Elimizde ókpe dertinen óletinder sany 77 paıyzǵa azaıdy

ASTANA. 31 mamyr. Densaýlyq saqtaýdyń salasyndaǵy statıstıkalyq derekterge súıensek, sońǵy 10 jylda Qazaqstandaǵy týberkýlez aýyrýy 54,9 paıyzǵa, al ólim kórsetkishi 77,4 paıyzǵa tómendegen. Alaıda, medısınalyq mekemelerde osy dertke qatysty birqatar zań buzýshylyqtar anyqtaldy. Bul týraly Bas prokýratýranyń baspasóz qyzmetine silteme jasaǵan egemen.kz tilshisi habarlady. Prokýratýra qyzmetkerleri elimizdegi densaýlyq saqtaý salasydaǵy birqatar medısınalyq uıymdarǵa tekseris júrgizip, týberkýlez profılaktıkasy boıynsha atqarǵan sharalardy anyqtady. Prokýrorlardyń aıtýynsha, medısına mamandary statıstıka aqparatyn burmalaý, profılkatıkalyq is-sharalardyń tıisti deńgeıde uıymdastyrmaýy, sapasyz dárigerlik qyzmet kóstetý, naýqastardy erkinen tys emdeýdi qamtamasyz etpeý sekildi júıelerde zań buzýshylyqtar anyqtalǵan. «Almaty oblysy Talǵar aýdanyndaǵy ortalyq emhanasynda 78 emdelýshiniń flıýorografııasy oń nátıje kórsetkenimen, tolyqtaı tekserilmegen. Jalpy josparly flıýorografııalyq baqylaýdy ýaqtyly ótkizbeý jáne saqtyq sharalarynyń bolmaýy týberkýlezdi asqynǵan kezde anyqtaýǵa alyp keledi. Bul jekelegen jaǵdaılarda aýrý adamnyń densaýlyǵyna zııan keltiredi», – deıdi prokýrorlar. Sonymen qatar, prokýrorlar Qostanaı oblysyndaǵy Áýlıekól aýdanynyń ortalyq emhanasyna júrgizgen tekserý barysynda O esimdi azamat dárigerlerdiń salǵyrtyǵynan aýrýhanada qaıtys bolǵan. Ol týberkýlezge qarsy tekseristen ótkenimen dárigerler óz qyzmetin tıisti atqarmaı, oǵan nemquraıly qaraǵan. «Osy oqıǵa boıynsha sotqa deıingi tegeý júrgizilip jatyr. Jalpy tekserý nátıjesinde, týberkýlez aýyrýyna shaldyǵý kúdigi bar adamdardyń tekserýi ýaqtyly júrgizilmegen, tolyq teserilmegen jáne t.b. 1028 derek anyqtaldy. Kórsetilgen derekter saý adamdarǵa tikeleı qaýip tóndiredi», – deıdi prokýratýra qyzmetkerleri. Tańdaýly tekserýler nátıjesinde emdelýden bas tartyp, ońashalaýdy qajet etetin, eldi mekenderde júrip basqa adamdarǵa aýrýyn juqtyrý qaýpin tóndirip júrgen 327 naýqas anyqtaldy. Qoldanylǵan sharalarmen 259 naýqas emdelýge qaıtaryldy, qalǵandary izdestirilýde. Densaýlyq saqtaý jáne áleýmettik damý mınıstrligi zań buzýshylyqty jáne onyń sebepterin joıý týraly engizilgen usynysty qaraý nátıjesinde profılaktıkalyq jumystaǵy nemquraıdylyqty boldyrmaı, halyqtyń densaýlyǵyn qamtamasyz etýge baǵyttalǵan sharalar qabyldanýda. Talǵat Raıymbek. Derek, foto: Bas prokýratýranyń baspasóz qyzmeti.