Áke-sheshesi ormanǵa tastap ketken bala 6 kúnnen keıin tabyldy

ASTANA. 3 maýsym. Japonııada áke-sheshesi ormanǵa ádeıi tastap ketken bala 6 kúnnen keıin aman-esen tabyldy. Bul týraly lenta.ru saıtyna silteme jasaǵan egemen.kz tilshisi habarlady. Jeti jasar bala áke-sheshesi qaldyryp ketken jerden 5 shaqyrym qashyqtyqtaǵy áskerı qyzmetkerlerdiń jattyǵý alańynan tabylǵan. Málimetter boıynsha, Iаmato Tanýka esimdi búldirshin jergilikti ýaqyt boıynsha saǵat 07:50 kezinde soldattardyń úıshiginde otyrǵan. Áskerı qyzmetkerlerdiń biri balanyń kórpeniń ústinde jatqanyn málimdedi. Jaýyngerler qatty ashyqqan balany tamaq berip áldendirgen. RIA «Novostı» aqparat agenttigi búldirshin arnaıy tikushaqpen jergilikti aýrýhanalardyń birine jetkizilgenin habarlady. Aldyn ala málimetter boıynsha qazir jaǵdaıy birqalypty. Iаmato Tanýka úıshikke ata-anasy qaldyryp ketken kúni keshke jaqyn ormandaǵy soqpaq jolmen jetkenin aıtty. Japonııanyń qorǵanys kúshteri balany izdeýge 1 maýsym kúni jumyldyrylǵan. Operasııa jumystaryna 70-ten asa áskerı qyzmetker, 200 polıseı men eriktiler qatysqan. Olar Hokkaıdo aralyndaǵy ormandy tintip shyqty. Alǵashynda ata-anasy ótken senbi kúni, 28 mamyrda balanyń ózi joǵalyp ketkeni týraly málimet bergen. Alaıda, artynan kólik pen adamdarǵa tas laqtyrǵany úshin jaza retinde ormanǵa qaldyryp ketkenin moıyndady. Arada birneshe mınýt ótkennen keıin sol orynǵa qaıtyp kelgen ekeýi balany ornynan taba almaǵan. Bıliktegiler Tanýkanyń qaza tapqandyǵynan qaýiptengen. Onyń ústinde jeıdesi men shalbary ǵana bar bolatyn. Al ol jer túngi ýaqytta aýa temperatýrasy 7 gradýsqa deıin tómendeıdi. Buǵan qosymsha 31 mamyr kúni bul aımaqta tolassyz jańbyr jaýǵan. Aıan Ábdýálı. Derek: lenta.ru Foto: 24.kz.