Qazaqstan Respýblıkasy Densaýlyq saqtaý jáne áleýmettik damý mınıstrliginiń buıryǵy №567 

  2015 jylǵy 7 shilde ,Astana qalasy Ortasha jalaqyny esepteýdiń biryńǵaı qaǵıdalaryn bekitý týraly Qazaqstan Respýblıkasynyń 2007 jylǵy 15 mamyrdaǵy Eńbek kodeksiniń 16-babynyń 26) tarmaqshasyna sáıkes buıyramyn: 1. Qosa berilip otyrǵan Ortasha jalaqyny esepteýdiń biryńǵaı qaǵıdalary bekitilsin. 2. Qazaqstan Respýblıkasy Densaýlyq saqtaý jáne áleýmettik damý mınıstrliginiń Eńbek jáne áleýmettik áriptestik departamenti zańnamada belgilengen tártippen: 1) osy buıryqty Qazaqstan Respýblıkasy Ádilet mınıstrliginde memlekettik tirkeýdi; 2) osy buıryq memlekettik tirkelgennen keıin kúntizbelik on kún ishinde ony merzimdi baspa basylymdarynda jáne «Ádilet» Qazaqstan Respýblıkasy normatıvtik quqyqtyq aktileriniń aqparattyq-quqyqtyq júıesinde resmı jarııalaýǵa jiberýdi; 3) osy buıryqty Qazaqstan Respýblıkasy Densaýlyq saqtaý jáne áleýmettik damý mınıstrliginiń ınternet-resýrsyna ornalastyrýdy; 4) osy buıryq Qazaqstan Respýblıkasy Ádilet mınıstrliginde memlekettik tirkelgennen keıin on jumys kúni ishinde Qazaqstan Respýblıkasy Densaýlyq saqtaý jáne áleýmettik damý mınıstrliginiń Zań qyzmeti departamentine osy tarmaqtyń 1), 2) jáne 3) tarmaqshalarynda kózdelgen is-sharalardyń oryndalýy týraly málimetterdi usynýdy qamtamasyz etsin. 3. Osy buıryqtyń oryndalýyn baqylaý Qazaqstan Respýblıkasy Densaýlyq saqtaý jáne áleýmettik damý mınıstrliginiń jaýapty hatshysy A.D. Qurmanǵalıevaǵa júktelsin. 4. Osy buıryq alǵashqy resmı jarııalanǵan kúninen keıin qoldanysqa engiziledi. Qazaqstan Respýblıkasynyń Densaýlyq saqtaý jáne áleýmettik damý mınıstri T. DÚISENOVA KELISILDI KELISILDI Qazaqstan Respýblıkasynyń Qarjy mınıstri Qazaqstan Respýblıkasynyń _______________ B. Sultanov Ulttyq ekonomıka mınıstri 2015 jylǵy «____» _________ _______________ E. Dosaev 2015 jylǵy «____» ________ Qazaqstan Respýblıkasy Densaýlyq saqtaý jáne áleýmettik damý mınıstriniń 2015 jylǵy 7 shildedegi № 567 buıryǵymen bekitilgen Ortasha jalaqyny esepteýdiń biryńǵaı qaǵıdalary 1. Jalpy erejeler 1. Osy Ortasha jalaqyny esepteýdiń biryńǵaı qaǵıdalary (budan ári – Qaǵıdalar) Qazaqstan Respýblıkasynyń 2007 jylǵy 15 mamyrdaǵy Eńbek kodeksiniń (budan ári – Eńbek kodeksi) 16-babynyń 26) tarmaqshasyna sáıkes ázirlendi jáne ortasha jalaqyny esepteýdiń biryńǵaı tártibin aıqyndaıdy. 2. Osy Qaǵıdalarda mynadaı uǵymdar paıdalanylady: 1) esep aıyrysý kezeńi – tólenýi tıis aqymen (tólemmen) baılanysty oqıǵanyń aldyndaǵy uzaqtyǵy on eki aıǵa teń kezeń ne eger qyzmetker jumys berýshide on eki kúntizbelik aıdan kem jumys istegen jaǵdaıda, ortasha jalaqyny esepteý úshin paıdalanylatyn naqty jumys istegen kezeń; 2) aı – tıisti aıdyń 1-nen bastap 30-kúnine (31-kúnine) deıin qosa alǵandaǵy (aqpanda – 28-kúnine (29-kúnine) deıin qosa alǵandaǵy) kezeń; 3) kúndik (saǵattyq) jalaqy – ýaqyt birligi (kún, saǵat) úshin jalaqy; 4) ortasha jalaqy – qyzmetker jalaqysynyń saqtalýyna kepildik beriletin kezeń úshin jumys berýshi esepteıtin jáne qyzmetkerge