Kópshilik kókeıindegi máseleler

Oblystyq qoǵamdyq keńestiń kezekti otyrysynda búgingi kúni jurtshylyq nazaryn aýdaryp otyrǵan jerge qatysty jaılar áńgime arqaýyna aınaldy. Onda osy máselege baılanysty aıtylǵan usynystar men pikirlerdi jınaqtap, respýblıkalyq komıssııa qaraýyna jiberý týraly ortaq sheshim qabyldandy. Atalǵan jıynǵa keńes múshelerimen qa­tar, jer­gilikti bıliktiń, qoǵamdyq birlestikterdiń, saıası par­tııa­lardyń ókilderi qatysty. Qoǵamdyq keńestiń tór­aǵasy Qýanysh Elýbaev jer zańdylyǵyndaǵy ózge­risterge jurtshylyqtyń beı-jaı qaramaýyna baılanys­ty halyq arasynda qyzý talqylaýlar júrip jatqanyn eske alyp, máseleniń mánisine qatysty jınalǵandardyń ózindik oı-tujyrymdaryn ortaǵa salýdy usyndy. – Bizdi alańdatatyny keı­bireýlerdiń Qazaqstanda jer sheteldikterge satylady degen jalǵan aqpardy taratyp jiberýi. Munyń ózi birqatar túsin­bestikterge jol ashty. Soǵan baılanysty túsindirý jumystary jandandyryldy. Elbasy Jer kodeksiniń jekelegen tarmaqtary boıynsha belgili bir merzimge moratorıı jarııalady. Prezıdenttiń tapsyrmasymen arnaıy komıssııa qurylyp, jumys isteýde. Bizdiń maqsatymyz naqty is-sharalarmen jurtshylyqty aıqyn habardar etý bolyp tabylady,– dedi ol. Oblys ákiminiń orynbasary Muhtar Jumaǵazıev jer reformasynyń negizgi tustaryna tereńirek toqtalyp, oblys aýmaǵynda osy baǵytta atqarylyp jatqan sharalar týraly tarata áńgimeledi. Atalǵan másele boıynsha jaǵdaıdy turaqtandyrý úshin jergilikti bılik tarapynan qolǵa alynǵan jumystarmen jete tanystyrdy. Jerdi tıimdi paıdalaný máselelerin alǵa tarta kelip, aýyl­darda kooperasııa qurý kóptegen túıindi jaılardy sheshýge septigin tıgizetinin jadyǵa saldy. Oblystyq máslıhattyń depýtaty, «Aıs» JShS dırektory Marat Iteǵulov, fılosofııa ǵylymdarynyń doktory, professor Altaı Taı­janov, oblystyq ardagerler keńesiniń tóraǵasy Keńes Birmanov, oblystyq jer qaty­nastary basqarmasynyń basshysy Qabaı Sársenǵalıev jáne basqalary ózderiniń jerge qatysty oılaryn ortaǵa salyp, usynys-pikirlerin bildirdi. Satybaldy SÁÝIRBAI, «Egemen Qazaqstan» Aqtóbe oblysy