Memleket basshysy Nursultan Nazarbaev Reseı Federasııasynyń Prezıdenti Vladımır Pýtınmen kezdesti, dep habarlady Qazaqstan Respýblıkasy Prezıdentiniń baspasóz qyzmeti.
Kezdesýde memleketter basshylary keń aýqymdy máselelerdi, atap aıtqanda, ekijaqty yntymaqtastyqtyń basymdyǵy bar baǵyttaryn, sondaı-aq, Eýrazııalyq ekonomıkalyq odaq aıasyndaǵy ózara is-qımyldyń jaı-kúıin talqylady.
Qazaqstan Prezıdenti Reseıdiń eń jaqyn kórshimiz, ekonomıkalyq jáne saıası turǵydan odaqtasymyz ári seriktesimiz ekenin, solaı bolyp qala beretinin atap ótti.
– Bizdiń birlese júrgizgen jumystarymyzdyń arqasynda TMD ómir súrip keledi, Eýrazııalyq ekonomıkalyq odaq quryldy. Kúrdeli halyqaralyq jaǵdaılarǵa qaramastan, ol búginde qyzmetin jalǵastyrýda. Máskeýde ótken Jeńis kúni merekesine shaqyrǵanyńyz úshin taǵy da rızashylyǵymdy bildiremin. Bıyl úlken merekeler bar – TMD-nyń qurylýynyń 25 jyldyǵy, sondaı-aq, EAEO-ǵa múshe memleketter táýelsizdiginiń mereıtoılary, Reseı kúni. Jalpy, bizdiń aldymyzda ShYU, TMD memleketteri basshylarynyń keńesi, Qazaqstan men Reseı óńiraralyq yntymaqtastyq forýmy, sondaı-aq, Peterbýrg halyqaralyq ekonomıkalyq forýmy aıasynda tyǵyz kezdesýler kestesi tur. Osyndaı kezdesýlerdiń kóptigi bizdiń elderimiz arasyndaǵy qarym-qatynastyń ózara senimdi sıpaty bar ekenin bildiredi. Talqylaýlar arqyly biz kez kelgen máseleni sheship kelemiz, bul yntymaqtastyǵymyzdy odan ári damytýǵa septigin tıgizedi, – dedi Memleket basshysy.
Sondaı-aq, V.Pýtın 9 mamyrda Máskeýge saparmen kelgeni úshin Nursultan Nazarbaevqa alǵys aıtty.
– Biz muny aıryqsha qarym-qatynasymyzdyń belgisi dep baǵalaımyz. Qazaqstan – biz úshin jaqyn seriktes jáne eń senimdi odaqtas. Aramyzda berik ekonomıkalyq qarym-qatynas ornyqqan. Buǵan deıingi jyldarda Qazaqstan ekonomıkasy jaqsy qarqyn alyp, onyń damýynyń irgeli negizi qalandy. Osynyń barlyǵy qazirgi qıyndyqtardy eńserýge múmkindik beredi. Eýrazııalyq ekonomıkalyq odaqtan biz eshqandaı «ǵajaıyptar» kútpeımiz, biraq ıntegrasııalyq ózara is-qımyl bizge qazirgi qıyndyqtardy jeńýge kómegin tıgizedi, – dedi Reseı Prezıdenti.
Sýretterdi túsirgender
S.BONDARENKO, B.OTARBAEV,
