Fýtboldan Amerıka Kýbogy bastaldy

ASTANA. 4 maýsym. Búgin AQSh-ta fýtboldan Amerıka Kýbogy týrnıri bastaldy. Bul týraly egemen.kz tilshisi habarlady. Bıylǵy týrnırge 16 eldiń ulttyq qurama komandalary qatysýda. Komandalar 4 topqa bólingen. A tobynda AQSh, Kolýmbııa, Kosta-Rıka, Paragvaı, B tobynda Brazılııa, Ekvador, Perý, Gaıtı quramalary oınasa, C tobynda Ýrýgvaı, Meksıka, Venesýela, Iаmaıka, D tobynda Argentına, Chılı, Bolıvııa, Panama komandalary óner kórsetedi. Búgin Kolýmbııa men AQSh arasynda týrnırdiń alǵashqy matchy ótti. Kezdesýde Ońtústik Amerıka komandasy alań ıelerin 2:0 esebimen utty. Erteń Kosta-Rıka men Paragvaı, Brazılııa men Ekvador, Gaıtı men Perý quramalary kezdesedi. Osy tórt topta alǵashqy eki oryndy alǵan komandalar ¼ fınalǵa shyǵady. Shırek fınaldyq oıyndar 16-18 maýsym kúnderi ótedi. Al týrnırdiń fınaly 27 maýsymda Nıý-Djersı shtatynyń Ist-Raterford qalasynda bolady. Amerıka Kýbogy (Copa América) - Ońtústik Amerıka fýtbol konfederasııasynyń (KONMEBOL) aıasynda ótkiziletin týrnır. Ol alǵash ret 1910 jyly ótkizilgen bolatyn. Biraq ol KONMEBOL qurylǵanǵa deıin ótken soń, resmı túrde mártebe alǵan joq. Sondyqtan jarys resmı túrde atalǵan uıym qurylǵannan keıin 1916 jyldan beri ótkizilip keledi dep sanalady. Keıinirek týrnır ulttyq quramalar arasyndaǵy Ońtústik Amerıka chempıonaty dep ataldy (Campeonato Sudamericano de Selecciones). Amerıka Kýbogy álemdegi fýtbol chempıonattarynyń arasyndaǵy ejelgisi. Ol Eýropa chempıonatynan 44 jyl buryn ótkizile bastaǵan. Týrnırge 1975 – 1993 jyldary Ońtústik Amerıkanyń 10 komandasy qatysqan. Oǵan deıin ár jyldary 4 – 8 eldiń ulttyq quramalary kúsh synasqan. 1993 jyly dodaǵa Soltústik jáne Ortalyq Amerıkanyń eki quramasy qosyldy. Al bıylǵy synda qurlyqtyq chempıonatqa 16 komanda qatysýda. Olardyń arasynda Soltústik jáne Ortalyq Amerıkanyń AQSh, Meksıka, Kosta-Rıka, Gaıtı, Panama men Iаmaıka elderi bar. Amerıka Kýbogy Eýropa chempıonaty sııaqty tórt jylda bir ret ótkizilmeıdi. Ol eki jylda bir ret, úsh jylda nemese tórt jylda bir ret ótkizýlýi múmkin. Iаǵnı, týrnırdi ótkizýde turaqtylyq joq. Mysaly, sońǵy chempıonat byltyr Chılıde ótse, onyń aldyndaǵy týrnır 2011 jyly Argentınada bolǵan. Chempıonatty eń kóp ótkizgen el – Argentına. Bul memlekette 8 ret Amerıka Kýbogynyń jalaýy jelbiregen. Ýrýgvaı 7 ret, Chılı men Perý 6 ret ótkizse, Brazılııada 4 ret, Ekvadorda 3 ret, Bolıvııada 2 ret bolǵan. Paragvaı, Venesýela men Kolýmbııada bir ret qana chempıonat ótken. Al bıylǵy doda Soltústik jáne Ortalyq Amerıka qurlyǵynda alǵash ret ótip jatyr. 1916 jyldan qazirgi kúnge deıin Ýrýgvaı 15 ret kýboktyń ıegeri atanǵan. Argentına 14 ret, Brazılııa 8  ret qana qurlyqtyń chempıony bolǵan. Sol sııaqty Paragvaı men Perýdiń ulttyq quramalary 2 retten kýbokty basynan asyrsa, Chılı, Kolýmbııa men Bolıvııa bir ret chempıon atanǵan. Al osy eldermen ıyq teńestirip básekelese alatyn Venesýela, Ekvador, Meksıka, AQSh sııaqty quramalarǵa kýbok múldem buıyrmaı keledi. Múmkin, bıylǵy básekede Amerıka Qurama Shtattary men Meksıka ekeýiniń bireýi júldeli orynǵa talasyp  qalar. Aıtpaqshy, Meksıka týrnırdiń eki ret kúmis júldegeri, úsh ret qola medalısi bolǵan. Kelesi týrnır 2019 jyly Brazılııada, odan keıin 2023 jyly Ekvadorda  ótedi. Dastan Kenjalın. Derek, foto: egemen.kz