Atyraýda para alǵan 4 memlekettik qyzmetker ustaldy

ATYRAÝ. 1 maýsym. Atyraý oblysy boıynsha memlekettik kirister departamentiniń 4 qyzmetkeri «para alý» kúdigimen qamaýǵa alyndy. Bul týraly atalǵan departamenttiń baspasóz qyzmetine silteme jasaǵan egemen.kz tilshisi habarlady. Oblystyq memlekettik kirister departamenti ishki qaýipsizdik basqarmasynyń basshysy Zańǵar Zańqanovtyń aıtýynsha, sotqa deıingi tergeý-tekserýdiń biryńǵaı tizilimine Qylmystyq kodeksiniń 366-baptyń  3-bóliminiń 2,4 tarmaqshalarynda kózelgen «para alý» faktisi tirkeldi. «Qylmystyq isti tergeý barysynda anyqtalǵandaı, naýryz-sáýir aılarynda atalǵan departamenttiń laýazymdy tulǵalary, dálirek aıtqanda, bólim basshysy qaramaǵyndaǵy qyzmetkerlerimen aldyn ala sóz baılasyp, ózine jáne basqa tulǵalarǵa paıda tabý maqsatymen qujattardy kedergisiz jáne tezdetip jasaqtaý úshin zańsyz aqshalaı syıaqy alyp otyrǵan. Demek, para berýshiniń paıdasy, ıaǵnı, ony qamqorlaý nemese enjarlyq tanytý úshin para alǵan. Oqıǵa ornyn qaraý barysynda 549 000 teńge jáne 900 AQSh dollary tabyldy. Kúdikti tórt tulǵa Atyraý qalalyq №2 sotynyń sheshimimen 2 aı merzimge qamaýǵa alyndy. Osy qylmystyq is boıynsha Atyraý oblystyq prokýratýrasynyń arnaıy prokýrorlar basqarmasynyń, memlekettik kirister departamentiniń jáne sybaılas jemqorlyqqa qarsy is-qımyl ulttyq bıýrosynyń qyzmetkerlerinen quralǵan vedomstvoaralyq jedel-tergý toby quryldy», – deıdi Zańǵar Zańqanov. Búgingi tańda sotqa deıingi tergeýdiń tolyqtaı jáne ádil bolýyn qamatamasyz maqsatynda barlyq qajetti jedel-tergeý sharalary júrgizilýde. Joldasbek Shópeǵul. Derek: Atyraý oblysy boıynsha memlekettik kirisiter departamenti. Foto: rgmedia.kz.