Aıazdy kúnde júrek jylýyn sezinemiz

Lebiz

Azıadaǵa qatysýshy elderdiń sportshylarymen birge qolyna qalam ustaǵan áriptesterimiz de kelgeni belgili. Osy kúnderi elimizde Azııa oıyndaryn nasıhattaýmen 2000-ǵa jýyq shetel jýrnalısteri jumys isteýde. Keshe bizge solardyń ishinde Azıadaǵa eń kóp sportshylardyń birin ákelgen Qytaı eliniń jýrnalısterimen áńgimelesýdiń sáti túsken edi. Don Lon Djan, Sın Hýa aq­parat agenttiginiń tilshisi: – Astanaǵa osymen ekinshi kelýim. Ár kelgen saparym men úshin sátti bolyp júr. О́ıtkeni, kelgen saıyn bul qaladan, osy elden kádimgideı jaqsy áser alyp qaıtamyn. Bul eldiń damýy turaqty. Ekonomıkalyq, áleý­met­tik damý, saıası qurylymdyq alǵa jyljý týraly búginshe sóz qozǵamaı-aq qoıaıyq. Jalǵyz Azıa­da tóńireginde, ashylý salta­naty jaıynda ǵana aıtyp ótsek, eldiń barlyq damý qarqyny birden-aq kózge kórinip turady. Alǵan áserimdi «Tań qaldyq», «Tánti boldyq», «Mundaı bola­dy dep kútpegen edik» degen osy úsh sózben barlyq Azıadaǵa qatysty pikirimdi jetkizgim keledi. Bul tek meniń pikirim emes, keshe basqa da sheteldik tilshilermen otyryp sóıleskenimizde olar­dyń bári Azıadanyń oıdaǵydaı, sán-saltanatty túrde ótip jat­qan­dyǵyn aıtqan bolatyn. Qarap otyr­sam, barlyq uıymdas­ty­ry­lý jumystarynda sondaı bir uqyptylyq, jaýapkershilik bar. Sizben jolyǵardan buryn baspa­sóz ortalyǵynyń uıymdastyrǵan bir anketalyq saýalnama paraǵyn toltyryp edim. Munyń ózinen jumystardyń josparly, júıeli ótip jatqanyn kórýge bolady. Azııa Olımpıadalyq keńesiniń prezıdenti sheıh Ahmad ál-Fahd as Sabahtyń: «Qazaqstan 2022 jyl­ǵy Qysqy Olımpııa oıyn­daryn qabyldaýǵa daıyn» – dep aıtqan sóziniń ózi kóp nárseni ańǵartsa kerek. Budan buryn Chanchýn qala­synda ótken Qysqy Azıadaǵa Qazaqstannan bir top jýrnalıst kelgen bolatyn. Sol kezde qazaq­standyq áriptesterimmen sóıle­sip, olar bizben, biz olarmen sport­qa qatysty jańalyqtarmen bólisip júrdik. Jalpy, áriptes­ter ara­synda osyndaı syılastyq bolǵa­nyna ne jetsin degim keledi. Azıada kezinde Hok prezıdenti Jak Roggeniń 2022 jyly Qysqy Olımpıadanyń Qazaqstanda óte­ti­nin qoldaıtynyn aıtqanda, bizben birge júrgen basqa elderdiń de jýrnalısteri bul bastamany shyń kóńilmen jyly qabyldady. Meniń oıymsha, sizderdiń el­deri­ńiz Olımpıada sııaqty tórt jyl­da bir  aınalyp keletin baı­raqty básekeni ótkizýge laıyq. Lıý Chan, Harbın Kúndelikti gazet basylymdary aksıonerlik qoǵamy sport bóliminiń tilshisi: – Men ózim olımpııa oıyn­darynyń kóptegen ashylý sal­tanattaryna qatysqanmyn. Uzaq­qa barmaı-aq, 2008 jylda Beı­jińde ótken Jazǵy Olımpıa­danyń ashylý saltanaty áli de bárimizdiń esimizden kete qoı­maǵan shyǵar. Meniń jazyp-syz­ǵandarym sport salasyna tikeleı qatysty bolǵandyqtan, onyń ús­tine kóptegen ashylý rásim­derin­de bolǵandyǵymnan Asta­na­­daǵy Qysqy Azıadanyń ashy­lý salta­na­tyn Beıjińde ótken Olımpıadamen teńestirip aıtýǵa bolady. Daıyndyq deńgeıleri men ótkizý sheberlikterine óz ba­sym osyn­daı baǵa berer edim. Ulttyq áýen­deri­ńiz maǵan qatty unady. Munyń bári sizderdiń she­jire­lerińizben, tarıhı-mádenı qun­dy­lyq­tary­ńyz­ben tikeleı baı­­lanys­ty ekenin birden ań­ǵarýǵa bolady. Qazaqstanǵa kelmesten buryn bul el týraly azdy-kópti maǵ­lumattar biletinmin. Alaıda, Qy­taıdaǵy ıýanimizdi sizderdiń teń­gelerińizge aýystyrǵan kezde aqshalaryńyzdyń qundylyq ja­ǵy­nan ájeptáýir aıyrma­shy­lyq­taryn kórgende bul eldiń ekono­mıkasy jaǵynan qandaı da bir qıyndyqtar bar eken-aý degen áserde bolǵan edim. Biraq, As­tana­ǵa kelip, barlyq nárselerdi kózben kórip, qolmen ustaǵan soń ol oıymnyń múldem qate ekenine kózim jetti. Negizinde bizdiń qytaı halqy sezim degen nársege asa kóńil bóledi. Qazaqstanǵa kelgen birinshi kúnnen bastap-aq meıirimdiliktiń shýaǵyn sezindim. Sizge mynandaı bir oqıǵa aıtyp bereıin. Osy jaqyn kúnderdiń birinde sporttyq jarystar aıaq­talyp, endi qonaq úıge qaıtaıyn degen oımen sport saraıynyń syrtyna shyǵyp meni alyp ketýge tıis avtobýsty kútip otyr­dym. Dalada mınýs 20 gradýstan tómen aıaz bolyp tur. Avtobýs biraz keshigip jatqandaı boldy. Dalada bir 3-4 mınót turǵannyń ózinde qaltyrap tońyp ketkenmin. Qaı­tadan sport keshenine kireıin desem, arasy sál alystaý bolǵan soń, keri barǵym kelmedi. Sol sát­te 10 metrlik qashyq­tyqta jol tártip saq­shysy avto­turaq­tardyń qozǵa­ly­syn rettep tur­dy. Meniń ana jerde tońǵa­nymdy kórgen bolý kerek, qasy­ma keldi de bir nárse dep aıta jóneldi. Sózin uqpasam da jaq­sylyqtyń nıetin sezinip, túsi­ne qoıdym. Sonda avtobýs kelgenshe mendegi jol tártip saqshy­lary­nyń kóligine baryp jylyna tur, aıazda turyp tońyp qalypsyń degen oıy qalypsyń túsine qoı­dym. Sóıtip, avtobýs kelgenshe sol jol tártip saq­shy­synyń má­shı­nesinde jyly­nyp otyrdym. Sol kezdegi júre­gimniń qansha­lyq­ty deńgeıde ma­sat­­tan­ǵanyn, jy­lyn­ǵanyn endi til­men jet­kizýdiń ózi qıyn. Araı ÚIRENIShBEKQYZY.