Ońaltý ortalyqtarynyń orny bólek

Keshe Ortalyq kommýnıkasııalar qyzmetinde «Qasıetti jol» qoǵamdyq qaıyrymdylyq qory ókilderiniń qatysýymen serebraldi sal aýrýyna shaldyqqan balalardyń quqyǵyn qorǵaýǵa arnalǵan «Qazaqstan jaqsy­lyq jasaıdy» atty brıfıng ótti. Joba aıasynda atalǵan qor el aımaqtarynda 14 ońaltý ortalyqtaryn ashýdy kózdep otyr. Búgingi tańda Qazaqstanda 13 433 bala sal aýrýyna shaldyqqan bolsa, olardyń 2 621-i (20%) 2015 jyly ońaltýdan tolyq ótti. Memlekettik medısınalyq mekemelerde em qabyldaý oryndarynyń tapshylyǵy saldarynan 10-nan astam bala jyldar boıy kezek kútýge májbúr bolǵan. «Balalaryn shetelde ońaltý úshin qarajat izdegen ata-analar bizge jıi habarlasyp jatady. Al saparlardy uıymdastyrýdyń qıyndyqtaryn aıtpaǵanda, naqty nátıjege qol jetkizý úshin jylyna kem degende 2-3 ret ońaltýdan ótý qajet. Astana qalasyndaǵy «Qasıetti jol» ońaltý ortalyǵyndaǵy tájirıbemiz boıynsha eger Qazaqstanda ońaltý qyzmetin álemdegi eń úzdik ádisteme boıynsha uıymdastyratyn bolsaq, shetelge shyǵýdyń qajettigi bolmaıdy dep nyq senimmen aıta alamyz. Biz jańadan paıda bolǵan medısınalyq jabdyqtardy udaıy nazarda ustap otyramyz. Sebebi, ortalyǵymyzda balalar úshin eń úzdik zamanaýı medısınalyq tehnologııalardyń bolǵanyn qalaımyz. Keńes berip, ortalyq qyzmetkerlerin oqytyp-úıretý úshin eń úzdik sheteldik mamandardy da únemi arnaıy shaqyratyn bolamyz. Bul, sózsiz, Qazaqstanda ońaltý qyzmetiniń damýyna oń yqpalyn tıgizedi», – dedi «Qasıetti jol» qoǵamdyq qaıyrymdylyq qorynyń dırektory Gúlmıra Ábeldınova. Astana qalasynda ońaltý ortalyǵyn ashý jobasy sátti júzege asyrylǵan soń, qor ekinshi ońaltý ortalyǵyn Shymkent qalasynda ashýǵa daıyndyq ústinde otyr. Qordyń statıstıkalyq málimetteri boıynsha, 2015 jyly OQO-da sal aýrýyna shaldyqqan 3000-nan asa bala tirkelgen, al ońaltý oryndarynyń sany nebári – 110. «Eger de árbir aımaqta ákimdiktiń qoldaýymen bir ońaltý ortalyǵy ashylar bolsa, myńdaǵan balanyń bolashaǵy úshin ózekti másele sheshiler edi. Olar erteńgi kúni aıaqqa turyp, mektepke bara alady, sóıtip, bilim alyp, qyzmetke ornalasyp, óz eliniń teń quqyly azamaty atana alady», – dedi qordyń ortaq quryltaıshysy Dınara Zákıeva. Sonymen qatar, qor adam kapıtalyn damytýǵa, bilimdi tereńdetý jáne dúnıejúziniń jetekshi mamandarymen tájirıbe almasýǵa erekshe mán beredi. «Adam resýrstaryna ınvestısııa salý» jobasy aıasynda Qazaqstan Respýblıkasynyń medısınalyq qyzmetkerleri úshin Ulybrıtanııa, Túrkııa, BAÁ jáne Reseıdiń jetekshi mamandarymen sheberlik-sabaqtary ótkizildi. Raýshan TÁÝIRHANQYZY, «Egemen Qazaqstan»