«О́z qorqynyshyńdy jeńý – eń úlken jeńis»

Frıstaıl

Barlaryn salǵan Dmıtrıı Reıherd pen Iýlııa Galysheva mogýldan Azıada altynyn aldy Shańǵy baǵdarlaý jarysynda abyroıymyzdy asyryp, jankúıerlerdi jelpintip ketken Olga Novıkovanyń altynynan keıin de tabyssyz bolǵan joqpyz. Frıstaılshylardan birinshi bolyp dodany mogýlshylar bastady. Osylaısha qazaqstandyq  Dmıtrıı Reıherd  mogýldan Azıada chempıony atandy. Qyzdar arasynda Azıadanyń kezekti altynyn Qazaqstan qanjyǵasyna Iýlııa Galysheva baılady. Osy arada sheıper-arhıtektor Valentın Kotlıarovtyń málim­deýi­men, «Tabaǵan» sporttyq keshenindegi frıstaıl joly  bar bolǵany 10 kún ishinde salyn­ǵanyn aıta ketelik. Qazaqstandyq 22 jastaǵy tanymal mogýlıst Dmıtrıı Reıherd maýsymdy Fınlıandııada ót­ken álem kýbogynda tórtinshi oryn alyp, jaqsy kórsetkishpen bas­taǵan bolatyn. Jarys al­dynda Dmıtrıı: – Qazir bar oıym Azıadada. О́zim­di de, jankúıerlerimdi de qýant­qym keledi, sondyqtan qaıtsem de altyn alýym kerek. Ol úshin barlyq jaǵ­daı jasalǵan, múmkindik mol. Jarysqa myqty qarsylastardyń kelgenine óte qýanyshtymyn. Ońaı báseke bolaıyn dep turǵan joq, – degen edi. Dmıtrıı 12 jasynan bastap frıstaıl sportymen aınalysa­dy. Sporttyń bul túrin ol ózi tań­daǵan. О́z qorqynyshyńdy jeńý – eń úlken jeńis dep sanaıdy. Al­tyn almaı turyp-aq jerlesimiz: – Kez kelgen sportshy úshin jarysta jeńiske jetý – bul óz-ózińdi jeńý, ózińdi barynsha qolǵa alyp, júktemeni joǵary deńgeıde oryndaý degen sóz. Bul keremet sezim! Degenmen, bul jerde tájirı­beniń mańyzy zor. Men 10 jyldan astam álemdik deńgeıdegi jarys­tar­ǵa qatysyp júrmin, sondyqtan álemdik jarystardy jańadan bastap júrgen sportshylarǵa qaraǵan­da maǵan áldeqaıda ońaı. Ekinshi jaǵynan, maǵan júkteler jaýapkershilik te áldeqaıda joǵary, – dep aǵynan jarylǵan edi. Qazaqstandyq frıstaıldyń jas juldyzy bolyp esepteletin, Fransııanyń Merıbel qalasynda ótken Álem kýbogynyń jeńim­pazy Iýlııa Galysheva da Qysqy Azııa oıyndarynda frıstaıldyń mogýl túri boıynsha aldyna jan salmaýǵa ýáde berip, qysqasha suhbattasyp úlgergen edik. – Frıstaılmen qaı ýaqyt­tan beri aınalysasyz? – 4 jastan 6 jasqa deıin ba­týttaǵy akrobatıkamen jáne jal­­py dene shynyqtyrýmen aına­lys­tym. Sol ýaqytta jasaǵan jatty­ǵý­lardyń barlyǵyn keıin shańǵy­men sekirip jasaıtynymdy kim bilgen. Frıstaılmen aınalysa bas­­ta­ǵan kezde sporttyq jıyn­darǵa bardym. Kóp ýaqytymdy taýda ótkizdim. Meni munda barlyǵy qyzyqtyra bastady. – Azııa oıyndary bastal­ǵanǵa deıingi jattyǵýlaryńyz qalaı ótti? – Maǵan aspan shaıdaı bolǵan unaıdy. Kún jarqyrap tursa, kóńil kúıiń de kóterińki bolady. Jarys­qa jaıly jaǵdaı jasala­dy. Trassa áli jumsaq, tóbeshik­ter áli kishkentaı jáne jazylyp úlgerme­gen. Biraq saıys bastal­ǵansha bar­ly­ǵy durystalady dep oılaımyn. – О́z komandańyzǵa qandaı baǵa bere alasyz jáne sizge basty qarsylas bolatyn kim? – Komandaǵa eń myqty frıstaıl sportshylary jumyldy­ryl­ǵan. Bizge basty qarsylas bola alatyn japondyqtar shyǵar. – Azıadadan keıin nemen aı­nalysasyz? – Aldaǵy ýaqytta álem kýbo­gynyń kezeńderine qatysýdy jos­parlap otyrmyn. Mine, osylaısha tildeskenimizge táýlik ótpeı jatyp Ga­lyshevanyń armany da, boljamy da oryndaldy. Qyzdar arasynda ekinshi oryn­da – japondyq Mıkı Ito, úshinshi