Short-trek
Astanadaǵy jańadan salynǵan velotrek kesheninde short-trek jarysy odan ári jalǵasýda.
Keshe Azııa qurlyǵyndaǵy myqtylar sanalatyn Koreıa, Japonııa men Qytaı jáne solarmen ıyq tirestirip básekelesip jatqan Qazaqstan sportshylarynyń qatysýymen 500 metr qashyqtyqtaǵy jarystar ótti. Osy synda Qazaqstan quramasynda bas bapker Madyǵalı Qarsybekovtiń shákirtteri Darıa Volokıtına, Inna Sımonova, Aıdar Bekjanov, Artýr Sultanǵalıev syndy el namysyn halyqaralyq arenada qorǵap júrgen sportshylar aıdynǵa shyqty. Jarysta áıelder 500 metrde de sátti óner kórsetti. Nátıjesinde, 500 metrdi 43,964 sekóntte júgirip ótken qytaılyq sportshy Lıý Sıýhon chempıon atansa, kúmis júlde de onyń jerlesi Fan Kesınge buıyrdy. Onyń nátıjesi – 44,070 sekónt. Al úshinshi oryndy japon Sakaı Iýı jeńip aldy. Bul jarysta qazaqstandyq short-trekshilerge júldeli oryn buıyrmady. Al, erler arasynda eń jaqsy nátıjeni taǵy da qytaılyq Lıan Venhao kórsetti. Ol atalmysh qashyqtyqty 41,983 sekóntte júgirip ótip, qarsylastaryn qapyda qaldyrdy. Ekinshi jáne úshinshi oryndardy japondyq Fýdzımoto Takahıro men Sakadzýme Resýke jeńip aldy. Sóıtip, bul sport túrinen eki altyn júldeni birdeı qytaılyqtar enshiledi. 2 aqpanda Qazaqstan quramasy taǵy aıdynǵa shyǵady. Bas bapker M.Qarsybekovtiń aıtýynsha, osy joly onyń shákirtteri úzdikter qatarynan kóriný úshin baryn salady. Degenmen, qazir bizge quramynda Olımpıada chempıony bar Qytaı, qurlyqtyń azýly sportshylary sanalatyn Ońtústik Koreıa men Japonııa komandasymen kúsh synasý ońaı bolmaıtyny sózsiz. Azıadanyń jabylýyna deıin otandastarymyz olardyń aldyn orap alý úshin namysty qoldan bermeıdi. Juldyz BAIDILDA.
