Qoǵamdyq keńeste qaraldy

«Qoǵam ókilderiniń usynystaryn tyńdap, ony júıege keltirý jáne bu­lardy Jer reformasy boıynsha respýblıkalyq komıssııanyń qaraýyna usyný» kún tártibimen ótkizilgen oblystyq qoǵamdyq keńestiń májilisi iskerlik sıpat aldy. Komıssııa tóraǵasy, oblystyq máslıhattyń hatshysy Dýlat Nurmoldın basqosýǵa barlyq aýdandardan, qoǵamdyq uıymdardan ókilder shaqyrylǵanyn habarlady. Jınalǵandar aldynda qoldanystaǵy jer zańnamasy  men Prezıdenttiń Jer kodeksiniń keıbir baptaryna toqtam jarııalaýynyń mánisi jóninde oblystyq jer qatynastary basqarmasynyń basshysy Almagúl Qadyrálına baıandama jasady. Oblystyq máslıhattyń depýtaty, respýblıkalyq komıssııanyń múshesi Nartaı Ysqaqov budan burynǵy eki májiliste kóterilgen máseleler týraly keńinen áńgimeledi. «Biz komıssııa músheleri men qoǵam ókilderi tarapynan aıtylǵan kóptegen usynystardy egejeı-tegjeıli qarastyrdyq, – dedi ol. – Bulardyń barlyǵy Parlament tarapynan qabyldanatyn kelisim sheshimderine negiz bolady. Árkimniń jerge oraılas pikiri men kózqarastary árqıly bolǵanymen, komıssııa músheleriniń barlyǵy elimizge turaqtylyq pen serpindilik qajettigine múddeli. Oblys jurtshylyǵy da osy baǵyttta oı órbitip, birden-bir durys sheshim qabyldaýǵa umtylatynyna senim­dimin». «Aq jol» partııasy oblystyq fılıa­lynyń tóraǵasy Serik Beısembaev shek­aralyq aýmaqtardaǵy jerdi jalǵa berýge bolmaıtyndyǵy jóninde pikirin aıtty. Sondaı-aq, ol shalǵaı eldi meken turǵyndary jer reformasy men qazirgi tańda kóterilip jatqan máseleler týraly tolyq habarsyz. Komıssııa músheleri aýyldarǵa shyǵyp, túsinik sharalaryn belsendi júrgizýi tıis, dedi. Minberge kóterilgen «Qazaq tili jáne mádenıeti» qoǵamdyq birlestiginiń tóraǵasy Meırambek Qıyqov aýyldar aýmaǵyndaǵy jerlerdi saqtaý jáne jerge qatysty máselelerde «oralman» sózin múldem qoldanbaý qajettigin ortaǵa saldy. Kókshetaý qalasynyń qurmetti azamattary Qadyrjan Ábýov pen Bolat Janádilov, professor Qasymhan Qusaıy­nov, qoǵamdyq keńes múshesi Bolat Ju­pynovtar jer qatynastaryndaǵy ulttyq mentalıtet, jerdiń naqty qojasy jáne jerdiń negizgi ınvestory memleket bolyp qala beretinin atap kórsetti. Májiliste oblys ákiminiń birinshi orynbasary Qadyrhan Otarov sóz sóılep, óńirdegi jerge ornalastyrý, onyń qunarlylyq erekshelikteri jáne ekonomıkalyq aına­lystaǵy mańyzy jóninde túsinik berip, suraqtarǵa jaýap qaıtardy. Baqbergen AMALBEK, «Egemen Qazaqstan» Aqmola oblysy