Jaýapty shaq

Aqjaıyqta aktıv ótkizilip, onda Batys Qazaqstan obly­sy­nyń ákimi B.Izmuhambetov El­basy N.Á.Nazarbaevtyń  Qazaq­stan halqyna Joldaýynan týyndaıtyn mindetter jóninde baıandama jasady. – «Bolashaqtyń irgesin birge qalaımyz» degen taqyryppen barsha qazaqstandyqtarǵa jol­dan­ǵan Elbasynyń bıylǵy Jol­daýy syndarly, tarıhı ári óte jaýapty shaqta júrekterge jol tartty. Osynaý jyldyń bas­ty qujatynyń ár tarmaǵy men  ár joly bárimizge úlken jaýap­kershilikter júkteıdi. Bı­ylǵy Joldaýdyń basty erek­shelikteriniń biri – qarapaıym turǵyndardyń múddeleri men muń-muqtajdary jan-jaqty kó­rinis tabýynda. Búgingi basty min­det – Joldaýda qoıylǵan talaptardy iske asyrý. Mundaı jaǵdaıda yrǵalyp-jyrǵalyp júrýge ýaqyt joq. Ár kúnimiz sanaýly, – dep tujyrym jasady oblys basshysy. Odan ári ol Joldaýdy oblys jurtshylyǵy biraýyzdan tolyq qoldaıtynyn aıta kelip, ony iske asyrýdan týyndaıtyn mindetterdi jergilikti memlekettik organdarǵa  shegeleı tapsyrdy. Aktıvte Oral  qalasyndaǵy №1 emhananyń dáriger-endo­krı­nology Tamara Levchık densaýlyq saqtaý salasyna qatysty Elbasy qoıǵan talaptar údesinen shyǵý jónindegi óz pikirin ortaǵa sal­dy. Jergilikti jaǵdaıda sanı­tarlyq avıasııa qyzmeti men bas­tapqy medısınalyq kómek kór­se­týdi odan ári jaqsartý jóninde utymdy usynystar bildirdi. Son­daı-aq Batys Qazaqstan oblys­tyq aýyl sharýashylyǵy basqar­masy bastyǵynyń orynbasary Esmadııar Jumabaev  agrarlyq sektorda  Joldaýda qoıylǵan  ja­ńa mindetterge sáıkes  jańa­sha is-qımyl tanytý qajettigin aıt­ty. Budan soń aǵa urpaq ókil­deri atynan tarıhshy-ólke­ta­nýshy Jaısań Aqbaı  minberge kóteri­lip, táýelsizdiktiń  qadir-qasıeti, ony kózdiń qarashy­ǵyn­daı saq­tap qana qoımaı, odan ári ny­ǵaıta túsý jóninde aǵalyq ári aq­saqaldyq turǵyda tolymdy túı­in jasady. Táýel­sizdiktiń al­ǵashqy qazyǵyn qaqqan búgingi  Prezıdentimiz Nur­sultan Nazarbaev. Táýel­sizdik tarıhy Elbasy esimimen tyǵyz baılanysty, dep óz oıyn qorytty ólke ta­rıhynyń tamyrshysy. Aktıvke QR Prezıdenti Ákim­shiliginiń memlekettik ıns­pek­tory Altaı Kólginov qaty­syp, sóz sóıledi. Oblys  aktıvine qa­tysýshylar talqylanǵan másele­ge  oraı tıisti qarar qa­byldady. Temir QUSAIYN. Oral.