Mobıldi shtab jumysqa kiristi

Aqtóbe – bolashaqta úlken aglo­merasııalyq ortalyq bolatyn qala. Sondyqtan da, qalanyń kelbeti kelgen-ketkendi súısindiretindeı kórikti de kórkem bolýy kerek. Bul baǵytta qala tazalyǵyn qalypty ustaý mańyzdy. Osy maqsatta ja­qynda oblys ortalyǵyn abattandyrý, kógaldandyrý jáne bezendirý boıynsha mobıldi shtab quryldy. Shtab quramyna kásipkerlik, sáýlet jáne qurylys, ishki ister, tótenshe jaǵdaılar bólimderiniń ókilderi, sonymen birge, qalalyq máslıhat depýtattary men qoǵamdyq keńes músheleri kirdi. Oǵan Aqtóbe qala­sy ákiminiń birinshi orynbasary Jan­dos Baıyrhanov tóraǵalyq etedi. Mobıldi shatab jumysqa kirisip te ketti. Shtab músheleri K.Nokın kóshesine reıd júrgizip, «MirCom», «West Oil», «BatysQazJármeńke», «Sultan» SÚ, «Ǵalym» meıramhanasy, birneshe tehnıkalyq qyzmet kórsetý beketteri men avtojýý ortalyqtarynyń aýmaqtaryn qarap shyqty. Saýda nysandarynyń ıelerine ondaǵan eskertý jasalyp, on kún merzimde olqylyqtardy qalpyna keltirýge tapsyrma berildi. «MirCom» JShS dırektory Ázız Adaıbekovke tal egip, kóshetterdi retke keltirý, sonymen birge, jasandy gúlderdiń ornyna gúlzarlarǵa tiri gúl egýge usynystar jasaldy. Ǵımarattyń mańdaıyndaǵy jarnamalyq bannerlerge qatysty da syn aıtyldy. Jarnama ornalastyrýǵa ruqsat tek bir jylǵa beriletini belgili, alaıda, atalǵan seriktestik mańyndaǵy bannerge qarap, kún jep, jelshaıǵan jarnamanyń birneshe jyl qatarynan ilinip turǵanyn ańǵarýǵa bolady. О́zge saýda nysandarynyń ókil­derine de jaryqtandyrý, ǵıma­rattardyń qasbetterin qalpyna keltirý, aýmaqtaryn kógaldandyrý usynyldy. Shtab qalany abattandyrý, kógaldandyrý jáne bezendirý boıynsha jyl boıy reıdter uıymdastyrady. Qala ákiminiń birinshi orynbasary Jandos Baıyr­hanovtyń aıtýynsha, tekserilgen árbir sharshy metr nazardan tys qalmaıdy. Mobıldi toptar qala kóshelerine kún saıyn shyǵyp, shaǵyn jáne orta bıznes nysandaryn, sondaı-aq, bankterdiń qaladaǵy fılıaldary men memlekettik mekemelerdi de tekserip otyrmaq. Satybaldy SÁÝIRBAI, «Egemen Qazaqstan» Aqtóbe oblysy