QOSTANAI. 27 mamyr. Oblys ortalyǵyndaǵy toǵyz joldyń torabyna Qobylandy batyrǵa eskertkish qoıyldy. Ol Saǵadat Nurmaǵanbetov atyndaǵy qordyń Qostanaı bólimshesi júrgizgen jumystardyń arqasynda múmkin boldy. Bul týraly egemen.kz tilshisi habarlady.
Halqymyzdyń bas batyrynyń eńseli eskertkishi týǵan jerdiń ár súıem jerin syrtqy jaýdan qorǵaǵan halqymyzdyń bar batyrynyń beınesi sekildi elesteıdi. Erliktiń epopeıasyndaı «Qobylandy batyr» jyryn oqymaǵan qazaq kem shyǵar. Osy jyr arqyly talaı urpaq batyrlyqqa eltip, eliktep ósti. Táýelsizdigimizdiń 25 jyldyǵy qarsańynda ulttyq rýhty aspandatatyn mundaı eskertkishtiń Arqa tórinen oryn alýy zańdy edi.
Qostanaı qalasynyń ákimi Bazyl Jaqypov: « Elimizdiń táýelsizdigi, jerimizdiń amandyǵy úshin kúresken uly babalar erligin dáriptegende ǵana jas urpaqty eldikke tárbıeleımiz. Sonda ǵana táýelsizdigimiz baıandy, Máńgilik el bolamyz», – dedi. Sonymen qatar, eskertkishtiń ashylý saltanatynda sóz alǵan akademık Saǵyndyq Satybaldın jáne S.Nurmaǵanbetov atyndaǵy qor prezıdenti Mahmut Nálibaev osyndaı ıgilikti isterge muryndyq bolyp otyrǵanyn tilge tıek etti. Qazir qordyń alty oblysta fılıaldary bar. Olar demeýshiler jınaǵan qarjynyń kómegimen Qajymuqanǵa, Imanjúsipke eskertkish ornatty, kóptegen qaıyrymdylyq ister tyndyrdy. Mine, Qobylandy batyr eskertkishi de osy qordyń Qostanaı bólimshesi jumysynyń arqasynda múmkin boldy. Qobylandy batyr eskertkishiniń boı kóterýi úshin kóptegen jumystar atqarǵan qordyń Qostanaı bólimshesiniń jetekshisi Serikbaı Bısetaevqa jınalǵan jurt rahmetin aıtyp, aq boz at mingizdi. Senat depýtaty Serik Aqylbaı, demeýshiler atynan sóz alǵan kásipker Ybyrash Estaev elimizdiń shekaralyq oblysynyń biri Qostanaıda aıbyndy batyr eskertkishiniń ashylýy jas urpaqtyń rýhyn kóteretinin aıtty.
Eskertkishtiń ashylý saltanatyna osy jumystyń avtorlary belgili músinshiler aǵaıyndy Ábdikerim men Ábdimútálip Ahmetovter qatysty. Osy saltanatty sharada belgili estrada ánshisi, Qazaqstan Respýblıkasynyń eńbek sińirgen ártisi Baqtııar Taılaqbaev «Qobylandy batyr» atty jańa ánniń tusaýyn kesti. Onyń mátini men ánin jazǵan belgili dáriger, medısına ǵylymdarynyń doktory Tórehan Ábish te ádeıi Almatydan keldi. Belgili aıtys aqyny Marjan Esjanova jyrdan shashý shashty. Eskertkishtiń ashylýyna Qazaqstannyń birneshe oblysynan qonaqtar, belgili jazýshy, tarıhshy ǵalymdar kelip qatysty. Qostanaılyqtar men qala qonaqtar Qobylandy batyrǵa arnalǵan ǵylymı-praktıkalyq konferensııaǵa qatysatyn bolady.
Názıra Járimbetova.
Derek, foto:egemen.kz.
