Qasterleý – borysh, nasıhattaý – mindet

Memlekettik hatshy Gúlshara Ábdiqalyqovanyń tóraıymdyǵymen búgin atap ótiletin Memlekettik rámizder kúnine oraı Memlekettik rámizder jónindegi respýblıkalyq komıssııanyń kezekti otyrysy ótti. Jıynda Ishki ister mınıstrliginiń, sondaı-aq, Almaty, Jambyl, Batys Qazaqstan oblystary ákimdikteriniń memlekettik rámizderdi paıdalaný jáne nasıhattaý jónindegi jumystary týraly esepteri tyńdaldy. Komıssııa músheleriniń tarapynan atalǵan ortalyq jáne jergilikti memlekettik organdardyń jumysyna jan-jaqty taldaý jasaldy. Otyrys barysynda Mem­le­ket­tik hatshy Qazaqstan Respýb­lı­kasy Prezıdentiniń Jarly­ǵy­men bekitilgen Táýelsiz­digimizdiń 25 jyldyǵyn merekeleý tu­jy­rymdamasyna sáıkes, Mem­le­kettik rámizder kúni «Maý­sym – Memlekettik rámizder» taqy­ryptyq aıynyń negizgi qoǵamdyq-saıası oqıǵasy bolyp sanalatynyn jetkizdi. Sondaı-aq, jıynda Memlekettik rámizder kúnine ar­nalǵan is-sharalar Qazaqstan Respýblıkasy Táýelsizdiginiń 25 jyldyǵyn merekeleý aıasyndaǵy keshendi aqparattyq-ımıdjdik jumystardyń bir bóligi bolýy tıis ekendigi aıqyndaldy. «Bıylǵy jyldyń mamyr aıyn­da Elbasynyń Jarlyǵymen Táýelsizdigimizdiń 25 jyldyǵyna arnaıy Tujyrymdama bekitilgen edi. Osyǵan baılanysty jumys jospary qabyldandy. Iаǵnı, atalǵan Tujyrymdama men ju­mys jospary boıynsha maýsym aıy rámizder aıy sanalady. Sondyqtan, osy aıda biz mem­le­kettik rámizderdi tereń nasıhattap, óz jumysymyzdy jan-jaqty kórsetýimiz kerek. О́tken jyly nátıjeli jumystar júrgizildi. «100 naqty qadam» boıynsha «Memlekettik rámizder týraly» Konstıtýsııalyq zańǵa tıisti ózgerister engizildi. Osyǵan baılanysty normatıvtik aktilerge de ózgerister engizildi. Eki jylǵa jos­par qabyldandy. Endigi kezekte biz ári qaraı da jumys isteýimiz kerek», – dedi G.Ábdiqalyqova. Bul kúni ýákiletti memlekettik organdardyń basshylary mem­lekettik rámizder týraly zańna­ma­lardyń buzylýyna jol bermeý, onyń ishinde únemi baqylaýdy qamtamasyz etý, quqyqtyq qoldaný tájirıbesin jańǵyrtý, sonymen qatar, memlekettik rámizderdi qoldaný jáne nasıhattaý salasyna baqylaýdy kúsheıtý máselesine nazar aýdardy. Otyrys sońynda naqty tapsyrmalar men usynystar berildi. Al jıyn aıasynda jýrnalıs­terge bergen suhbatynda senator Aqan Bıjanov bylaı dedi: «4 maýsym Elbasynyń Jarlyǵyna sáıkes, Memlekettik rámizder kúni dep atalyp júr. Bul kúnniń memleketimiz úshin orny erekshe. Onyń sebebi, rámizderimizdiń, ásirese, jastardy otansúıgishtikke, patrıotızmge tárbıeleýde mańyzy zor. Sondyqtan, olardy qorǵaý men qasterleý baǵytyndaǵy is-sharalardy uıymdastyrý úshin arnaıy respýblıkalyq komıssııa aýqymdy jumystar atqaryp keledi. Komıssııada memlekettik, jergilikti ákimshilik organdardyń osy baǵytta qandaı jumystar júrgizip jatqandyǵy jónindegi esepteri tyńdalyp, nátıjesi shyǵarylady, tıisti sharalar qoldanylady. Biraq, bul másele memlekettik organdardyń ǵana quzyretinde turýy tıis dep aıtýǵa bolmaıdy. Sebebi, Konstıtýsııanyń 34-baby boıynsha, memlekettik rámizderdiń qundylyqtaryn qasterleý – azamattarymyzdyń konstıtýsııalyq mindeti. Demek, árbir azamat rámizderimizdi qorǵap, qasterlep, jastar arasynda jıi nasıhattap otyrýy kerek», – dedi. Sondaı-aq, ol mundaı jumystardy júrgizýde halyqaralyq tájirıbege de súıený qajettigin alǵa tartty. Memlekettik rámizder kóptegen qazaqstandyqtyń jeńisimen, jetistigimen tikeleı baılanysty. Bir ǵana derek keltireıik. Máselen, búgingi kúnge deıin túrli deńgeıdegi halyqaralyq jarystarda, olımpıa­dalarda, dúnıejúziniń bylaıǵy jurt bara bermeıtin jerlerinde, máselen, bıik taýlardyń shyńynda, ǵaryshta Qazaqstan Týy 4 myń márte jelbiregen eken. Endeshe, osyndaı ulttyq qundylyqtardy qasterleý – árbir ultjandy azamattyń qasıetti boryshy. Láıla EDILQYZY, «Egemen Qazaqstan»