Sońymyzda qandaı iz qalady?

Aıdyń-kúnniń amanynda qyl­jıyp qulap jatqandardy, aıaq asty uıyqtap ketkenderdi kór­gende, ne oılaryńdy bilmeı dal bolasyń. Kúnderdiń kúninde qazaq­­standyqtardyń kópshiligi letar­gııalyq uıqyǵa ketip júrmese ne qylsyn?! Olaı deıtinimizdiń de jóni bar. Osydan birjarym jyldaı ýaqyt buryn Batys Qazaqstan oblysynyń Berezovka  aýylynda mektep  oqýshylary esinen aıyrylyp, qulap túskendigi týraly oqıǵa qalyń jurtty qobaljytqan edi. Árıne, olar keıin esin jıdy. Áıtse de, Úkimet ýlanǵan aýyldardyń turǵyndaryn jappaı  kóshirýge sheshim qabyldady. Berezovka aýylynan 1675, kórshiles Bestaý aýylynan 133 adam  Aqsaı qalasyna qonys aýdaratyn boldy. Sóıtse, eki aýyl da ataqty Qara­­­shyǵanaq gaz kenishine jaqyn ornalasqan kórinedi. Aıtpaqshy, Batys Qazaq­standaǵy Berezovka men Bastaý aýy­lynyń turǵyndary sálden keıin esin jıyp jatsa, Aqmola oblysynda  Kalachı men Krasnogorsk aýyldarynyń jurty aıaq asty uıqyǵa bas qoıatyndy shyǵardy. Bir shoshynarlyǵy,  turǵyndar kóshede kele jatyp-aq uıyqtap ketedi. Tipti, keıbireýlerdiń qalyń uıqyǵa ketkeni sonshalyq, eki-úsh kún boıy tuıaq serippeıtin kórinedi.  Tıesili oryndar  taǵy da uıqybastylyqtyń emin taba almaı, biraz áýre-sarsańǵa tústi. Kalachıdegi uıqynyń túpki tórkini aýylǵa jaqyn mańda orna­lasqan jabyq ýran kenishinen shyǵatyn kómirtegi qaldyqtaryna baılanysty eken. Kezinde ýran óndirilgen kenish búginde qaraýsyz qalǵan.  Qazir elimizdiń ońtústiginde sheteldikter óndirip jatqan ýran kenishteri erteńgi kúni osyndaı kúı keshpesine kim kepildik beredi? Qazir baqýatty ómir súrip jatqan Sozaq halqy bolashaqta  densaýlyǵynan zardap shegip júrmese bolǵany da. О́ıtkeni, esinen tanyp qalyp, birneshe kúnge «qalǵyp ketkenderdi» kórgende, bolashaǵymyzdyń qandaı bolaryn boljaýdyń ózi qıyn?! Álemde ýran óndirýden aldyńǵy qatardamyz dep urandatyp júrip, onyń qorshaǵan ortaǵa  ákeletin zardaby esten shyǵyp ketpegeı. Betpaqdaladaǵy kıikterdiń qynadaı qyrylýy, Kaspııdegi ıtbalyqtardyń aýyq-aýyq ajal qushýy jaı ǵana kezdeısoqtyq dep aıtýǵa bola ma? Qorshaǵan ortanyń qasiretin tartqandardy basqa jerge qonys­tandyrdy delik, sonymen bar másele sheshile me? Ekologııalyq talaptar jetkilikti deńgeıde oryndalmasa, jan-janýarlardyń qyrylǵany óz aldyna, halyqtyń  jappaı aýrýǵa shaldyǵýyna ákelip júrmeı me? Kim-kimniń de qarjysyn salyp, qazba baılyqty ıgergenine qarsylyq joq, árıne. Eń bastysy, qorshaǵan ortany búldirmeı, barlyǵyn talapqa saı atqaryp jatsa,  halyq ta, jan-janýarlar da alańsyz ómir keshedi ǵoı. Al ázirge olaı bolmaı tur. Osydan keıin baryp ınvestorlar ıgiligin kórgen óńirde qandaı iz qalady degen zańdy saýal týyndaıdy. ShOLÝShY men SÝRETShI