tólenetin aqsha qarajatynyń somasy; 5) ortasha kúndik (saǵattyq) jalaqy – ýaqyt birligi (kún, saǵat) úshin ortasha jalaqy; 6) oqıǵa – Eńbek kodeksine sáıkes ortasha jalaqynyń saqtalýymen nemese tólenýimen, jyl saıynǵy aqyly eńbek demalysynyń paıdalanylmaǵan kúnderi úshin beriletin ótemaqymen baılanysty jaǵdaılar; 7) jumys ýaqytynyń balansy – 36 saǵattyq, 40 saǵattyq jumys aptasy kezindegi (bes kúndik, alty kúndik) jumys kúnderin (saǵattaryn) eskere otyryp, tıisti kúntizbelik jylǵa arnalǵan jumys ýaqytynyń normalaryn aı boıynsha bólý kórsetkishteriniń kestesi. 3. Ortasha aılyq jalaqyny aıqyndaýdyń barlyq jaǵdaılary úshin esep aıyrysý kezeńinen Eńbek kodeksine sáıkes mereke kúnderi, sondaı-aq demalys kúnderi bolyp tabylatyn musylman kúntizbesi boıynsha atap ótiletin Qurban aıttyń birinshi kúni, 7 qańtar – pravoslavıelik Rojdestvo alynyp tastalady. 4. Ortasha jalaqyny esepteý kezinde esep aıyrysý kezeńinen Eńbek kodeksine sáıkes qyzmetkerge ortasha jalaqysy tólengen nemese saqtalǵan kezdegi jumys istelmegen ýaqyt alynyp tastalady. 5. Ujymdyq shartta ortasha jalaqyny esepteý úshin qyzmetkerlerdiń jaǵdaıyn nasharlatpaıtyn ózge de kezeńder kózdeledi. 2. Ortasha jalaqyny esepteýdiń biryńǵaı tártibi 6. 1999 jylǵy 1 shildedegi Qazaqstan Respýblıkasynyń Azamattyq kodeksine sáıkes azamattyń ómiri men den­saý­lyǵyna keltirilgen zııandy óteý úshin aıqyndalǵan ortasha aılyq jalaqyny qospaǵanda, bes kúndik, sondaı-aq alty kúndik jumys aptasynda ortasha aılyq jalaqyny esepteý belgilengen qosymsha aqylar men ústemeaqylar, syı­lyq­aqylar jáne eńbekaqy tóleý júıesinde kózdelgen turaqty sıpattaǵy basqa da yntalandyrý tólemderi eske­rile otyryp, tıisti kezeńdegi ortasha kúndik (saǵattyq) jalaqynyń esebinen naqty jumys istelgen ýaqyt úshin júrgiziledi. Ortasha jalaqyny esepteý kezinde osy Qaǵıdalarǵa qosymshaǵa sáıkes tólemder eskerilmeıdi. 7. Qyzmetkerdiń ortasha jalaqysy ortasha kúndik (saǵattyq) jalaqyny oqıǵa kezeńine sáıkes keletin jumys kúnderiniń (jumys saǵattarynyń) sanyna kóbeıtý jolymen esepteledi. 8. Barlyq jaǵdaılarda ortasha kúndik (saǵattyq) jalaqy esep aıyrysý kezeńde eseptelgen jalaqy somasyn esep aıyrysý kezeńdegi jumys kúnderiniń (saǵattarynyń) sanyna bólý jolymen aıqyndalady. 9. Eger esep aıyrysý kezeńi jumyspen tolyq ótelmese, onda ortasha kúndik (saǵattyq) jalaqy jumys istelgen ýaqyt úshin eseptelgen jalaqynyń somasyn osy jumys istelgen ýaqytqa sáıkes keletin bes kúndik nemese alty kúndik jumys aptasy kezindegi jumys kúnderiniń (saǵattarynyń) sanyna tıisinshe bólý jolymen aıqyndalady. 10. Eger esep aıyrysý kezeńinde qyzmetkerge jalaqy eseptelmegen bolsa, onda ortasha kúndik (saǵattyq) jalaqyny esepteý esep aıyrysý kezeńiniń aldyndaǵy on eki aıdaǵy jumysy ne esep aıyrysý kezeńiniń aldyndaǵy osy jumys berýshide naqty jumys istegen ýaqyt kezeńi úshin eseptelgen jalaqy somasyn osy jumys istelgen ýaqytqa sáıkes keletin bes kúndik nemese alty kúndik jumys aptasy kezindegi jumys kúnderiniń (saǵattarynyń) sanyna tıisinshe bólý jolymen júzege asyrylady. 