Qaldyq sý qateri

Taıaýda «Kazsınk» JShS-niń Rıdder taý-ken baıytý kesheni fabrıkalarynyń birinde tótenshe oqıǵa oryn aldy. Fabrıkaǵa qarasty óndiristik qaldyqtar jınalǵan Talovskıı qoımasyndaǵy sorǵy stansasynyń qabyldaý arnasyna kóp mólsherde sý kelip jatqany anyqtalyp, sonyń saldarynan onyń jartysy Fılıppovka ózenine quıyla bastaǵan. Keshikpeı tótenshe oqıǵanyń sebepterin anyqtaý sharalary bastaldy. «Kazsınk» JShS baspasóz qyzmetiniń habarlaýynsha, bastapqyda qoldanystaǵy sý qabyldaý kollektory men sý qabyldaý qudyǵynyń jumysynda qandaı da bir kinárat baıqala qoımady. Talovskıı qoımasyndaǵy sý deńgeıiniń joǵarylyǵyna baılanysty apattyń kózin anyqtaý múmkin bolmaǵandyqtan, mamandar jedel túrde toǵan deńgeıin tómendetti, baıytý fabrıkasynyń qurylǵylary toqtatyldy. Apatty joıý jónindegi arnaıy shtab qurylyp, lastanǵan sýdyń bas­taýyn izdeý jumystary uıym­dastyryldy. Qabyldanǵan sha­ralardyń nátıjesinde, Talov­skıı qoımasynan quıylǵan sýdyń kózderi anyqtaldy. Qoıma­daǵy sý men qaldyqtardyń astyń­ǵy qa­batynda qalǵan sýdy qabyl­daý qudyǵynyń qurylymy bu­zyl­­­ǵandyqtan, qaldyqqa toly qoı­yrtpaq qoımanyń kollek­tory ar­qyly sýsińgish kanaldy toltyryp, Fıllıpovka ózenine quıylǵany belgili boldy. Mamandardyń aıtýynsha, bul 1980-1990 jyldary ger­metıkalanǵan eski qudyqqa jatady. Kompanııanyń málimetinshe, qazir barlyq qajetti sharalar atqarylýda. Qazanshuńqyr ispetti qoıma ortasyndaǵy tesikti biteýge qıyrshyq tas, qummen birge 40 tonna sement jumsaldy. Eski kollektordyń syrtqa shyǵatyn bóligi tas materıaldarymen beki­tildi. Oǵan 10 myń tekshe metr­ge jýyq qıyrshyq qum tóseldi. Táý­lik boıy júrgizilgen jumystyń nátıjesinde, qaldyq sýdyń aǵyny toqtatyldy. Baıytý fabrıkasy qalpyna keltirý jumystary aıaqtalǵannan keıin iske qosyldy. Al taý-ken baıytý kesheniniń qalǵan bólimsheleri, onyń ishinde kenishter shtattyq kestege saı jumys istep jatyr. – Qoımada qyshqyl joq. Sıanıd – 1, myrysh – 10-15, qor­ǵasyn – 1, mys – 4, marganes 7-8 shekti konsentrasııa mólsherinde. Negizgi bóligi taýdyń dıspersti qoımaljyńy. Onyń 50 paıyzy kremnıt, 30 paıyzy temir, qalǵandary 20 paıyzdy quraıdy, – dedi kompanııanyń bas ekology Qaztaı Takeev. Sonymen birge, «Kazsınk» kompanııasy normadan joǵary qaldyqtar úshin kel­tirilgen shyǵyndy memlekettik or­gandardyń bekitilgen zańnamaǵa sáıkes anyqtaýy boıynsha toly­ǵymen óteıtin bolady. Dýman ANASh, «Egemen Qazaqstan» Shyǵys Qazaqstan oblysy, Rıdder qalasy PS: oqıǵa ornynan túsirilgen beınejazbany gazetimizdiń saıtynan kóre alasyzdar.