03 Maýsym, 2016

Perǵaýynnyń pyshaǵy kókten jerge qalaı jetti?

496 ret
kórsetildi
1 mın
oqý úshin
02-06-16-noj_faraonMysyrdyń ataqty bıleýshisi Týtanhamon perǵaýynnyń dáýren súrgen zamany adamzat damýynyń temir ǵasyrynan biraz buryn ótken edi. Soǵan qaramastan, zertteýshiler qazir onyń qabirinen osy qatty metall qospasy bar buıymdardy taýyp otyr. Italııa men Mysyrdyń ǵalymdary eldi bizdiń dáýirimizge deıingi 1332-1323 jyldary bılegen Týtanhamon perǵaýynmen birge kómilgen pyshaqty jan-jaqty zerttep shyqty. Nátıjesinde onyń temir-nıkel aralas meteorıt bólsheginen jasalǵany anyqtaldy. Pyshaq, shamasy, salqyn kórik arqyly soǵylǵan sııaqty. Osyǵan baılanysty Meteoritics and Planetary Science atty áıgili jýrnalda jarııalanǵan maqalada zertteýshilerdiń buǵan flýoressentti rentgen spektros­kopııasy tásilimen kóz jetkeni jazylǵan. Atalmysh jabdyq kómegimen pyshaq quramynyń 11 paıyzy nıkelden turatyny belgili bolǵan. Bul qarýdyń kádimgi temir kenin balqytý jolymen jasalmaǵanyn kórsetedi. Pyshaqta budan bólek, kobalttiń belgili bir mólsheri bar eken. Al joǵary  konsentratty kobalt áli qyzýy kúsheıe qoımaǵan erte Kún júıesi kezinde quralǵan. Sondyqtan Kúnniń qyzýy kúsheıgen kezde Jerde paıda bolǵan temir quramynda kobalttiń mólsheri óte az keledi. Oqymystylar Týtanhamon pyshaǵynyń hımııalyq quramyn Mysyr jerine túsken basqa belgili meteorıtter úlgilerimen de salystyryp kórgen. Sonda perǵaýyn pyshaǵy soǵylǵan bastapqy materıaldyń Kharga meteorıtin quraıtyn jynysqa qatty uqsaıtyny belgili bolǵan. Sóıtip, Týtanhamon pyshaǵynyń súıegi ǵaryshtan jetken alyp tastan qashalyp jasalǵany anyqtalyp otyr. Damır QOJAMQUL
Sońǵy jańalyqtar