Qostanaıda «Mereıli otbasy» baıqaýy jeńimpazyn anyqtady

QOSTANAI. 5 mamyr. Qostanaıda bıyl «Mereıli otbasy» baıqaýy úshinshi ret ótkizildi. Solodovtar otbasy endi respýblıkalyq baıqaýda qostanaılyqtar namysyn qorǵaıtyn bolady. Bul týraly egemen.kz tilshisi habarlady. Baıqaý barlyq jerdegi sekildi úsh atalymmen ótti. Osy úsh atalym boıynsha aýdandar men qalalarda 172 otbasy óziniń baǵyn synap kórýge usynys bergen bolatyn. Solardyń arasynan 20 otbasy oblystyq baıqaýǵa qatysty. Aldymen «О́negeli otbasy» atalymy boıynsha Taran aýdanynan úsh qyz, eki ul tárbıelep otyrǵan Marat pen Gúlsim Shońǵalovtar otbasy jeńimpaz atandy.Olarǵa arnaıy dıplom men 150 myń teńge tabys etildi. «Parasatty otbasy» atalymy boıynsha Jangeldın aýdanynyń turǵyny, bes bala tárbıelep ósirgen Beıbit pen Qapýza Júsipbekovterdiń otbasy jeńiske jetti.Olarǵa da dıplom men turmystyq tehnıka alýy úshin 150 myń teńge tabystaldy. Al «Mereıli otbasy» atalymynda Qostanaı qalasynda turatyn Grıgorıı men Fánııa Solodovtardyń mereıi ústem boldy. Orys Grıgorıı men qazaq qyzy Fánııa osydan 56 jyl buryn tanysyp, shańyraq kótergen edi. Olar eki bala tárbıeledi. Qazir olardyń shańyraǵynda tórtinshi urpaq ósip jatyr, Solodovtar shóberesin súıip otyr. Solodovtar áýletinde 49 nagrada, kóptegen alǵys hattar saqtaýly, otlardyń jalpy eńbek ótili 195 jylǵa jetipti. Bes jyl buryn Grıgorıı aqsaql men Fánııa apamyz altyn toıyn toılady. Solodovtardyń uly Valerıı Solodov: «Ata-anam - meniń úlgim, maqtanyshym. Otbasynda bereke bolsa, memleketimizde de tártip, baılyq bolady», – dedi. Solodovtarǵa dıplom men 300 myń teńge syılyq tartý etildi. Endi bul otbasy respýblıkalyq «Mereıli otbasy» baıqaýyna Qostanaı oblysy atynan qatysatyn bolady. Názıra Járimbetova. Derek, foto: egemen.kz.