11. Tolyq emes jumys aptasy (jumys kúni) kezinde ortasha kúndik (saǵattyq) jalaqy osy Qaǵıdalardyń 8, 9, 10-tarmaqtaryna sáıkes esepteledi. 12. Eger qyzmetker jumysqa ornalasqan kezde eseptelgen jalaqy somasy bolmasa ne oqıǵa aldyndaǵy 24 aı boıy jalaqysy bolmaǵan jaǵdaıda, onda oqıǵa oryn alǵan jaǵdaıda ortasha kúndik (saǵattyq) jalaqy qyzmetkerdiń kúndik (saǵattyq) tarıftik mólsherlemesin (laýazymdyq jalaqysyn) negizge ala otyryp esepteledi. 13. Laýazymdyq jalaqy arttyrylǵan jaǵdaıda ortasha jalaqyny esepteý arttyrý koeffısıentin eskere otyryp, mynadaı tártippen júrgiziledi: 1) eger arttyrý esep aıyrysý kezeńinde júrgizilse, arttyrýdyń aldyndaǵy árbir aı úshin ortasha jalaqy arttyrý koeffısıentin eskere otyryp esepteledi; 2) eger arttyrý esep aıyrysý kezeńinen keıin oqıǵa bolǵanǵa deıin júrgizilse, esep aıyrysý kezeńi úshin ortasha jalaqy arttyrý koeffısıentin eskere otyryp esepteledi; 3) eger arttyrý oqıǵa kezeńinde júrgizilse, ortasha jalaqynyń bir bóligi laýazymdyq jalaqy (mólsherleme) arttyrylǵan kúninen bastap kórsetilgen kezeń aıaqtalǵanǵa deıin arttyrý koeffısıentin eskere otyryp esepteledi. Arttyrý koeffısıenti arttyrý aıynda belgilengen laýazymdyq jalaqyny (mólsherlemeni) arttyrýǵa deıin belgilengen laýazymdyq jalaqyǵa (mólsherlemeni) bólý jolymen esepteledi. Qyzmetkerdi bir laýazymnan ekinshisine aýystyrǵan kezde arttyrý koeffısıenti qoldanylmaıdy. 14. О́tken jyldyń jumys qorytyndysy boıynsha tólenetin jyldyq syılyqaqylardy, syıaqylardy qospaǵanda, turaqty sıpattaǵy jáne jumys berýshiniń eńbekaqy tóleý júıesinde kózdelgen syılyqaqylar men eńbek nátıjeleri úshin tólenetin basqa da yntalandyrý tólemderi ortasha jalaqyny esepteý kezinde eseptelgen ýaqyty boıynsha qosylady. Jumys berýshiniń eńbekaqy tóleý men syılyqaqy berý júıesinde kózdelgen jumys qorytyndysy boıynsha tólenetin toqsandyq, jarty jyldyq syılyqaqylar esep aıyrysý kezeńiniń árbir aıyna tıisinshe 1/3, 1/6 mólsherinde esepteledi; aılyq syılyqaqylar – esep aıyrysý kezeńiniń árbir aıy úshin bireýden aspaýǵa tıis. О́tken jyldyń jumys qorytyndysy boıynsha tólenetin jyldyq syılyqaqylar, syıaqylar ortasha jalaqyny esepteý kezinde, esep aıyrysý kezeńi shegindegi jyldyq syılyqaqyny, syıaqyny naqty tóleý aıynyń aldyndaǵy árbir aıǵa 1/12 mólsherinde naqty tóleý sátinen bastap esepteledi. Esep aıyrysý kezeńi jumyspen tolyq ótelmese, jyldyq syılyqaqy naqty jumys istegen aılarǵa bólinedi jáne syılyqaqy tóleý aıynyń aldyndaǵy árbir naqty jumys istegen aıǵa naqty tóleý sátinen bastap esepteledi. Esep aıyrysý kezeńine keletin ýaqyt jumyspen tolyq ótelmegen jaǵdaılarda, ortasha jalaqyny esepteý kezinde syılyqaqylar jáne turaqty sıpattaǵy basqa da yntalandyrý tólemderi esep aıyrysý kezeńindegi jumys istegen ýaqytqa barabar esepteledi. Ortasha jalaqyny esepteýdiń biryńǵaı qaǵıdasyna qosymsha Ortasha jalaqyny esepteý kezinde eskerilmeıtin tólemder Ortasha jalaqyny esepteý kezinde eskerilmeıtin tólemderge mynalar: 1) jyl saıynǵy aqyly eńbek demalysynyń paıdalanylmaǵan bóligi úshin ótemaqy; 2) eńbekke ýaqytsha jaramsyzdyǵy