ORAL. 1 maýsym. Batys Qazaqstan oblysynyń Jańaqala aýdandyq aýrýhanasynda estigen adamdy esten tandyrarlyq ospadar oqıǵa oryn aldy. Operasııa ústelinde pasıent qanǵa bógip jatqanda, dálizde dárigerler bir-birlerimen tóbelesip ketti. Bul týraly «Nadejda» gazetiniń deregine silteme jasaǵan egemen.kz tilshisi habarlady.
Basylymnyń málimetinshe, jambasynan jaraqat alyp, qansyrap jatqan aýrý operasııa ústeline jatqyzylyp, otaǵa daıyndyq jasala bastaǵan kezde korıdorda hırırg pen anestezıolog bastaǵan dárigerler ózara áldenege kelise almaı, bir-birlerimen tóbelesip ketken. Olardyń jaǵa ustasýlary sol dálizde turǵan vıdeobaqylaýǵa túsip qalǵan.
Al rolıkti redaksııaǵa sol kezde óziniń ómirine arasha surap operasııa ústelinde qansyrap jatqan pasıent Radıslav Sabyrǵalıevtiń anasy ákelip bergen. О́kinishtisi, jigit sol jerde jantásilim etken. Ananyń aıtýynsha, onyń uly dárigerlerdiń óz mindetterin oryndap, jedel kómek kórsetý ornyna bir-birlerimen esep aıyrysyp, judyryq siltesip ketýleri saldarynan qaıtys bolǵan.
«Men dárigerlerdi, atap aıtqanda, bas dárigerdi, bas dárigerdiń orynbasaryn, anestezıologty, sol kúni kezekshilikte turǵan dáriger-narkologty jazalaýdy talap etemin. Olardyń bári meniń ulyma ýaqtyly járdem kórsetilmegeni úshin kináli», - deıdi qaıtys bolǵan jigittiń anasy Roza Imanǵalıeva.
Bul qaıǵyly oqıǵa ótken jyldyń jeltoqsan aıynda oryn alǵan. Eki jigit aýdan ortalyǵyna jaqyn mańǵa balyq aýlaýǵa barady. Edilsor kóline jaqyn mańdaǵy jeke menshik terrıtorııada belgisiz bireý olarǵa qarap oq atady. Sonyń biri 38 jastaǵy Radıslavtyń jambasyna tıedi.
Osydan keıin dosy jaraqat alǵan jigitti aýdan ortalyǵyndaǵy aýrýhanaǵa jetkizedi. Biraq ol emdeý ornyna jetkennen keıin qaıtys bolyp ketedi. Sodan bergi aralyqta marqumǵa oq atqan adam ustalyp, 8 jylǵa túrmege kesiledi. Al medıkter eshqandaı jaza almaıdy. Radıslavtyń týǵan-týystary onyń qazasyna óz qyzmetterine saldyr-salaq qaraǵan aýdandyq aýrýhana dárigerlerin kináli dep otyr.
Temir Qusaıyn.
Derek, foto, vıdeo: Nadejda.
https://youtu.be/GoZWTVHDsCE
