Joǵalǵan jigit

toǵyz jyldan keıin tabyldy Osydan on jyldaı buryn aıaq astynan joǵalyp ketken azamatty ata-anasy aman-esen taýyp, sheksiz qýanyp jatyr. Mundaı da bolady eken. Qaraǵandydan 57 sha­qyrym jerdegi Aqtaý ken­tindegi sement zaýytynda kúzetshi bolyp istep júrgen Meıirjan Qalıakparov 2007 jylǵy sáýir aıynyń sońynda zym-zııa joǵalyp ketken. Sol kezde onyń jasy 26-da edi. Jumysynan qaıtpaǵan jigitke ata-anasy kóp keshik­tirmeı izdeý salady. Belgili «Barmysyń, baý­yrym?», «Jdı menıa» telehabarlary arqyly da zar ıledi. Ja­qyndary men dostary aıaq jetken jerdiń bárine habarlandyrý ildi. Izdestirý esh nátıje bermegen soń, polısııa da sharasyzdyq tanytyp, atpaldaı azamatty iz-túzsiz ketkender sanatyna jatqyzyp edi. Súıinshi habar da oı­lamaǵan jerden jetti. Ja­qynda joǵalǵan jigittiń mektepte birge oqyǵan dos­tary bas qosa qalǵan eken. Sonda olardyń biri onyń joǵalyp ketkeni týraly habardy estip: «Joǵalǵany nesi, men ony ja­qynda ǵana Temirtaýdaǵy bir fırmadan kórdim», – dep qoıyp qalady. Osy habar jetisimen joǵalǵan jigittiń týǵandary irgedegi Temir­taýǵa jetip barady. Sóıtse, M.Qalıakparov shynymen de álgi joldasy aıtqan kásiporynda júr eken. Baıǵus jigitke ne bol­ǵanyn qaıdam, áıteýir, 26 jasyna deıingi ómiri jadynan óship qalǵan. Tipti, týǵan anasyn da tanymaı qalypty. Ne bolsa da jaqsy nárse emes, qudaı basqa bermesin deıtindeı jaıt. Qazir azamatty anasy árneni surap ózi de mazalamaıdy, ózgeniń de qazbalaǵanyn qalamaıdy. Oǵan qazir tynyshtyq kerek, ótkenin eske túsirip, qalypty ómir­ge qaı­taratyndaı jaǵdaı jasaý qajet. On eki múshesi aman tabyl­ǵanyn aıtyńyz. О́ńgesi ornyna keler... Qaırat ÁBILDINOV, «Egemen Qazaqstan» QARAǴANDY