Kúımeniń kúıin keltirgen

Elimizdiń bas qalasynyń turǵyny Ánýar Shaımergenov kásiptiń kózin taba bilgen jigit. Ol garajynda túrli kúımeler jasap shyǵaryp, qalaǵa kelgen týrısterdi qydyrtady. Aıtýynsha, tek týrısterden ǵana emes, kásipkerlerden de kóp tabys túsedi eken. Alǵashqy kúımesin 2012 jyly qurap shyǵarǵan. Búginge deıin osyndaıdyń toǵyzyn jasapty. – Bul iske kirispes buryn jeke bıznesimdi bastaýym kerek boldy. Astanada jylqy ustaıtyn tanystarymyz bar. Oılana ke­le sándelgen arba jasaý týraly sheshimge toq­taldym. Sebebi, úı­lený toılarynda lımýzınder jaldap jatady ǵoı, kúımelerge de usynys túser degen oı keldi. Eń birinshisin otbasymmen birigip jasadyq. Internet betterinen túrli má­limetterdi qarap shyqtym. Biraq jaı ǵana qarap otyryp esh­nárseni túsinbeıdi ekensiń. «Sheshingen sýdan taıynbas» dep, eki bilegimdi sybana kirisip kettim. Alǵashqyda árıne, jibergen qatelikterim boldy. Biraq sol kem­shilikterimdi túzeı júrip, kóp nárseni úırendim. Kúımeniń túr-túrin jasap kórdik. Sońynda kóńi­limizden shyqqan nusqaǵa toq­taldyq. Osylaısha, ýaqyt óte kele osy istiń qyr-syryn jetik meń­gerip aldym, – dedi talantty jigit. Bir kúımeni daıyndaý úshin onyń kem degende eki aı ýaqyty ketedi eken. Alaı­da, «Eńbegine qaraı – ónbegi» degendeı, bir arbanyń quny shamamen úsh mıllıon teńgege satylady. Osyǵan deıin Almatydan, Balqashtan, Qaraǵandydan, Shym­kentten kelgen kásipkerlerge satylypty. Arasynda Reseıge de jiberilgeni bar eken. Daıyndaý barysynda ol kóbine aǵash pen metall paıdalanady. Al qazir «korol kúımesin» jasamaqshy bolyp júr. – Shyny kerek, bul úlken joba bolǵaly tur. Men ony satpaýym da múmkin. Ol osyǵan deıin daıyn­daǵan­darymnyń ishinde kóbirek ýaqyt alaıyn dep tur. Ishi-syrty da ózgesheleý bolary anyq. О́zim altyn tústes bolǵanyn qalap otyrmyn. Árıne, bul jóninde otbasymmen de aqyldasyp baryp sheshim qabyldaımyn, – dedi Ánýar Shaı­mergenov. Aıan ÁBDÝÁLI, «Egemen Qazaqstan»