Bılıardtan Aqseleý Seıdimbek atyndaǵy týrnır ótti (foto)

Búgin jýrnalısterdiń kásibı merekesine oraı bılıardtan jazýshy, jýrnalıst, ǵalym, professor Aqseleý Seıdimbekti eske alýǵa arnalǵan dástúrli respýblıkalyq týrnır ótti. Oǵan 60-qa jýyq BAQ salasynyń ókilderi qatysty. Týrnırdiń ashylý saltanatynda L.Gýmılev atyndaǵy Eýrazııa ulttyq ýnıversıteti janyndaǵy «Jýrnalıstıka máselelerin zertteý» ınstıtýtynyń dırektory Namazaly Omashov jarystyń mańyzdylyǵyn keńinen aıtyp berdi. «Aqseleý Seıdimbek atyndaǵy bılıard saıysy osymen altynshy márte uıymdastyrylyp otyr. Týrnırdiń ótýine atalǵan bilim ordasynyń kásipodaq komıteti muryndyq bolyp, demeýshilik kórsetti. Onan bólek, Aqseleý aǵamyzdyń inisi Asylhan Seıdimbek áýleti atynan aqshalaı syılyq tapsyrady», – dedi ol.

Munan keıin ýnıversıtettiń «Jýrnalıstıka jáne saıasattaný» fakýltetiniń dekany Qaırat Saq sóz alyp, jarysqa qatysýshy aqsaqaldar toby – 24, orta býyn ókilderi men jastardan quralǵan oıynshylar 32 saıyskerden turatynyn jetkizdi. «Bul týrnır eń alǵash 2009 jyly Aqseleý aǵamyzdyń bastamasymen BAQ ókilderi arasynda uıymdastyryldy. Maqsaty – jýrnalıstıkanyń qazanynda qaınap júrgen jáne qolyndaǵy qalamyn qarý etken qalamgerlerdiń basyn qosyp, kásibı merekeniń qarsańynda bir serigip qalý. Osy rette aǵamyz óziniń atynan týrnır jeńimpazyna aqshalaı júldesin berip, dástúrli sharaǵa muryndyq boldy. Al 2010 jyldan beri biz osy saıysty Ahańnyń atynan ótkizip kelemiz. Jyl saıyn bılıardqa qyzyǵýshylyq tanytyp, jarysqa qatysýǵa nıet bildirgen oıynshylar qatary artyp keledi. Búgingi sharaǵa demeýshilik kórsetkenderdiń qatarynda «Qazaqstan» ulttyq telearnasy» men «Egemen Qazaqstan» gazeti bar. Jalpy, biz kelesi jyly Aqseleý aǵamyzdyń 75 jyldyǵyna oraı týrnır aýqymyn ulǵaıtyp, dúbirletip ótkizemiz be dep otyrmyz», – dedi Qaırat Saq óziniń sózinde.

Sonymen, jeti saǵatqa sozylǵan saıysta aqsaqaldar tobynan 1-oryndy Namazaly Omashev jeńip alsa, 60 jasqa deıingi oıynshylar ishinen úzdik shyqqan telejýrnalıst Nurdildá Oraz top jardy. Olarǵa týrnırdiń bas syılyǵy - Kýboktar men aqshalaı syılyqtar tabys etildi. Týrnırde sondaı-aq, budan da basqa atalymdar boıynsha úzdikter anyqtalyp, tıisti syı-sııattaryna ıe boldy. Talǵat RAIYMBEK.