Kóptegen máseleler kóterildi

Memleket basshysy Táýelsizdigimizdiń 25 jylynda qol jetkizgen elimizdiń jetistikterin, jer máselesin halyq arasynda túsindirý jumystaryn belsendi júrgizýdi tapsyrǵan bolatyn. Osyǵan baılanysty Jambyl oblystyq ákimdiginde Jer kodeksiniń normalaryn halyq aldynda túsindirý boıynsha Qoǵamdyq keńestiń otyrysy ótti. Jıynǵa qatysqan Jambyl oblysynyń ákimi Kárim Kókirekbaev bul baǵyttaǵy sharalar keńinen jalǵasýy kerek ekendigin atap ótti. Jer kodeksine engizilgen óz­geris­terdi oblys turǵyndaryna túsindirý úshin oblys ákimdigi janynan quramy 18 adamnan tu­ratyn jumys toby qurylǵan. Top quramynda «Nur Otan» partııasy oblystyq fılıaly tóraǵasynyń birinshi orynbasary, oblystyq máslıhattyń hatshysy, oblystyq qoǵamdyq keńestiń tóraǵasy, oblystyq kásip­kerler palatasy­nyń dırektory, oblys ákimdigi­niń ishki saıasat, jer qatynastary, aýyl sharýa­shy­lyǵy, jastar saıa­saty máseleleri, kásipkerlik, densaýlyq saqtaý, bilim, tabıǵı resýrstar jáne tabıǵatty paıdalanýdy retteý, densaýlyq saqtaý basqarmalarynyń basshylary qamtylǵan. Jumys tobynyń ju­mysshy organy bolyp oblys ákim­diginiń jer qatynastary bas­qarmasy belgilendi. Oblys ákimdigi janynan quryl­ǵan jumys tobynyń Jer kodek­sine engizilgen ózgertýler men to­lyq­tyrýlardy oblys turǵyn­daryna túsindirý boıynsha is-sharalar jos­pary bekitilip, 16 mamyr­dan bastap jergilikti turǵyn­darǵa túsindirý jumystary júrgi­zi­lýde. Búgingi kúni eldi mekenderde barlyǵy 325 kezdesý ótkizilip, 23 myńnan astam adam qamtyldy. – Kezdesý barysynda oblys turǵyndary tarapynan jer reformasy, bilim berý, medısınalyq qyz­met kórsetý jáne basqa da salalar boıynsha qordalanǵan máse­leler kóterildi. Osyǵan baılanys­ty halyq arasynda túsindirme jumys­tary keńinen júrgizilýde, – deıdi qoǵamdyq keńes tóraǵasy Jandar Káribaev. Endi osy máselege qatysty aı­tylǵan keıbir pikirlerdi keltire keteıik. Masat ÁShIM, «Nur Otan» partııasy Jambyl oblystyq fılıaly tóraǵasynyń birinshi orynbasary: – «Nur Otan» partııasynyń oblystyq, aýdandyq, qalalyq fılıaldary osy ýaqyt ishinde aýyl-aımaqty aralap, elmen 180-nen astam kezdesý ótkizip, olardyń ózderin mazalaǵan suraqtaryna jaýap berdi. El Jer kodeksindegi ózgertýlerdi áli de qatańdatýdy suraıdy. Ásirese, 25 jylǵa shetel azamattaryna jalǵa berý máse­lesine alańdaıdy. Top músheleri barlyq jaǵdaıdy túsindirip, árbir ózgertýdi jeke-jeke saraptap berdi. Jınalǵan jurt kezdesýlerde Jer kodeksindegi ózgeristerden de bólek kóptegen máselelerdi kóterip jatty. Naqtyraq aıtsaq, aýyldarda jer alýdyń qıyndyǵy, jyl ótken saıyn aýyl mańyndaǵy mal jaıylymdarynyń tarylyp kele jatqany, baý-baqshany sýaratyn aǵyn sýdyń tapshylyǵy jáne mal urlyǵynyń órship turǵany kóbirek sóz boldy. Menińshe bul máselelerge maıda-shúıde dep qaramaı, tereń mán berý kerek. Aýyl, aýdan ákimderi halyqpen jıi júzdesip, qordalanǵan máselelerdi aýyl azamattarymen birge talqylap, odan bir nátıje shyǵarýǵa kúsh salýy kerek. Iаǵnı, aýyl, aýdan ákimderiniń jaýapkershiligin arttyrýymyz qajet. Qalaı aıtsaq ta, aýyl, aýdan ákimderi elmen tyǵyz jumys isteýi olardyń bılikke degen senimin bekite túsetini anyq. Álibek ÁMZEEV, mádenıet qaıratkeri: – Men de aýyl-aımaqty aralap qaıttym. Onyń ishinde ózimniń týǵan aýylymda da boldym. Shynynda, eldiń jer máselesine baılanysty alańdaýshylyǵy bar. Biraq, kóbisi Jer kodeksindegi ózge­risterdi jete túsinbeıdi. Sodan bolar, bul basqosýlarda el basqa da máselelerdi jıi kóterip jatty. Shynynda, keıbir aýyldarda jaıy­lym máselesi úlken proble­ma­ǵa aınalǵan. Eldi mekenniń tóńire­gin­degi jerlerdiń bári satylyp ketken­dikten, mal jaıatyn jer joq. Sonaý 12 shaqyrym jerden jaıy­lym bergen eken. Ol jaqqa baryp-qaıtý bir azap. Jáne osy kezde­sýde bir baıqaǵanym, keıbir aýyl ákim­deri elmen sóılesýdi, birle­sip jumys isteýdi jaqsy bilmeıdi. Bárin birdeı qaralaı berýge bolmas. Biraq kóptegen aýyl ákimderiniń jergilikti zııaly qaýymmen baılanysy joq. Mundaı basshylar qo­ǵamnyń kómekshisi bola ala ma? Mine, bul baǵytta aýyl ákimderine júkteler mindet óte aýqymdy. Oralhan DÁÝIT, «Egemen Qazaqstan» Jambyl oblysy