Teketires

Muz aıdynyna qos Koreıanyń hokkeıshi qyzdary aıanbaı-aq qarjysty. Birinshi ke­zeńde Soltústik Koreıa quramasynyń sha­býyl­shysy O Chol Ok  9-shy mınótte esep ashqanymen, araǵa 1,5 mınót salyp ońtús­tik­tik qurbysy Lıý Kıý Sýn teńestirdi. Japonııa men Qytaı quramasyn 10:0, Qazaq­stan quramasynan 11:0 esebimen ońbaı uty­lyp, kóńilderi júdep júrgen qyzdardyń qýanǵany-aı! Bul úsh oıynda birinshi ret salǵan goly. Alaıda, oılaǵandary bolma­dy. Soltústiktiń qyzdary minezdi, ári sheberlikteri de joǵary eken. Úsh kezeń barysynda Lı En Sýn, Von  Chol Sýn, O Chol Ok, Ro Sýn Bok jáne Rıý Hon Mı esepti  6:1-ge jetkizdi. Qany, tegi bir bolsa da keshe ǵana bir birine zeńbirektiń oqpanyn qaratqan eki memleket quramalarynyń oıynyn tamashalaýǵa Halyqaralyq Olımpıada komıtetiniń tóraǵasy Jak Rogge zaıybymen keldi. Keshe  Qazaqstan qurama­syna soqqylar serııasy arqyly gol bergen Japonııa Qytaı quramasymen kúsh synas­ty. Qandarynda samýraılyq rýhy bar japon qyzdary jeńse de, jeńilse de bek­zattyq minezderinen tanbady. Komanda kapıtanynan bastap, jankúıerlerge izetpen bas ıgen Kúnshyǵys arýlary Aspan asty elinen kelgen hokkeıshi qurbylaryna tabandap urys saldy. Birinshi kezeń alma-kezek shabýylmen ótti. Dene turqy názikteý japondarǵa qy­taı­lyq qyzdar qara kúshti kóbirek qol­dandy. Onysy nátıje berdi. Gı Hýtıng gol soqty. 1:0.  Ekinshi kezeńde qytaı­lardyń tańdaǵan taktıkasy ózderine sor bolyp jabysty.  Eki ret eki birdeı oıynshysy 2 mınóttik aıypqa tartylyp, japon bestigi sansyratyp jiberdi. Qytaı qaqpashysy Han Dannı kóp shaıbany qaqty. Aspan asty eli  qorǵaýshylarynyń esteri shyqqany sonshalyq, qaqpashynyń artyna ótip ketip jatty. Japondar tamasha eki gol saldy. Aokı Kanae jáne Tamoko Sakagamı. Sheshýshi úshinshi kezeńge qytaılar qatty kiristi. Qyspaqqa aldy. Kúshke saldy. Japondar qysylǵanynan tártip buza bastady. Eki ret tórttikpen qaldy. Qarsylastary mundaı múmkinshilikti jibermedi. Eki ret gol soqty. 3:3. Overtaım. 5 mınót qosymsha ýaqyt belgilendi. Bul joly japondardyń joly boldy. №18 hokkeıshi Tamoko Sakagamı gol soǵyp, komandany alǵa shyǵardy. Esep 4:3, japondar paıdasynda. Qazaqstan, Qytaı jáne Japonııa quramalarynyń arasyndaǵy tartys taǵy da shıelenisti. Jarys jeńimpazy 3 aqpan kúni ǵana belgili bolady. Baqtııar TAIJAN.