Aýyr atletıka federasııasy málimdeme jasady

ASTANA. 4 maýsym. Qazaqstan Aýyr atletıka federasııasy respýblıka sportshylarynyń dopıng-tekserisine baılanysty málimdeme jasady. Bul týraly sports.kz aqparyna súıengen egemen.kz tilshisi habarlady. Búgingi kúni Qazaqstan Ulttyq olımpııalyq komıetinen alynǵan málimetke qaraǵanda, 2008 jyly Beıjiń jáne 2012 jyly London Olımpııalyq oıyndaryna qatysqan qazaqstandyq bes sportshy «B» dopıng-tekserisiniń qosymsha zertteýlerinen ótip jatyr. «Buqaralyq aqparat quraldarynda bizdiń sportshylarymyz týraly jarııalanyp jatqan ártúrli aqparlarǵa qatysty mynany málimdeımiz: Halyqaralyq Aýyr atletıka federasııasynan, Halyqaralyq Olımpııalyq komıtetten (HOK) Qazaqstan Aýyr atletıka federasııasy tarapyna bizdiń sportshylarymyzdyń tártiptik sharalarǵa tartylǵandaryn, dıskvalıfıkasııaǵa ushyraǵandaryn, sporttyq jarystardan alastatylǵandaryn bildiretin áldeqandaı bir málimet kelip túsken joq», – delingen málimdemede. «Qazaqstan Aýyr atletıka federasııasy proseske qatysýshy tarap bolyp tabylmaıdy. Prosess tarapy retinde Halyqaralyq Olımpııalyq komıtet pen Qazaqstan Ulttyq olımpııalyq komıteti jumys jasaýda. Osyǵan baılanysty zertteýdiń nátıjeleri jónindegi barlyq aqparat Qazaqstan Ulttyq olımpııalyq komıtetine keledi», – delingen mátinde budan ári. Málimdemede qazirgi tańda Qazaqstan aýyr atletıka quramasynyń belgilengen kúntizbelik josparǵa sáıkes, sporttyq-jattyǵý jumystaryn jalǵastyryp jatqany aıtylady. Bul kúnderi Qazaqstan Respýblıkasy Ulttyq olımpııalyq komıtetiniń ókilderi Lozannada (Shveısarııa) júr. «Budan arǵy aqparat pen prosestiń búge-shigesi olardyń kelip túsýlerine qaraı berilip turady», – dep málim etedi Aýyr atletıka federasııasy. Talǵat Raıymbek. Derek, foto: sports.kz.