boıynsha áleýmettik járdemaqy, sondaı-aq jumys berýshi belgileıtin áleýmettik járdemaqy mólsherine qosymsha tólemder; 3) jyl saıynǵy aqyly eńbek demalysyn berý kezinde qyzmetkerlerge tólenetin saýyqtyrýǵa arnalǵan járdemaqy; 4) qyzmettik issaparǵa jiberiletin qyzmetkerlerge beriletin ótemaqy; 5) turaqty jumysy jolda ótetin nemese júrip-turý sıpatynda ne qyzmet kórsetetin ýchaskeleri sheginde qyzmettik saparlarmen baılanysty bolǵan jaǵdaılarda beriletin ótemaqy tólemderi; 6) dala jumystarymen aınalysatyn qyzmetkerlerge beriletin dalalyq jabdyqtalym; 7) qyzmetkerdi jumys berýshimen birge basqa jerge jumysqa aýystyrý nemese kóshirý kezindegi ótemaqy tólemi; 8) qyzmetkerdiń (jeke tulǵanyń) jeke múlkin taraptardyń kelisimi negizinde jumys berýshiniń múddeleri úshin paıdalanǵan kezdegi shyǵystardy óteý; 9) Eńbek kodeksine sáıkes berilgen arnaıy kıimniń, arnaıy aıaq kıimniń jáne basqa da jeke qorǵaný, alǵashqy medısınalyq kómek quraldarynyń, jýý jáne zararsyzdandyrý materıaldarynyń, súttiń, emdeý-profılaktıkalyq taǵamdardyń jáne basqa da quraldardyń quny; 10) qyzmetker eńbek mindetterin atqarý kezinde onyń ómiri men densaýlyǵyna keltirilgen zııandy óteý boıynsha tólemder (joǵaltqan jalaqysy bóligindegi tólemderden basqa); 11) qyzmetkerlerge jumys berýshi (bala týǵan kezde, dárigerlik qyzmettiń aqysyn tóleý úshin, jerleýge jáne basqa da jaǵdaılarda) kórsetetin materıaldyq kómek (aqshalaı járdemaqy), sondaı-aq jumys berýshiniń qarajaty esebinen ujymdyq shartta jáne (nemese) jumys berýshiniń aktisinde qosymsha kózdelgen ótemaqylar men áleýmettik kepildikter tólemderi; 12) «Qazaqstan Respýblıkasyndaǵy merekeler týraly» 2001 jylǵy 13 jeltoqsandaǵy Qazaqstan Respýblıkasynyń Zańynda belgilengen merekelik kúnderge, mereıtoı kúnderine baılanysty, laýazymdyq mindetterin úlgili atqarǵany úshin, minsiz eńbek qyzmeti úshin, zeınetaqyǵa shyǵýyna oraı jumys berýshi eńbekaqy tóleý qory esebinen beretin birjolǵy kótermeleý tólemderi (birjolǵy aqshalaı syıaqylardy qosa alǵanda); 13) Eńbek kodeksine sáıkes jumys berýshiniń kinásinen jalaqy tólemderi keshiktirilgen kezde jáne «Ákimshilik quqyq buzýshylyq týraly» 2014 jylǵy 5 shildedegi Qazaqstan Respýblıkasynyń kodeksine sáıkes mindetti zeınetaqy jarnalaryn ýaqtyly aýdarmaǵany úshin jumys berýshiniń qyzmetkerge tóleıtin ósimaqylary; 14) qyzmetkerlerdi oqytýǵa jáne biliktiligin arttyrýǵa baılanysty jumys berýshiniń shyǵystary; 15) sporttyq baıqaýlarda, konkýrstar men jarystarda júldeli oryndar úshin beriletin aqshalaı nagradalar; 16) Eńbek kodeksiniń 149-babyna sáıkes qyzmetkerge memlekettik jáne qoǵamdyq mindetterdi oryndaıtyn jeri boıynsha tólengen jalaqy; 17) Eńbek kodeksiniń 83-babyna sáıkes qyzmetkerlerge kúndelikti jumysyn (jumys aýysymyn) bólikterge bólý kezindegi jumysy úshin ótemaqy tólemderi; 18) úıde jumys isteıtin qyzmetkerlerge tólenetin ótemaqy tólemderi jatady. Buıryq Qazaqstan Respýblıkasynyń Ádilet mınıstrliginde 2015 jylǵy 11 tamyzda Normatıvtik quqyqtyq kesimderdi memlekettik tirkeýdiń tizilimine №11855 bolyp engizildi.