıynsha qyzmet etetin jáne aǵylshyn quqyǵy qaǵıdattaryn qoldanýǵa, sheteldik sýdıalardy qatystyrýǵa negizdelgen arnaýly júıe jumys isteıtin bolady, – dedi Memleket basshysy.
Nursultan Nazarbaev Astana halyqaralyq qarjy ortalyǵy búkil óńir úshin jumys istep, ýaqyt óte kele tanymaldyqqa ıe bolady dep úmittenetinin jetkizdi.
– Biz bul jobanyń aýqymdy ári kúrdeli is ekenin túsinemiz. Búkil óńirimizdiń qyzyǵýshylyǵyn oıata bilý, AHQO-ny «Jibek jolynyń ekonomıkalyq beldeýi» aıasynda qarjylyq qyzmet kórsetý ortalyǵyna aınaldyrý mańyzdy. Bul taraptaǵy bos oryndy ıemdenip, birtindep damı bastaý qajet. Biz Qazaqstanǵa kelip, osynda jumys isteýge bolatynyna kóz jetkizgen halyqaralyq qarjy uıymdary men iri bıznesmender atsalysady dep úmit artamyz. Jan-jaqty qoldaý arqyly atalǵan joba aıasynda jumys isteý qyzyqty bolatynyna senimdimin, – dedi Qazaqstan Prezıdenti.
«Astana» halyqaralyq qarjy ortalyǵynyń basqarýshysy Q.Kelimbetov Keńes músheleriniń jumys júrgizilip jatqan baǵyttardyń tanymal ókilder ekenin atap ótti. Naqtyraq aıtqanda, bul baǵyttar – aktıvterdi basqarý, «jasyl» qarjy ındýstrııasyn qurý, jańa qarjy tehnologııalaryn ilgeriletý baǵyttary.
Ol sondaı-aq bıylǵy jyldyń sońyna qaraı «roýd-shoý» ótkizý josparlanyp otyrǵanyn, onyń aıasynda sheteldik ınvestorlarǵa ortalyqtyń múmkindikteri týraly aqparat usynylatynyn aıtty. Jalpy alǵanda, AHQO «EKSPO» halyqaralyq kórmesi aıaqtalatyn 2017 jyldyń qyrkúıegine qaraı qyzmetin bastaýǵa, kompanııalardyń alǵashqylaryn qabyldaýǵa daıyn bolady.
«Astana» halyqaralyq qarjy ortalyǵyn basqarý jónindegi keńestiń músheleri ortalyqty damytýǵa qatysty óz kózqarastaryn bildirdi, sondaı-aq AHQO-ny jáne onyń qyzmetterin ilgeriletý jónindegi naqty usynystaryn aıtty.
Aıtalyq, S.Chakrabartı EQDB bul jobanyń belsendi qoldaýshysy ekenin jetkizdi.
– Qarjy ortalyǵyn qurý isine ózimizdiń sarapshylyq úlesimizdi qosý biz úshin mártebe. Sondaı-aq, Qazaqstan «jasyl ekonomıka» salasynda mańyzdy kóshbasshyǵa aınalyp kele jatyr dep oılaımyn. О́zgeler de Qazaqstanǵa kelýge múddeli bolýy úshin biz halyqaralyq qarjy ınstıtýttaryn damytýǵa qoldaý kórsetemiz dep berik senimmen aıtamyn, – dedi EQDB prezıdenti.
The Blackstone Group tóraǵasy ári onyń negizin qalaýshylardyń biri S.Shvarsman AHQO qurý týraly sheshimniń mańyzdylyǵyna toqtaldy.
– Biz búkil álemde zańnyń ústemdigi, aǵylshyn quqyǵyn, amerıkalyq zańgerlik tájirıbeni qoldaný sııaqty barlyǵy senim artatyn máselelerge jıi kezigip otyramyz. Qazirgi ýaqytta álemde mundaı qarjy ortalyqtary kóp emes. Osy arqyly Siz Qazaqstandy ártaraptandyryp, ony damýdyń qazirgi zamanǵy baǵyttaryn óz tájirıbesine engizgen azǵantaı elderdiń qataryna qosasyz, – dedi S.Shvarsman.
***
AHQO jobasyn júzege asyrý el ekonomıkasyna qosymsha eleýli qarjy resýrstaryn ákelip, otandyq qarjy sektoryn ekonomıkanyń qyzmetterdi eksporttaıtyn jáne eldiń ishki jalpy ónimin ulǵaıtýǵa úles qosatyn básekege qabiletti salasyna aınaldyrýǵa múmkindik beredi. AHQO-ny damytý strategııasy kapıtal naryǵy, aktıvterdi basqarý, jeke tulǵalardyń ál-aýqatyn basqarý, ıslamdyq qarjylandyrý jáne qarjy tehnologııalary sııaqty negizgi baǵyttardy qamtıdy.
Kapıtaldyń lokaldy naryǵyn damytý úshin Ortalyq álemniń kósh basyndaǵy bırjalary arasyndaǵy strategııalyq seriktespen birlesip, AHQO-nyń álemdik standarttarǵa saı keletin, joǵary tehnologııalyq bırjalyq ınfraqurylymyn qalyptastyrý jumysyn júrgizip jatyr. Bul jumys aıasynda Ortalyq London qor bırjasymen jáne metaldar bırjasymen, NASDAQ, Chıkago taýar bırjasymen, NASDAQ Dubai, Nıý-Iork qor bırjasymen qyzý kelissózder júrgizdi.
Budan bólek, AHQO-nyń qyzmetteri usynylatyn seriktes elderdiń qarjy naryǵyna qatysýshylarmen, retteýshilermen kezdesýleri jáne alqaly jıyndary ótti. Máselen, Shanhaıǵa, Gonkongqa, Londonǵa, Máskeýge, Torontoǵa barǵan saparlar aıasynda ortalyq bankterdiń basshylarymen, ınvestısııalyq banktermen, qor bırjalarymen, sondaı-aq, osy elderdiń bıznes qurylymdarymen kelissózder júrgizildi.
Álemdik ekonomıka baǵdaryn taza tehnologııalarǵa qaraı aýystyrý úderisine kóship jatqanyn eskere otyryp, AHQO aıasynda «jasyl» qarjylandyrý tetikterin engizý men damytý isi josparlanýda. Bul rette joǵary tehnologııalyq EKSPO-2017 kórmesi «jasyl tehnologııa» salasyndaǵy zertteýler úshin naqty ınfraqurylymdy usynsa, AHQO onyń qarjylyq bóligin qamtamasyz etedi.
