Syr boıynyń samboshylary – Azııa chempıony

Túrikmenstannyń Ashhabad qalasynda sambodan jas­óspi­rim­der, jastar jáne eresekter arasynda Azııa chempıonaty ótti. Osy synda otandastarymyz eki altyn, bir kúmis jáne eki qola medal jeńip aldy. Chempıonatta qurmet tu­ǵy­rynyń bıik satysyna kóterilgen bes sańlaǵymyzdyń barlyǵy Syr boıynyń sportshylary boldy. Bul básekede aýyr salmaqta Maqsat Isaqabylovqa (100 kg) teń keletin eshkim bolmady. Ol eresekter arasynda ótken beldesýde barlyq qarsylastarynyń jaýrynyn jerge tıgizip, Azııa chempıony atandy.  Qazaqstan quramasyndaǵy jastar jaǵy da bas júldeden tys qalmady. Onda sońǵy kezderi kópshiliktiń kózaıymyna aınalyp júrgen qyzymyz Jánııa Mahmudova (68 kg) jastar arasynda Azııa chempıo­ny ataǵyn jeńip aldy. Jánııa kilemde qarsylastarynan aılasyn asyryp, kópten beri kútken jeńisine jetti. Jarysta jasóspirimder arasynda ótken beldesýler de tartysty ótti. Bul synda qazaq balýandarynyń altyn medal alýǵa múmkindikteri bar edi. Mysaly, 60 kılo salmaqta kilemge shyǵyp júrgen Damır Ábdekov sońyna deıin chempıondyq ataqqa talasty. Onyń chempıonatqa jaqsy daıyndalyp kelgeni de kórinip turdy. Alaıda, bap pen baq degen qatar júrmese altyn júldeni alý ońaı emes.  Damır fınalda oılamaǵan jerden qarsylasyna ese jiberip aldy. Sóıtip, kúmis medaldi qanaǵat tutty. Qyzdar arasynda 75 kıloda Láılá Arystanbek úshinshi oryn aldy.  Bul qyzymyz úshin jartylaı fınalǵa shyǵyp, qola medaldi jeńip alý úlken jetistik. Sol sııaqty áıelder arasynda 56 kıloda synǵa túsken Jansaıa Murat úshinshi oryndy ıelendi. Jarysta ekeýi qola júldeger bolǵanymen jaqsy qyrynan kórindi. Dastan KENJALIN, «Egemen Qazaqstan»