Esildiń arǵy jaǵy, bergi jaǵy...

Bul ózi burynǵy-sońǵy óleń-jyrlarda aty kóp kezdesetin ózen. Keıbirin aıta keteıik. «Esildiń ar jaǵynan kórdim seni, Syrǵańdy qaıyq qylyp ótkiz meni».   «Esil tasyp barady jardan asyp, Qar jaýady jańbyrmen aralasyp. Sham sóndirip baraıyn degen basym, Uıyqtap ólip qalyppyn qara basyp».   «Qyzy ediń Ybyraıdyń Balqadısha, Esildi órleı bitken tal Qadısha».   Arqanyń egiz erkesindeı eki sý – Esil men Nuranyń quıylysqan tusynda Táýelsiz elimizdiń Astanasy eńse kóterdi. Biz Qazaqstannyń kindik qala­synda turatynymyzdy maqtan tutamyz. Tipti, keıde astanalyq «aýrýy­myz» ustap, aınalamyzǵa astam­sı qaraıtynymyzdy qaıtersiń. Munaraly Máskeýińizdi de kórgenbiz. Pańdanǵan Parıjińizge de  barǵanbyz. Tumandy Albıonnyń altyn tumaryndaı Londonyńyzǵa da atizin salǵanbyz. Árıne bári ádemi. Kósheleri kórikti. Ǵımarattary ǵajap. Tarıhı mura­jaılary tańǵajaıyp. Qarap­tan qarap qaıran qalasyń. Biraq, jasy jıyrmaǵa tolmaǵan bizdiń elordamyzdyń da ózindik erekshelikteri jeterlik emes pe?! Adamnyń basyn aınaldyrar damý serpininen bolar shahardyń bolmysy baıqalady. Dúnıejúziniń dúldúl sáýletshileri usynǵan utym­dy jobalardyń arqasynda kóz qýan­typ, kóńil súısinter kór­kem­dik kókjıegi kúnnen-kúnge keńeıe bereri sózsiz. Jalpy, jas ataý­ly­nyń aldyńǵylarmen salys­tyr­ǵanda bir artyqshylyǵy bar. Ol – bola­shaǵynyń áli alda ekendigi. Sondyq­tan Alashtyń qutty ordasy aldynan aq kún týýyn tileıik, aǵaıyn! Astanany qaq aıyryp Esil aǵady. Oń jaǵalaýynda – eski qala. Sol jaǵa­­laýynda – jaınaǵan jańa aýdan­dar. Jasyratyny joq, sol­jaǵalaý­lyq­tardyń bir tamyry artyq soǵady. Senbeseńiz, sóz­derine qulaq salyńyz. «Bárińiz biletin «Báıterektiń» túbinen úı aldyq». «Páterimizdiń terezesi Parlament jaqqa qaraǵan». Durys-aq. Alaıda, ana oń jaǵa­laýdaǵy bes qabatty beton úı tur­ǵyn­darynyń da saltanatty saraı­la­rda turý týraly qııaldaryn qı­syn­syz deı almaısyz ǵoı. Talpyn­sa, talaıynyń oı-armany oryndalady. Osy oraıda qala basshylyǵy ustanyp otyrǵan saıasat kókeıge qonady. Eski nysandardy ebin taýyp ysyryp, olardyń ornyna zamanaýı zańǵar qurylystar salynýda. Qarjylyq daǵdarys qurylys qarqynyn tejegenine qaramastan, júıeli jumystar júrgizilýde. Bul, árıne, jaqsylyqtyń belgisi. Qustyń qýaty – qos qanatynda. Onyń bireýi uzyn, bireýi qysqa bolsa, aspanda erkin samǵaı almaıdy. Endeshe, Esildiń arǵy-bergi betindegi elordamyzdyń eki qanaty teń bolǵanyna ne jetsin, shirkin! Biz aldaǵy ýaqyttarda tula boıy tutasqan sulýlyqtan ǵana turatyn, ajary aıdaı álemdi tamsandyratyn Astanany kórgimiz keledi. Talǵat BATYRHAN, «Egemen Qazaqstan»