Birtektilikti qalyptastyrýdyń úlgisi

Qazaqstan Prezıdenti janyndaǵy Ortalyq kommýnıkasııa­lar qyzmetinde «Qazaqstandyq biregeılik pen jalpyulttyq birlik sabaqtary» taqyrybynda brıfıng ótti. Sharaǵa qatysqan «Qazaq­stan Respýblıkasynyń Tuńǵysh Pre­zıdenti – Elbasy kitaphana­synyń» aǵa ǵylymı qyzmetkeri, fılo­sofııa ǵylymdarynyń dokto­ry, professor Ǵazız Tele­baev et­nosaralyq kelisimniń qazaq­standyq modeli týraly sóz qoz­ǵady. Onyń pikirinshe, qazirgi­deı jahandaný jaǵdaıynda etnos­aralyq qatynastar sala­syn­daǵy mundaı tabysty úlgi úlken sura­nysqa ıe bolýda. «Bul rette, qazaqstandyq etnos­aralyq toleranttylyq pen qo­ǵamdyq kelisim máselesi búgin­de álemniń kóptegen elinde mem­lekettik etnıkalyq saıasat mode­line engizilgen. Bul úlgi BUU-ǵa, kóptegen Eýropa jáne Azııa memleketterinde, TMD elderine usynyldy. Jalpy, biz birtektilikke tek etnosaralyq qatynastar jaǵynan ǵana qara­maýymyz kerek. Muny keńirek, tereńirek qarastyrǵanymyz jón. Sebebi, bul jerde ekonomıkalyq, áleýmettik máseleler de bar. Solardyń barlyǵyn birge, toptap qarastyrýymyz kerek. Al birtektilikti qalyptastyratyn tetikterge keler bolsaq, eń aldymen, ony balalardan, ıaǵnı bala tárbıesinen bastaý qajet. Máselen, Elbasynyń kitaphanasynda byltyrǵy jyldyń kúzinen bastap, oqýshylarǵa jáne stýdentterge dárister oqylyp keledi. Semınar: «Álemdi ózgertetin ıdeıalar» dep atalady. Onyń negizgi maqsaty – ba­la­larǵa Prezıdenttiń «100 naqty qadamyn» jetkizý, olar arqy­ly qoǵamǵa nasıhattaý. Biz, ásire­se, «100 naqty qadamdaǵy» tór­tinshi baǵytqa, ıaǵnı birtektilik pen birlikti qalyptastyrýǵa basa nazar aýdaramyz»,– dedi Ǵ.Telebaev. Al Qazaqstan Táýelsizdiginiń qazaqstandyq biregeılik pen pat­rıottyq sezimdi qalyptastyrýdaǵy róline toqtalǵan Eýrazııa ulttyq ýnıversıtetindegi QHA kafed­rasynyń meńgerýshisi Anatolıı Bashmakov QHA júrgizgen jumys­tardyń qorytyndylary týraly baıandap berdi. Sondaı-aq, ol elderdi damytýdaǵy ıdeologııalyq artyqshylyqtyń sheshýshi faktory – azamattyq, etnostyq jáne memlekettik biregeılik bolyp tabylatynyna basa nazar aýdardy. Brıfıngte sóz alǵan Qazaqstan Prezıdenti janyndaǵy Memlekettik basqarý akademııasy Ortalyq Azııa aımaǵyndaǵy etnosaralyq jáne konfessııaaralyq qarym-qaty­nastardy zertteý ortalyǵynyń jetekshisi Aıgúl Sádýaqasova memle­kettik saıasatty nyǵaıtý is-táji­rıbesi men qazaqstandyq biregeılik pen birliktiń negizgi kezeń­deri jáne perspektıvalary týraly sóz qozǵaı kele, qoǵam­nyń qazirgi damý jaǵdaıynda memlekettik biregeılik pen birlik máselesi erekshe ózektilikke ıe ekendigine toqtaldy. Bul túrli faktorlar men ınstıtýttardyń yqpal etý is-áreketiniń ózgerýine baılanysty bolatynyn tilge tıek etti. Onyń pikirinshe, bul máseledegi memlekettik saıasattyń negizgi baǵyttarynyń biri – etnosaıasat. «Sondyqtan, Qazaqstannyń polıetnostyq jáne polıkon­fessııalyq saıasaty úshin beıbit­shilik pen turaqtylyqty saqtaý, senim men qurmet atmosferasyn qurý, biryńǵaı ult qalyptastyrý – táýelsizdikti nyǵaıtýdyń negizi. Al qoǵamdyq qarym-qatynastarda qazaqstandyq biregeılik júıesin nyǵaıtýda, qoǵamdyq saıasat pen memlekettik basqarýda Qazaqstan halqy Assambleıasynyń róli mańyz­dy. Sebebi, 1995 jyldan bas­tap, QHA elimizdiń ulttyq qury­lys tetigin bekitýde qoǵamdyq-saıası alań re­tinde qarqyndy jumys atqa­ryp keledi», – dedi A. Sádýa­qasova. «Qazaqstan Respýblıkasynyń Tuńǵysh Prezıdenti – Elbasy kitaphanasynyń» jurtshylyqpen baılanys qyzmetiniń basshysy Oksana Loskýtova atalǵan mem­lekettik mekeme men Qazaqstan Respýblıkasynyń Tuńǵysh Pre­zıdenti – Elbasy Qory bas­pa jáne elektrondyq BAQ qyz­met­kerleri arasynda tarıhı oqıǵanyń qurmetine oraı úzdik materıalǵa «Táýelsiz Qazaqstan jáne Elbasy» taqyrybynda ashyq baıqaý jarııalaıtynyn aıtty, baıqaý qatysýshylaryna qoıylatyn talap-sharttarmen tanystyrdy. Sonymen qatar, ol Elbasynyń qazaqstandyq biregeılikti qalyptastyrý men jalpyulttyq birlikti nyǵaıtý saıasatyn iske asyrýdaǵy kitaphananyń qyzmetine toqtaldy. Láıla EDILQYZY, «Egemen Qazaqstan»