QOSTANAI. 27 mamyr. Ybyraı Altynsarınniń memorıaldyq mýzeıinde fılosof ǵalym, ustaz, etnograf, ybyraıtanýshy, marafonshy, óner janashyry Qalqaman Jaqyptyń 70 jasqa tolýyna oraı, oǵan qurmet kórsetildi. Bul týraly egemen.kz tilshisi habarlady.
Qostanaıda Qalqaman Jaqypty bilmeıtinder kem dep aıtýǵa bolady. Ol aldymen ustaz, oblysta joǵary bilim berý isiniń damýyna úles qosyp keledi. Ol kisiden júzdegen jastar bilim aldy. Qalqaman Jaqypty sondaı-aq, jurtshylyq belsendi sportshy dep te tanıdy. Jelaıaq talaı ret oblystyq, respýblıkalyq marafondarǵa qatysty, ony uıymdastyrýda da belsendilik tanytty.
Sonymen qatar, ulttyq ustanymy berik ǵalym oblystaǵy belgili etnograf retinde de tanymal. Onyń ybyraıtaný ilimine qosqan úlesin aýyz toltyryp aıtýǵa bolady. Qostanaıdyń ortalyǵyndaǵy Altynsarınniń ózi ashqan mektep irgetasynyń kirpishin taýyp, ony mýzeıdiń jádigeri etken de Qalqaman aǵamyz bolatyn. Onyń uly aǵartýshy ómirinen jazǵan maqalalary da bir tóbe.
Qalqaman Jaqyp mereıtoıynyń Y.Altynsarın memorıaldyq mýzeıinde uıymdastyrylýynyń da ózindik syry bar. Ol aldymen ybyraıtanýshy, ekinshiden jastaı ata-anadan jetim qalǵan Qalqaman uly aǵartýshynyń ózi ashqan mektep-ınternatynda bilim alyp, er jetti, sanatqa qosyldy. Ol Qalqamannyń týǵan úıi sekildi seziledi.
Qostanaı qalasy zııalylary jınalǵan sharada oblystyq mádenıet basqarmasy basshysynyń orynbasary Roza Tóleshqyzy, Qalqaman aǵanyń ustazy, seksenniń seńgirine shyǵyp otyrǵan qart ustaz Jumaǵazy Bekbosynov, Naǵashybaı Muqatov, jýrnalıst Gúljibek Bekmuhamedova jáne basqalar jyly tilekterin aıtty.
Qart ustaz Jumaǵazy Bekbosynov: «Bala kezinen qoǵamdyq jumystarǵa belsendi qatysýshy edi. О́mirde de solaı boldy. Kóz aldymda er jetti, kóz aldymda jaqsy adam bolyp qalyptasty. Qalqamannan jas urpaq salamatty ómir saltyn ustanýdy úırenýi kerek. Úırený úshin basqa jaqtan bıik tulǵa izdeýdiń qajeti joq, jaqsynyń barlyǵy da janymyzda júrgenin umytpaıyq», – dedi.
Ustaz, ǵalym, etnograf Qalqaman Jaqyp: «Men ustazymnyń aldynda ózimdi ustazbyn aıtýǵa qymsynyp turamyn. Jumaǵazy aǵamyz bala kezimizde qasyna turǵyzyp qoıyp, adam bolyńdar dep uzaq ursatyn. Endi búgin dál solaı qasyna turǵyzyp qoıyp, uzaq maqtady. Ustazymnyń eńbegi sál de bolsa aqtalǵan-aý dep bilemin», – dedi.
Názıra Járimbetova.
Derek, foto: egemen.kz.
