Beriktik kórsetken Berikjan

atyna zaty saı ekenin tanytyp, erlikpen qaza tapty Oraza aldyndaǵy maýsym aıynyń 5-i – demalys kúni edi. Dál osy kúni tús aýa muzdaı qarýlanǵan bir top terrorshy Aqtóbe qalasyndaǵy №6555 áskerı bólimge shabýyl jasady. Olardyń basty oıy osyndaǵy qarý-jaraq qoımasyn basyp alý bolatyn. Osyndaı synı sátte mundaǵy ishki qaraýyl qarýlanǵan qylmystyq topqa toıtarys bere bildi. Sóıtip, ekstremısterdiń kózdegen maqsatyna jetýlerine jol bermedi. Qarýly qaqtyǵystar kezinde atqyshtar batalony sapyndaǵy áskerı qyzmetshi Berikjan Qalıev qaza tapty. Keshe qylmyskerlerge qasqaıyp qarsy tura bilgen esil erdi ózi týyp-ósken Oral óńiriniń jurtshylyǵy sońǵy saparǵa shyǵaryp saldy. Jánibek aýdanynyń Jaqsybaı aýylynda ótkizilgen qaraly mıtıngke Batys Qazaqstan oblysynyń ákimi Altaı Kólginov, Ulttyq ulannyń «Batys» óńirlik qolbasshylyǵynyń basshylary jáne Aqtóbedegi № 6555 áskerı bóliminiń ókilderi qatysty. – Berikjan Qalıev terrorshylarmen tiresý kezinde atyna zaty saı berik jan ekenin tanyta bildi. Ol eldiń tynyshtyǵy men táýelsizdiginiń tuǵyrly bola túsýi úshin shybyn janyn pıda etti. Urpaqqa uran bola alatyndaı erlik kórsetti. Osyndaı batyl da batyr er tárbıeleı bilgen Berikjannyń ata-anasyna qaıǵyryp kóńil aıtamyz. Olardyń aldynda basymyzdy ıemiz. Syn saǵaty týǵan kezde Berikjan taısalǵan joq. Onyń esimi el esinen óshpeıdi, – dedi qazaqtyń qaısar bir ulyn sońǵy saparǵa shyǵaryp salý rásimi kezinde A.Kólginov. Sodan soń óńir basshysy oblystyq ákimdik atynan qaraly otbasyna materıaldyq kómek retinde qomaqty konvert usyndy. Budan keıin sóz alǵan Ulttyq ulannyń Aqtóbe qalasyndaǵy №6555 áskerı bólimi bastyǵynyń tárbıe jáne áleýmettik-quqyqtyq jumystar jónindegi orynbasary Baqbergen Áneshev shaıqas kezinde mert bolǵan Berikjan Qalıevti memlekettik marapatqa usynǵandaryn aıtty. Sonymen birge, Jánibek aýdanynyń ákimi Naýryzbaı Qaraǵoıshın erlikpen kóz jumǵan batyr jerlesiniń esimin ózi týyp-ósken aýyldyń bir kóshesine berý jóninde ókiletti organdarǵa tıisti usynystarmen shyǵatyndaryn jetkizdi. Temir QUSAIYN, «Egemen Qazaqstan» Batys Qazaqstan oblysy, Jánibek aýdany,