Bos jatpaýy kerek

Soltústik Qazaqstan – agrarlyq jaǵynan qýatty oblys. Jalpy jer qory 9804,3 myń gektardy qurasa, aýyl sharýashylyǵyna jaramdysy –7168,5 myń gektar. 3100 sharýa jáne fermer qojalyǵy maqsatty aýylsharýashylyq alqaptarynyń 18 paıyzyn, 671 seriktestik 69 paıyzyn ıelenedi. Oblys ákiminiń birinshi orynbasary Aıdar­bek Saparovtyń qatysýymen ót­ken óńirlik qo­ǵamdyq keńestiń otyrysyn­da jer qatynastary basqarmasynyń bas­shysy Esengeldi Káribaev habarl­a­ma ja­sap, jurtshylyq tarapynan úl­ken qo­ǵam­dyq rezonans týdyrǵan Jer ko­deksine qatysty Elbasy aıqyndap ber­­gen naqty tujyrymdar tóńireginde atqa­­rylyp jatqan jumystarmen tanys­tyr­dy. Sońǵy úsh jylda 7055,7 myń gektar al­qap­qa túgendeý júrgizilip, 278 myń gektar ýchas­keniń paıdalanylmaı jatqany anyqtalǵan. Nátıjesinde 35,9 myń gektar jer ýchaskeleri boıyn­sha jaldaý sharttary buzylyp, 205 myń gektary aýylsharýashylyq aınalymyna engizilgen. Aýyl­sha­rýashylyq maqsatyndaǵy jerler sanatynda aıdalmaly jerler úle­siniń tómendeýin boldyrmaý maqsa­tymen olardy bo­sal­qy jerlerden aýylsharýashylyq aınalymyna tartý, tyńaıǵan jerlerdi ıgerý ju­mystaryna basymdyq berilgen. A.Saparov jerdiń sheteldikterge jalǵa ǵana beriletinin, satylmaıtynyn qadap aıtyp, qazirgi tańdaǵy ózekti másele Jer kodeksine engizil­gen ózgerister men túzetý­­­­­lerdi baıyp­tylyqpen jan-jaqty túsindirý bolyp tabylatyn atap kórsetti. Jerdi tıimdi paıdalaný, qorektik zattarmen baıytý, qunarlylyǵyn joǵaltpaý qajettigin eske saldy. Aımaqta bir gektar egistik jerdiń baǵasy 55 myń teńge, jaıylym 12 myń teńgege jýyqtaıdy. Bonıteti joǵary, topyraǵy qara shirindige mol óńirge usynystar az túspesi anyq. Sol sebepti jerlerdiń sapasy men sany jaǵynan esepteýge monıtorıng júrgizý, jer qoryn tıimdi paıdalaný óte mańyzdy. Mem­leket usynyp otyrǵan múm­kindikterdi oraıymen qoldana bilsek, taby­symyz da molaıa­dy, halyqtyń ál-aýqaty da artady, dedi qoǵamdyq keńeske qaty­sýshylar. Báriniń oılary aýyl sharýa­shylyǵyna arnalǵan jerler bos jatpaýy kerek degen usynys-pikirlermen úndesti. Jer kodeksine engizilgen ózge­risterge oraı turǵyndardyń usynys-tilekterin bilý maqsa­tymen qurylǵan Gall-ortalyq jumys istegeli birqatar pikirlerdiń jınaqtalyp qal­ǵanyn ańǵarýǵa bolady. Solardyń biri Ýálıhanov aýdany Qaırat aýylynyń tur­ǵyny Máýlet Aıtmaǵambetovten túsipti. Ol kezinde «Donskoe» JShS-niń ıeligine beril­gen aýylsharýashylyq jerleriniń ıgerýsiz qal­ǵanyn qynjyla jetkizgen. Oǵan sharýa­shylyqpen jalǵa berý kelisimshartty buzý úshin sotqa talap aryz jiberilgeni, is oń sheshil­gen jaǵdaıda jer ýchaskeleri konkýrs­tyq negizde aýksıonǵa túsetini jónin­de jaýap berilgen. Taıynsha aýdany Qara­ǵash eldi mekeniniń turǵyny Dosymhan Syrym­bet aýyl mańynda jaıylymdyq jerler qal­maǵanyna alańdaýshylyq bildirse, Ǵ.Músi­repov aýdanynan habarlasqan Sergeı Pı­taev «Vozvyshenskoe» JShS-nen jarytyp paı úlesin ala almaı júrgenin, kórshiles sharýa­shylyqtarda kóp beriletinin alǵa tart­qan. Petropavldyq Bekjan Esenov osydan tórt jyl buryn jer telimderin alýǵa óti­nish berse de kezegi jyljy­maıtynyn jazǵan. О́mir ESQALI, «Egemen Qazaqstan» Soltústik Qazaqstan oblysy