«Aq sháınek, sary samaýryn tursa qaınap...»

Semeıdiń oblystyq tarıhı-ólketaný mýzeıinde «Mýzeı túni» merekelik keshi ótti. Halyqaralyq mýzeıler kúnine jáne el Táýelsiz­diginiń 25 jyldyǵyna oraı ótken shara aıasynda «Aq sháınek, sary samaýryn, tursa qaınap...» atty kórme uıymdastyryldy. Kórmege HIH-HH ǵasyrlarǵa jatatyn pishini domalaq, qadaqsha, kýbok, sılındr tárizdi jıyrmadan astam samaýryn túrleri qoıyldy. Olardyń mýzeı qoryndaǵy úl­gileri sırek kezdesetindigimen erekshelenedi. Keı samaýrynnyń syrty túrli naqyshtarmen bederlengen. Biraq buıymdy shy­ǵarǵan zaýyttyń birqatar baıqaýlar júl­degeri ekenin bil­diretin bel­gilerdiń keıbiri samaý­rynnyń es­kirýinen anyq kórinbeıdi. Mýzeı qyzmetkerleriniń aıtýynsha, qazaq turmysyna, sondaı-aq, jaıma tabaq, kese, shaı qasyq sııaqty ydys túrleri de dendep engen. Reseıde samaýryn jasaý isi XVIII ǵasyrda jaqsy damyǵan. 1850 jyldary Týla qalasynda ǵana osy salada 28 fabrıka jumys istegen eken. Al atalǵan buıym qazaq jerine XIH ǵasyrdan bastap kele bastady. – Ata-babalarymyz samaýryn­dy molshylyqtyń belgisi sanaǵan. Bir qyzyǵy, temir tabyla ber­meıtindikten, ydys neǵurlym aýyr bolsa, soǵurlym qymbat baǵalanǵan. XVIII-HIH ǵasyrlarda shúmek ornatylǵan samaýryn óndiril­gen. Biz biletin qazirgi samaý­ryndar kezeń-kezeńimen je­tildirilip otyr­ǵan. Qazaq eli onyń otynmen qaınatylatyn túrin keńinen paıdalandy. Mýzeı qorynda atadan balaǵa mura bolyp kele jatqan kóne jádi­gerler, ulttyq buıymdar molynan saq­talǵan, – deıdi mýzeıdiń joǵary dá­rejeli mamany Gúlnur Tórtenova. Kórme barysynda mýzeı aýlasynda sary samaýrynǵa ot jaǵylyp, meımandarǵa ystyq shaı berildi. Dýman ANASh, «Egemen Qazaqstan» SEMEI