oryn qytaı qyzy Kvın Nıngke buıyrdy. Azıadanyń jańa chem­pıony Galysheva jarystaǵy jeke kórsetkishin 22,09 ballǵa kóterdi. Kvalıfıkasııa boıynsha sońǵy nátıje kórsetip, qola júldeni ıelengen Qytaı qyzy mamandar men kórermenderdi aqtyq sátterde tań qaldyryp, máre syzyǵyna jaqyn­daǵanda japon­dyq Tae Satoe men Iýlııa Ro­dıonovany basyp ozdy. Erler arasynda ótken mogýl jarysynda ekinshi oryndy ja­pon­dyq Osamý Ýeno alsa, úshinshi oryn da qazaqstandyqtaryń úle­sinde. Qola júldeni Dmıtrıı Barmashov jeńip aldy. Mamandar osyǵan deıin Azıadaǵa qatysatyn Qazaqstan mogýlshileri kúshtiler­diń qatarynda ekenin aıtyp kelgen. Solardyń arasynda Barma­shov­tyń orny bólek bolatyn. –          Dmıtrıı, sizdiń sport­ta­ǵy alǵashqy qadamyńyz qa­laı bastaldy? – Áýeli 7 jyl taý shańǵy­symen shuǵyldandym. Sonda jú­rip 5 jyl boıy ońdy-soldy bu­rylýdyń tásilderin úırendim. Tek sodan keıin ǵana mogýlge aýystym. Qazir 26 jastamyn. Basqasha aıtqanda, osy sporttyń qyr-syryn tolyq meń­ger­gen sııaqtymyn. –  Frıstaılshynyń basty sa­palyq beınesi týraly ne aıtar edińiz? – Bul sportqa barlyq jan-tánińizben berilýińiz kerek. Son­daı-aq, óz sheberligińizge mindetti túrde senýge tıissiz. Kóńilińizde qobaljý bolsa, qulap, jaraqat alýyńyz ábden yqtımal. Son­dyq­tan is-tájirıbeńizge senip, tek alǵa umtylýyńyz kerek. Sonymen «Tabaǵan» sport kesheninde ótken erler mogýly ja­rysynda bes elden   10 sportshy baq synady.   Bul sportshy­lar­dyń barlyǵy frıstaıldan birneshe halyqaralyq jarystardyń jeńimpazdary bolatyn. Osy arada Azıada dodasy bastalar aldynda ǵana frıstaıl bo­ıynsha Qazaqstan quramasynyń bir bóligi 25 Halyqaralyq qysqy Ýnıversıada ótken Túrkııadan altyn men qola medaldy jeńip ákelgenin aıta ketýge bolady. – Úıge jeńispen oralǵany­myzǵa qýanyshtymyz, óıtkeni bul – Azıadadaǵy bizdiń frıstaıl­shylar úshin jaqsylyqtyń belgisi, – dep atap kórsetti mogýl bo­ıynsha Qazaqstan quramasynyń bapkeri Vadım Sokolov. Ýnıversıadada Qazaqstan qu­ra­masy tek mogýl boıynsha j­arys­tarǵa qatysqan. Qazaqstan­dyq Darıa Rybalova eki reseılik qyzdan ozyp shyǵyp, chempıon atandy. Erler arasynda birinshi jáne ekinshi oryndardy reseılikter alsa, úshinshi oryndy qazaq­standyq Denıs Moıseev ıelendi. Tórtinshi orynda qazaqstandyq Andreı Sokolov tur. «Endi bizdiń sportshylar Azıadada jaqsy nátıjeler kórsetý kerek: Almatydaǵy jol qıyn, ol álemdegi qıyn joldardyń biri. Bizdiń jigitterden basqa japon­dyqtar da altynnan úmitti dep oılaımyn. Barlyǵynyń maqsaty bir – medal úshin kúresý», degen edi Vadım Sokolov. Qazaqstan quramasynyń frıs­taıldan bas jattyqtyrý­shysy Vık­tor Lemeshko óz komanda­sy­nyń mogýldaǵy alǵashqy jatty­ǵýynan keıin trassada barlyq tehnıkalyq erejeler saqtal­ǵanyn aıtyp: – Jol óte kúrdeli, sondyqtan jigitter ony oıdaǵydaı júrip ótýi úshin ýaqyt kerek. Men óz koman­damnyń kúshine senemin, sondyq­tan jeńis tuǵyryna kó­teri­letini­mizge senimdimin, – degen bolatyn. – Azıadaǵa komanda qaı jerde daıyndaldy? – Negizgi jarystarǵa biz Altaıda daıyndaldyq. Ol jaqta qar qalyń, qanatty jol da jyldam júredi, sondyqtan Altaıda jatty­ǵý óte yńǵaıly. Odan bólek, О́ske­mende de jattyǵýǵa yńǵaıly jotalar bar. – Jaz mezgilinde qaıda jattyǵasyzdar? – Shyǵys Qazaqstanda nemese Avstrııada. Aınash ESALI. Almaty.