Biz qashan qaǵazǵa qaramaı sóıleımiz?

Byltyrǵy kúzde oblys or­talyǵynda «Omby obly­synyń mádenı kúnderi» ótti. Jarty jurtymyzdyń ata­me­kenin tastamaı sol jaqta turyp jatqany bar, ombylyq aǵaı­yndarymyzdy kórip, tildesip qalý bar degendeı, bul sharalardan qalmaı baryp júrdik. Sońǵy qaıtar kúni om­bylyqtar Estaı aqyn atyn­daǵy mádenıet saraıynda konsert bermek bolyp, kórýge taǵy da bardyq. Konsert bas­talmas buryn Ombynyń meri Vıacheslav Dvorakovskııge sóz berildi. «Bizdiń eki oblys arasyndaǵy qarym-qaty­na­symyz 300 shaqyrym shekaradan áldeqaıda keń...», dep bastaǵan merdiń ekono­mıka, áleýmettik sala, óner, ǵylym salasy boıynsha sóılegen sózderine rıza bola­syń. Qolynda qaǵaz joq. Dvora­kovskıı sóılegen kezde kóp oqıtyndyǵy, kóp biletindigi, zııalylyǵy, parasattylyǵy, saıasatkerligi kórinip turdy. Sóılegen sózimen, jaıdary da qarapaıym keskin-kelbetimen, oılylyǵymen jurtty birden ózine qaratty. Zal da rıza bolyp súısinip tyńdap otyrdy. Dúrkiretip qol soqty. Únsiz oıǵa qalasyń. Biz­­diki­ler bolsa, qaǵazǵa jazyl­ǵandy oqyp beredi. Jasandy, jattan­dy sózderden jurt ta jalyq­ty. Jahandaný ákelgen spıchraıter degen kóp aıtyla bermeıtin bir sóz bar. Spıchraıter – kópshilik al­dynda sóıleıtin mátindi jazyp, daıyndap beretin maman. Osy spıchraıter qyzmeti qazir bizdiń usaq-túıek sheneýnikterge jaqsy boldy, aqshasy tóleýli,  qaǵazdan bas kótermeı-aq oqı beredi. Byltyr bizdiń oblysta sondaı bir jaı oryn aldy, álgi spıchraıter degenińiz ár jer-ár jer­de sóılengen sózderdi jınastyryp sheneýnikke jazyp bergen ǵoı, ol qaı­dan bilsin, ádettegideı qa­ǵazǵa jazǵandy zýyl­datyp oqyp shyǵady da, oı joq, oılaný joq kete beredi. Salystyryp qarap kórse, Astanada ma, Almatyda ma, áıteýir bir  jaq­ta sóı­lengen sóz eken. Oıdy oı qozǵaıdy. Jýyrda oblystyq más­lıhatta densaýlyq saq­taý salasyna qa­tys­ty otyrys ótti. Ob­lys ortalyǵyndaǵy on­ko­logııalyq dıspan­serdiń bas dárigeri Murat Sú­leı­menov minbede turyp, qaǵazǵa qaramaı, búkil máseleni jarty saǵat jatqa soqqanda, buryn mun­daıdy kórmegen de­pýtattaryńnyń aýyzdary ashylyp qal­dy. Minbede turǵan Sú­leımenovtiń sóılegenin kórip, qıt etse  daıyndap jazyp bergen qaǵazǵa qarap zýyldatatyn ákim­der, basqarma basshylary, sheneýnikter  oılansa, úırense ǵoı deısiń. Álgi Jer kodeksi týraly túsindiremiz dep shalǵaı aýyldarǵa barǵan depýtattardy kórdik. Qa­ǵazǵa jazyp alǵandaryn  aýyl­dyqtardyń aldynda, kózil­dirikterin kıip alyp, oqyp otyrǵan soń ne suraısyń. Qazaq tilinde, óz tilińde ótetin jıyndardy  saǵynasyń. Jınalystarda  qazaqy daýys, ún qosý degen olarǵa tańsyq. Aıtpaqshy, ótken aptada oblysqa germanııalyq «AWS Schafer Technologie GmbH» kompanııasynyń ókilderi keldi. Nemis kompanııasy mashına jasaý, qubyrlar jasap shyǵarý baǵytynda jumys jasaıdy eken. Bıyl Germanııadaǵy elimizdiń ekonomıka salasyna arnalǵan kúnderi aıasynda Pavlodar oblysy ákimdigi men «AWS Schafer Technologie GmbH» kompanııasy uzaq merzimdi strategııalyq áriptestik týraly memorandýmǵa qol qoıyp qaıtty. Maqsat –biz­diń óndiris oryndaryn ın­novasııalyq tehnologııa­larmen qamtamasyz etý. Oblys ákimdiginde bolǵan ekijaqty kezdesý barysynda nemis kom­panııasynyń bas dırektory Hýbertýs Engels óziniń búkil jumys barysyn, saparynyń má­nin, maqsatyn  qaǵazǵa qaramaı aýdarmashy arqyly  aıtty da berdi. Elý eldiń bir úlgisi. Úı­reneıik. Olar elderine bar­ǵanda bizdiń qaǵaz qarap oqıtyn sheneýnikter týraly ne oılaıdy eken deısiń.  Jalpy, bizdiń ákimdikke shetelden kim kelse de solaı, kádimgi iskerlik barysy, jumysbasty áńgimege shaqyryp betpe-bet sóı­leskendi jón kóredi. Biz­diń sheneýnikter sııaqty syqyrlap kıiný, shirený, men bastyqpyn degen pıǵyl olarda joq, kıgen kıimderi de, júris-tu­rystary da, sóılegen sózderi de qarapaıym, ór­kenıettilik mádenıet, bilimdilik degen osy. Biz qashan olarǵa jaqyndaıdy ekenbiz?..  Farıda BYQAI, «Egemen Qazaqstan» PAVLODAR