Kók baıraq 92 metrde jelbiregen kún

Memlekettik rámizder kúnine oraı Taldyqorǵanda Memlekettik tý erekshe tuǵyrǵa ornatylyp, 92 metr bıiktikte jelbiredi. Bul ólshemniń maǵynasy sol, 1992 jyly 4 maýsymda memlekettik rámizder qabyldanǵandyqtan, Kók baıraqtyń bıiktigi 92 metr­ge kóterilip tur. Al týdyń uzyndyǵy – 25 metr, eni – 12,5 metr. Saltanatty jıyndy Almaty oblysynyń ákimi Amandyq Batalov Elbasynyń «Biz Táýelsizdikke qol jetkizdik, endi sol Táýelsizdiktiń qasıetti belgilerin de erekshe qadirleýimiz kerek. Árbir azamat Qazaqstannyń Týyn, Eltańbasyn, Ánuranyn tumardaı qasıet tutýy tıis», – degen sózimen ashyp, Kók baıraqty Taldyqorǵan tórinde jelbiretti. Sonymen Almaty, Astana qalalaryndaǵydaı alyp tuǵyrly Tý Taldyqorǵan tórinde de kóterilip, jetisýlyqtar mereıin tasytty. Kún sanap sáni kirip, saltanaty tasyǵan Jetisýdyń kindik qalasynyń kireberisinde jelbiregen Tý jarysa boı kótergen on - on eki qabatty ǵımarattardan eńsesi áldeneshe ese asyp turǵany kórgen jandy súısintip, atyna zaty saı ekendigin aıqyn ańǵartady. Nurbol ÁLDIBAEV, «Egemen Qazaqstan» TALDYQORǴAN