Qańtar aıynda elordadaǵy №2 balalar mýzyka mektebiniń «Jiger» ult aspaptar ansambli «GRAN FIESTA -2011» baıqaýyna qatysý úshin Ispanııaǵa attanǵan bolatyn. Jýyrda ansambldiń kórkemdik jetekshisi Meıram Omarov redaksııamyzǵa atbasyn baryp, ol elden jaqsy jetistikpen oralǵandaryn áńgimelep berdi. «GRAN FIESTA – eýropalyq deńgeıdegi kópjanrlyq baıqaý. Oǵan ártúrli memleketterden kelgen ónerli balalar qatysa alady. Al, uıymdastyrýshylar alqasy ıspandyq Fiestalonia festıval komıteti. Baıqaý jyl saıyn Barselonanyń mańaıyndaǵy Lloret de Mar qalasynda ótedi eken. Biz bul málimetterdi ınternet arqyly bildik. Sosyn qalaıda baǵymyzdy synap kórýge tyrysyp, uıymdastyrýshylarmen alǵashqyda ınternet arqyly baılanysyp otyrdyq. Olarǵa ansamblge qatysty málimetterdi, sýretterimizdi, sosyn vıdeorolıkter jiberdik. Sóıtip, baıqaý shaqyrtý keldi. Sodan táýekelge bas tigip attanyp kettik. Jetistigimiz jaman emes. 30 memleketten 100 ujym qatysqan úlken baıqaýda ekinshi oryndy ıelendik», deıdi Meıram Omarov.
«Ispan kórermenderiniń Qurmanǵazynyń «Balbyraýyn», J.Eńsepovtyń «Balbulaq», A.Jeldibaevtń «Erke sylqym» kúılerin oryndadyq. Tyńdap, odan úlken áser alǵanyn baıqadyq. Osyndaı aýqymy keń, kópjanrly baıqaýda (ıaǵnı vıolenchel, skrıpka, horeografııa, vokal, trıo bári bar) ekinshi oryn alý úlken jetistik desek, Ispanııaǵa baryp óner kórsetip qaıtqan jetkinshekterdiń atyn aıtpaı ketý jaramas. Olar «Jigerdiń» quramynda óner kórsetetin Dılıara Dúıenova, Abylaı Júsipbekov, Sultan Qabdirahmanov, Jansaıa Qaıratqyzy, Ámir Qamıdollınov, Aıdar Qarkenov, Álisher Májıtov, Adaq Taıjanov, Temirlan Temirtaev, Madına Toqmýrzına, Sánııa Hýseınova sekildi ónerli balalar»-deıdi kórkemdik jetekshi.
Aıgúl SEIILOVA.
