Bishkek mańynda granata jarylyp, balalar zardap shekti

ASTANA. 6 maýsym. Keshe, senbi kúni Qyrǵyzstan astanasy – Bishkek qalasynyń mańynda granata jarylyp, bes adam zardap shkti. Olardyń úsheýi balalar bolsa, bir búldirshin aýrýhananyń jansaqtaý bólimine tústi. Bul týraly «Sputnik Kyrgyzstan» aqparyna súıengen egemen.kz tilshisi habarlady. Shý oblysy, Alamadýn aýdany, Prıgorodnoe selosynda oryn alǵan bul oqys oqıǵanyń bolý sebebin ishki ister bóliminiń qyzmetkerleri tekserýge kiristi. «Senbi kúni shamamen saǵat 12 kezinde mılısııa bólimine Prıgorodnoe aıylyndaǵy maı quıý stansasynda jarylys bolǵany týraly dabyl tústi. Oqıǵa ornyna barǵan jedel-izdestirý toby jarylys belgilerin tapqan joq, alaıda, basqa jerde – kolbasa sehynyń ishinde granata jarylǵanyn anyqtady», – delingen habarlamada. Aldyn ala boljam boıynsha, jarylys metall óńdeý sehynyń qurylysy úshin daıyndyq jumystary júrip jatqan jerde oryn alǵan. Osynda jumys isteıtinder ózderi taýyp alǵan shýly granatany qoımaǵa qoıady. Ony Jalal-Abad oblysy, Sozaq aýdanyn 1984 jyly týǵan A. N. degen jumysshy jigit qolyna alyp, oınap otyrǵanynda jaryp alady. Ol jarylǵysh qarýdiń chegin baıqamaı sýyryp alady. Qazir Shý aýdandyq ishki ister bóliminiń qyzmetkerleri jarylǵysh qondyrǵynyń shyqqan tegi men túrin anyqtap jatyr. Osyǵan baılanysty sot-ballıstıkalyq jáne jarylys-tehnıkalyq saraptamasy taǵaıyndaldy. Bolǵan oqıǵanyń sebebin anyqtaý jumysy jalǵasýda. Talǵat Raıymbek. Derek, foto: Sputnik Kyrgyzstan.