Jasa, Qazaqstan! Jasa, qazaq qyzdary!

Hokkeıshi qaryndastarymyz aqtyq synda Qytaı quramasyn 4:1 esebimen jeńip, Azıadanyń úsh dúrkin jeńimpazy atandy Tańerteńgilik muz aıdynyna shyqqan Japonııa men Soltústik Koreıa qyzdary jan alyp, jan berisetin aıqasqa tústi. Alma-kezek shabýyl. Biraq, myqtynyń aty myq­ty ǵoı. Koreıa qaqpasyna serpilgen dopqa birinshi jetken japon shabýylshysy Hırano taıaǵyn qaıqaıa urdy deısiz. Gol! Osydan keıin-aq oıyn basqasha órbidi. Japondar atqan oqtaı jyldam. Oǵan  birin-biri alańda kórip, pas­pen oınaıtynyn qosyńyz. Sol­tústik Koreıa qyzdarynyń jeńiske degen sumdyq jigeri sheberlikke astar bola almady. Birinshi kezeńde 2:0, ekinshi kezeńde Ioneıama, Kondo, Hırano shaıba soǵyp, esepti 5:0 ge jetkizgen. Sońǵy kezeńde Japon­dardyń aıqyn basymdylyǵymen ótti. 6:0. Qazaqstan – Qytaı. Ne bel, ne belbeý ketetin oıyn. Saraıda ıne shanshar jer joq. Jankúıerler quramamyzdyń altynnan olja sal­ǵanyn qalaıdy. Japonııa - Sol­tústik Koreıa  matchynan keıingi bas­pasóz máslıhatynda Japon qura­ma­synyń bas bapkeri Endrıý Qa­zaq­stan men Qytaı qurama­lary­nyń jeńiske degen múmkin­dikteri birdeı dedi. «Overtaımmen bitedi. Maǵan salsa býllıtpen jeńimpaz anyqtalǵany jaq­sy», degendi jáne qosqan. Kómeıi belgili. Sonda ǵana japondyq­tardyń altynnan dámesi bolady. Qazaqstanǵa jeńis aýadaı kerek bolsa, japondarǵa ese jibergen qytaılarǵa mıllıon ese kerek. Tal qarmary osy oıyn. Matchtyń qatty shıryǵyp bastalǵany son­dyq­­tan. Birinshi kezeńniń ortan bel­inde Ibragımovadan pas alǵan Shteılmaster toqtatpaı siltedi. Qaqpashy túsinbeı de qaldy. Gol! Qytaı hokkeıshileri sasqalaqtap qaldy.  Biraq qyz­da­ry­myz taktı­ka­lyq qatelerdi kóp jiberip jat­ty. Darıaǵa rahmet. Tótelep kelgen talaı shaıbany qaqty. Ekinshi kezeń taǵy da shıryǵyp bastal­dy. Moı­nynda qandaı jaýapkershilik tur­ǵanyn qyzdary­myzdyń árqaı­sysy jaq­sy túsi­nedi. Oıyn bastalysy­men 5-6 mınót boıy qyzdarymyz qytaı­lyqtardy qat­ty tyqsyryp jiberdi. Arasynda bir-birine du­rys pas bermeı bizdiń de júre­gimizdi ushyryp jibere jazdaıdy. Zarına Týhtıeva er ǵoı. Qazaq hokkeıiniń mań­daıyna bitken baq eken. Sazonovadan pas alyp qaq­pa­ǵa jeke tart­ty. Gol! Esep 2:0. Qa­zaqstan alda.  Úshinshi ke­zeń. Shy­nyn aıt­saq, sonyń bol­ma­ǵanyn qa­la­dyq. О́ıtkeni, qy­taı­lardy jaq­sy bilemiz. Sońǵy se­kóntke deıin janyn salyp oı­naı­dy. Qyzdary­myz  jeńis býyna pi­sip qalmasa eken dep oıladyq. Biraq bizdiki aǵat­tyq eken. Naǵyz jaý­júrek qa­ryndastar. Namys degen uly kúsh bar qandarynda. Oıynnyń 43-shi mınótinde Shteılmaster taǵy bir gol soqty. 3:0. Qytaılar da qarap qalmady. Ańdyǵan jaý almaı qoımaıdy degen. Qaqpany torýyl­dap júrip, ataqty Ma bir gol soǵyp ketti. Esep 3:1. Oıyn bitýge 2 mınót ýaqyt qaldy. Taım-aýt alǵan  qytaılar va-bankqa ketti. Qaqpashyny alyp tastady. Bizdiń bestikke altaýy umtyldy. О́zderi­niń sory eken. Sol jaq qaptaldan shaıba alǵan Ibragımova qaqpany dál kózdedi. Esep 4:1. Qytaılar yshqyndy. Qaq­pashy  Jın Fenglıng  qaıta oral­dy. Biraq, olarǵa eshteńe kó­mek­­tesken joq. Esep osy kúıinde qaldy.  Alyp saraıdy mo­ıynǵa ilip keterdeı halde turmyz. Uıaly telefonym qaıta-qaıta shy­ryl­daıdy. Belgisiz bir jankúıer «Zarına Týhtıeva qazaq pa?»  deıdi qaıta-qaıta. «Qazaq dedim. - Osy qyzdardyń bári qazaq. Eshkim olar­dy qazaq emes dep aıta almaıdy». Qazaq ánurany oınalǵanda bári­niń qosylyp shyrqaǵanyn-aı! Jankúıerlerge erkeledi qyz­dar. Olardyń súıkimdi qalpyn, erkeligin búkil qazaq dalasy kóterse de bolady. Sondaı erlik keldi qazaq qyzdarynyń qolynan. 1,5 mıllıard halqy bar Qytaı­dyń  quramasy 16 mıllıon halqy bar Qazaqstan quramasynyń al­dynda tize búgip jatsa osyn­daı sózdi qalaı aıtpaýǵa bolady?  Ekin­shi oryn Japonııa qurama­syna buıyrdy. Dúnıejúzilik reı­­tıngte Qazaqstan men Japo­nı­ıa­nyń aldynda turǵan Qytaı qura­masy qola medalǵa ıe boldy. Baqtııar TAIJAN.