«Buzyq» burshaq

Bıyl Mańǵystaý óńirinde kún jańbyrly boldy. Tipti, jańbyr sońy iri burshaqqa ulasty deýge bolady.  Mańǵystaý aýdany aýma­ǵyndaǵy temirjol boıynda nóser jaýyn saldarynan «Almaty – Mańǵyshlaq» jolaýshylar poıyzy bógelse, Saı-О́tes aýylynda úlkendigi taýyqtyń jumyrt­qasyndaı burshaq jaýǵan. Máseleniń mán-jaıyn anyqtamaq bolyp, aýyl turǵyndarymen telefon arqyly tildeskenimizde, iri burshaqtar úılerdiń shatyrlary men terezelerin, kólikterdiń áınekterin tesip, syndyrǵan. Aýyl turǵyndary satyr-sutyr etken burshaq jaýyny saldarynan 2-3 saǵat boıy jaryqty sóndirip, úıden shyqpaı otyrýǵa májbúr bolǵan. Jazdyń alǵashqy kúnderiniń biri oıran-topyr etken burshaqtyń lańyn jurt ár saqqa júgirtip jorýda. Biri – adamdardyń nıetine qaraı kóringen eskertý dese, ekinshileri tabıǵattyń adamzat túsine bermeıtin tosyn minezderiniń biri dep baǵalaýda. Gúlaıym ShYNTEMIRQYZY, «Egemen Qazaqstan» Mańǵystaý oblysy