Senbi kúni Balýan Sholaq atyndaǵy sport saraıynda Qytaı – Soltústik Koreıa jáne Qazaqstan – Ońtústik Koreıa quramalarynyń arasynda match ótti. Birinshi kezeńde qytaı qyzy Manyń soqqan shaıbysyna oıyn bitýge 5 mınót qalǵanda koreı Kımniń shaıbymen jaýap berip, beıbit tarqasqan.
Ekinshi kezeńde qytaılyqtar shabýyldy kúrt kúsheıtip jiberdi. Kombınasııalyq oıyn órnegi jaqsardy. Esepti 5:1-ge jetkizip tastady. Sońǵy kezeńde Qytaıdyń 16-shy nómirli saıypqyran qyzy Ma eki shaıba soǵyp, eki mınót qalǵanda Chang eseledi. Esep 8:1.
Al qazaqstandyq qyzdar Ońtústik Koreıadan kelgen áriptesterin 11:0 esebimen jeńdi. Beınelep aıtsaq, koreı jaq alań muzynyń aq jemi shyǵyp, bizdiń qaqpa aldyna konkı izi tımedi dese de bolǵandaı. Qazaqstan quramasynyń surmergeni Natalıa Iаkovchýk alǵashqy shaıbany soǵyp, sońǵy eki goldy ózi qorytyndylady.
Osy oıynnan keıin-aq negizgi tartystardyń qaı quramalardyń arasynda ótetindigin anyqtaýǵa juldyz-joramalshy, baqsy-balger, kóripkel-qushynapshynyń kerektigi joqtyǵy kórinip qaldy.
Álemdik reıtıng boıynsha Qytaı, Qazaqstan jáne Japonııa quramalary irkes-tirkes keledi. Bizdiń oı – quramamyzdyń óz jerimizde ótip jatqan Azıadada top jarýy. Oǵan múmkindikter joq emes. Biz esepten, jerebe boıynsha qos koreı quramasymen kezdesýimiz oıynshylarymyzdyń óz oıyn-órnegin tabýyna járdemdesti. Aleksandr Malsev pen Sergeı Solovev jattyqtyratyn komandada aqsap jatqan tustary az emes. «Sheshesi urǵan taıaq balaǵa ótpeıdi» degendeı qyzdarymyz túsinedi dep oılaımyz. Eki oıynnan kóńilge túıgenimiz, qurama ujymdyq oıyn oınaýǵa bastyqpaǵan. Kóbine jeke oınaıdy. Shaıbanyń sońynan keıde túıdektelip eki úsheýi qýyp júredi. Baıaǵyda Harlamovtardyń dáýirlep turǵan zamanynda Borıs Mıhaılov qarsylasynyń qaqpasynyń túbinde tabandap turar edi. Keýdemen ıterse de, shalyp jyǵyp konkımen baltyryn basyp ótse de ketpeıtin. Harlamov pen Petrov qarsylastaryn aldap ótip, tosqaýylda turǵan Mıhaılovqa shaıba shyǵaryp berer edi. Soǵatyn. Sondaı Mıhaılov-Mıhaılovalar joq bizde. Qarsy komanda shabýyl kúsheıtip jiberse, qyzdarymyz sasqalaqtap qalady. Bul – jaqsylyq emes. Ońtústik Koreıamen oıyn barysynda bizdiń shabýylshyny qaqpa aldynda qos jaqtap qaýsyrmalap qysyp qulatqandyqtan qos koreı qyzy Lı men Ho eki mınóttik aıypqa tartyldy. Bizdiń bestikke koreılik úsh qyz ǵana qaldy. Saqa komandalar mundaıdy apshyny qýyryp keminde eki-úsh shaıba soǵyp alady. Al bizdiń qyzdar osy qolaıly sátti túk te paıdalana almady.
Keshe Qytaı – Ońtústik Koreıa, Qazaqstan – Japonııa quramalary muz aıdynyna shyqty. Osy oıyndardan keıin kókeıdegi biraz saýaldarǵa jaýap tabylady. Qazaqstan quramasymen kezdesýde alǵashqy eki kezeń Japondardyń basymdylyǵymen ótti. Ol soǵylǵan eki golǵa ǵana qatysty emes, oıyn órnegi solaı órilgen. Qazaqstandyqtar qamaý teri alynbaǵan sáıgúlikteı jyldamdyqtan da, taktıkadan da utylyp jatty. Sheshýshi úshinshi kezeńde Qazaqstannyń basqa, túlegen komandasyn kórdik. О́z alańynda júrgendeı erkin sezingen japondyqtardyń eki aıaǵyn bir etikke tyǵyp jiberdi. Kúshke basty. Áýeli Larısa Svırıdova, sosyn Zarına Týhtıeva gol saldy. Soǵa almaı qalǵandar qanshama. Esep 2:2. Overtaım. 5 mınót ishinde kim birinshi gol salsa, jeńis sonyki. Oıyn sońǵy mınótterde qazaqstandyqtardyń basymdyǵymen ótip, esep 3:2 bolyp aıaqtaldy.
Al ekinshi kezdesýde Qytaı quramasy Ońtústik Koreıa komandasyn 10:0 esebimen utyp, ekinshi márte jeńiske jetti. Qytaılyqtar arasynda qarsylastardyń qaqpasyna Rýı Sýn bes birdeı shaıba salyp, kózge tústi. Endi Qytaı kelesi oıynnan búgin Japonııaǵa qarsy ótkizedi. Al KHDR bolsa, Ońtústik Koreıa komandasymen kúsh synasady.
Baqtııar TAIJAN.
Almaty.