Astana men Almatyda VII Qysqy Azııa oıyndarynyń jarystary ótip jatyr
OTANDASTAR OLJASY
Astanada alaýy tutanǵan Aq Azıadanyń jarystary qos qalamyzda dúrildep ótip jatyr. Keshe keshkisin elorda jurtshylyǵy men qala qonaqtary «Qazaqstan» sport saraıynda shaıbaly hokkeıden erler arasyndaǵy Qazaqstan men Qytaı qurama komandalary arasyndaǵy kezdesýdi tamashalady. Otandastarymyz qarsylastaryn 14:1 esebimen oısyrata utyp, jankúıerlerge tamasha jeńis syılady. Qysqy Azıadanyń aıasyndaǵy bul hokkeı matchyna Elbasy Nursultan Nazarbaev keldi. Patrıotızmdi kúsheıtip, adamdy rýhtandyratyn nárse iri sporttyq jarystarda olja salý ekeni belgili. Al sondaı dúbirli doda óz jerińde ótip jatsa she. Onda onyń salmaǵy tipten arta túspek. Elimizde baıraǵy kóterilgen Qysqy Azııa oıyndaryndaǵy árbir jeńis elge, jerge degen otanshyldyq rýhyn tipten kótere túserine kúmán joq. Sonyń ishinde qysqy oıyndardyń patshasy sanalatyn shaıbaly hokkeıdiń orny tipten erekshe. Sport janashyrlary arasynda áldeqashan moıyndalǵan bul oıynnyń jankúıerleri kóp bolatyny sondyqtan zańdylyq ta. Munyń dálelin alystan izdemeı-aq, joǵaryda atalǵan kezdesýge kelgen ıin tiresken jurtshylyqty aıtsaq ta jetip jatyr. Endi oıyn barysyna keleıik. Kezdesýdiń alǵashqy kezeńinen ulttyq qurama qarqyndy shabýyldarymen jankúıerlerin jelpindirýmen boldy. Oıynnyń alǵashqy úshinshi mınótinde-aq Vadım Krasnoslobodsev alǵashqy shaıbany qonaqtar qaqpasyna dál baǵyttasa, onyń komandalasy Roman Starchenko kóp uzamaı ekinshi shaıbanyń avtory atandy. Bul jeńisti jol alǵashqy aınalymda esepti 4:0-ge jetkizýmen aıaqtaldy. Evgenıı Rymarev pen Alekseı Vasılchenkonyń soqqan qos shaıbasy osy kezeńdi qorytyndylady. Ekinshi aınalymda qonaqtar shıraq qımyldaýǵa baryn sala kirisip ketti. Olardyń osylaı oıyn órnegin kórsetýi jerlesterimizge osy kezeńniń 10 mınóti ótkenshe shaıba salýǵa múmkindik bermedi. Qaqpa aldynda qarbalas shabýyldar oryn aldy osy tusta. Qyzyǵy men qıyndyǵy qatar júrip, jankúıerlerdi birde jelpindirse, endi birde júregin syzdatatyp áttegen-aı degizetin hokkeı sporty komandalyq oıyn bolǵandyqtan, eshkimniń de nashar oınaýǵa qaqysy joq. О́ıtkeni, birdiń jibergen qateligi bárine tıip ketýi ábden múmkin. Al jeńis bolsa, bárimizge ortaq. Sondyqtan da komandanyń dúbirli synda baryn salyp, qatelikterge boı aldyryp almaýy qazirgi tańda basty nazarda turǵany aıtpasa da túsinikti. Otandastarymyzdyń ózderiniń alǵa qoıǵan tek qana jeńis degen jigerli maqsattarynyń arqasynda osy kezeńniń aıaqtalýyn alty mınót qalǵanda Roman Starchenkonyń óziniń komandalas attasy Roman Savchenkodan alǵan pasyn qytaılyqtar qaqpasyna bir-aq saldy. Ile bul jeńisti joldy Evgenıı Fadeev ádemi jalǵastyrdy. Esep – 6:0. Osy aınalym bitýge taıaǵan tusta Alekseı Lıtvınenko esepti taǵy bir eselep, kórermender yqylasyna bólendi. Sóıtip, bul kezeń de qazaqstandyq hokkeıshiler paıdasyna 7:0 degen eseppen tirkeldi. Úshinshi kezeńniń basy alma-kezek shabýyldarmen údeı tústi. Sport saraıynyń ishindegi jankúıer jurttyń «Shaıba!, Shaıba!, Qazaqstan alǵa!» degen daýystarynan qulaq tunyp qaldy. Bul ádemi oıyn órnegin kórsetip jatqan otandastarymyz turmaq, jıylǵan jurttyń barlyǵyn da rýhtandyrýmen boldy. Qoldaryna Qazaqstan jalaýyn ustaǵan jastar jaǵynyń jalyndy urandary jerlesterimiz jigerin janı túskendeı. Sheshýshi ýaqyttyń tartysty da, qyzyqty ótetini belgili ǵoı. Mundaǵy eki jaqtyń da jantalasyn ábden túsinýge bolatyn sııaqty. Bizdiń qurama taǵy da eki shaıbany qarsylas komandaǵa dál baǵyttap, esepti 9:0-ge jetkizdi. Ashýǵa býlyqqan qarsylastarymyz qarqyndy shabýyl jasady. Osy tusta Qytaı quramasynyń oıynshysy Ýank bizdiń qaqpashynyń osal tusyn taýyp, esepti 9:1-ge jetkizdi. Osydan keıin olar kóbine qorǵanysqa qaraı yǵysa bastady. Sasqany ma, álde shyn qýanǵany ma, komanda músheleriniń júzderine kúlki úıirilip, ózderine degen rızalyq sezimderin kórsetkendeı boldy. Taǵy da qarbalas sát. Kim ońaı jeńilgisi keledi deısiń. Onyń ústine mıllıardtan astam jankúıer elinde taqymyn qysyp otyrǵanyn eskersek, olardyń da jantalasyp jatqandyqtaryn túsinýge bolatyn sekildi. Sońǵy aınalymdaǵy bul tartysty shabýyldarda Talǵat Jaılaýov qarsylastar qaqpasyna onynshy shaıbany dál baǵyttasa, on ekinshi jáne on úshinshi shaıbalardy Starchenko men Gavrılın qytaılyqtar qaqpasyna ońaı baǵyttap úlgerdi. Oıyn aıaqtalarǵa bir mınót qalǵandaǵy Fadeevtiń erligin jankúıerler súısine baǵalady. Sóıtip, 14:1 esebimen Qazaqstan quramasy bul kezdesýdi sátti aıaqtap, jerlesterine jeńis syılady. Búgin buıyrtsa, elimiz quramasy Taıpeı qurama komandasymen sheberlik baıqasady. Bul synda da otandastarymyz namysty qoldan bermeıdi degen senimdemiz. Osy kúni Japonııa men Qytaılyq Taıpeı komandasyn 18:0, Qyrǵyzstan Malaızııany 23:2 esebimen jeńse, Taıland pen Kýveıt arasyndaǵy kezdesý 5:3 esebimen aıaqtaldy. Ábdirahman QYDYRBEK.
