Bala júzinen kúlki ketpesin

Qazaqstan Respýblıkasynyń Memlekettik hatshysy Gúlshara Ábdiqalyqova Halyqaralyq balalardy qorǵaý kúnin merekeleýge arnalǵan is-sharalarǵa qatysty, dep habarlady Prezıdenttiń baspasóz qyzmeti G.Ábdiqalyqova Astana qa­lasynyń «Astanalyq» saıa­baǵynda ótken «Qosh keldiń, jaz!» atty balalar oıyn-saýyq baǵdarlamasyn tamashalady. Memlekettik hatshy balalarymyzdyń baqytty balalyq shaǵy, jaqsy bilim alýy, densaýlyqtarynyń myqty bo­lýy, úlkenderdiń yqylasy men qamqorlyǵyna bólenýi úshin Qazaqstan Prezıdenti táýel­siz­diktiń alǵashqy kúnderinen bastap barlyq jaǵdaıdy jasap kele jatqandyǵyn aıtty. Táýelsizdiktiń 25 jyly ishinde Qazaqstan eleýli jetistikterge qol jetkizdi. Zamanaýı mektepter, balabaqshalar, aýrýhanalar, sport­tyq ǵımarattar, balalar alańdary sa­lynýda, qaıyrym­dy­lyq qorlary men ózge de uıymdar qyz­met at­qarýda. Mysaly, bú­ginde As­ta­nada 40 myńǵa jýyq búl­dirshin bala­baq­shaǵa baryp, 117 myńnan astam oqýshy bilim alýda. Budan keıin Memlekettik hatshy shyǵarmashylyq úıirmeleriniń jumysymen tanysyp, «Biz úzdikti tańdaımyz!» atty balalar sýretteriniń kórmesinde, «Sheber qoldar» sheberhanasynda, sonymen qatar zııatkerlik jáne sporttyq oıyndar alańdarynda boldy. Sol kúni G.Ábdiqalyqova «Qa­zaq­stan» Ortalyq konsert zalynda balalarǵa arnalǵan «Bi Juldyzaı», «Tań Sholpan» jáne «Bala daýysy» respýblıkalyq konkýrstar jeńimpazdarynyń qatysýymen ótken «Biz – Uly Dala eliniń urpaqtarymyz!» atty gala-konsertke qatysty. Memlekettik hatshy egemen Qa­zaqstannyń alǵashqy qadam­darynyń biri balalardyń quqyq­taryn qorǵaýdy qamtamasyz etýmen baılanysty ekendigin atap ótti. 1994 jyly Qazaqstan BUU-nyń «Balanyń quqyqtary týraly» konvensııasyn ratıfıkasııalady. Bul konvensııaǵa qosylý memlekettiń álem qaýymdastyǵynyń óskeleń urpaqtyń quqyqtaryn qorǵaý sa­lasyndaǵy negizgi qujattary talaptaryna adaldyǵyn pash etti. Táýelsizdiktiń 25 jyly ishinde Qazaqstan adam quqyqtaryna qatys­ty 60-qa jýyq halyqaralyq qujat­ty ratıfıkasııalady, olar­dyń 15-ten astamy maqsatty túrde balalar quqyqtaryn qorǵaıdy. Qazaqstanda halyqaralyq stan­darttarǵa saı ınstıtýsıonaldy jáne zańnamalyq deńgeıde balalar quqyqtaryn qorǵaýdyń ulttyq modeli qalyptasty. El basshylyǵynyń saıası erik-jigeri men balalar quqyqtaryn qorǵaý jáne qamtamasyz etý isindegi memlekettik syndarly saıasattyń aıshyqty belgisi bolyp tabylatyn Bala quqyqtary jónindegi ýákil ınstıtýty quryldy. G.Ábdiqalyqova balalardyń ásemdik, shyǵarmashylyq jáne jasampazdyq áleminde ómir sú­rýine barlyq jaǵdaı jasalýy qajet ekenin atap ótti. Mem­lekettik hatshy: «Balalarymyzdy tárbıeleı otyryp, biz mem­le­ke­ti­mizdiń bolashaq áleýetin qalyp­tastyramyz, olar eldiń damýyna atsalysyp, Otanymyzdyń tabys­tary men jetistikterin arttyra­tyn bolady», – dedi. Sóziniń sońynda Memlekettik hatshy balalardyń quqyqtaryn qorǵaý máselelerinde bıliktiń barlyq tarmaqtaryn, azamattyq qoǵam men úkimettik emes jáne ha­lyq­aralyq uıymdardy ózara tyǵyz baılanysta bolýǵa shaqyrdy. Astanadaǵy Halyqaralyq balalardy qorǵaý kúnine arnalǵan negizgi merekelik is-sharalar «As­tanalyq» jáne Stýdenter saıa­baqtarynda, Qarjy mınıstrligi men Oqýshylar saraıy aldyndaǵy alańdarda ótti. Mereke kúni elimizdiń barlyq óńirlerindegi ortalyq alańdar, stadıondar, saıabaqtar, saraılar men oıyn-saýyq keshenderi balalarǵa jáne olardyń ata-analaryna esikterin aıqara ashty.