Týǵan anasyn óltirip, sońynan ózin óltirmek boldy

TALDYQORǴAN. 2 maýsym. Almaty oblysynyń turǵyny týǵan anasyn óltirip, sońynan ózin de óltirip tastamaqshy boldy. Biraq ózi aman qaldy. Bul týraly oblystyq ishki ister departamenti baspasóz qyzmetiniń deregine súıengen egemen.kz tilshisi habarlady. Qazir kúdikti rolıseılerdiń kúzetýimen aýrýhanada jatyr. Kisi óltirý oqıǵasy 30 mamyr kúni Qapshaǵaı qalasyndaǵy kóp qabatty úılerdiń birindegi páterlerdiń birinde oryn aldy. Oqıǵa ornyna kelgen polıseıler pyshaq jaraqaty saldarynan qaıtys bolǵan egde áıeldiń denesi ústinen tústi. Shaqyrylǵan «jedel járdem» kóligi zardap shegýshiniń 36 jastaǵy ulyn aýrýhanaǵa alyp ketti. Sóıtse, onyń da alǵan pyshaq jaraqaty bar eken. «Oqıǵany jan-jaqty zertteýdiń barysynda zeınetker áıeldi ólim haline jetkizgen pyshaq jaraqatyn salǵan onyń uly ekeni anyqtaldy. Kisi ólimi ekeý ara oryn alǵan urys-keristiń saldarynan bolǵan. Anasyn óltirip alǵannan keıin er kisi óziniń ishine pyshaq salady. Biraq ólmeı aman qalǵan», - delingen habarlamada. Sotqa deıingi tergeý amaldaryn Qapshaǵaı aýdandyq ishki ister bólimi júrgizip jatyr. Nurbol Áldibaev. Derek: Almaty oblystyq ishki ister departamentiniń baspasóz qyzmeti.