Táttimbetti Túrkııa qurmetteıdi

О́tken aptada Ankaranyń Kechı­­óren aýdanyndaǵy Súıinbaı saıa­baǵyna aqıyq aqynnyń músini orna­tylǵanyn habarlaǵan edik. Endi, mine, Túrkııanyń astanasy – Ankara qalasynda qazaq­tyń kúıshi-kom­pozıtory, dombyrashy, shertpe kúı oryndaýshylyq mektebiniń negi­zin qalaýshylardyń biri, halyq kúı óneriniń klassıgi Tát­timbet Qazan­ǵapuly atyndaǵy saıabaq ashyldy. Saıabaqqa dáýlesker kúıshiniń aty halyqaralyq TÚRKSOI uıy­­mynyń uıymdastyrýymen, Qa­zaqstannyń Túrkııadaǵy elshili­giniń qoldaýymen jáne Qaraǵandy oblysynyń ákimdiginiń atsa­lysýy­men berildi. Bul demalys orny Ankara qalasynyń orta­ly­ǵyndaǵy Etımesgýt aýda­nyn­da o­rnalasqan. Saıabaqtyń ashylý saltanatyna Qazaqstannyń Túrkııadaǵy Tótenshe jáne ókiletti elshisi Janseıit Túımebaev, Halyqaralyq TÚRKSOI uıymynyń bas hatshysy Dúısen Qaseıinov, Ankara qalasy Etımesgýt mýnısıpalıtetiniń meri Ánýar Demırel, aqyn Serik Aqsuńqaruly, Táttimbettiń tikeleı urpaǵy Múslim Jaqparov pen túrik zııalylary qatysty. Sharada aldymen Táttimbet atyn­daǵy akademııalyq ult aspaptar orkestriniń oryndaýynda kúıshi-kompozıtordyń «Saryjaılaý», «Sylqyldaq» kúıleri tartý etildi. Odan keıin Qazaqstannyń Túr­kııa­daǵy Tótenshe jáne ókiletti elshisi Janseıit Túımebaev sóz sóılep, qazaq kúıshisiniń atyndaǵy saıabaqtyń ashylýy eki eldiń ara­syndaǵy mádenı jáne dostyq qarym-qatynastyń jyl ótken saıyn damyp, nyǵaıyp kele jatqanyn kórsetetinin, qazirgi kezde túbi bir túrki elderin jaqyndastyratyn, eki eldiń rýhanı baılyǵyn arttyratyn jumystardyń qolǵa alynyp jatqanyn aıtty. –Túrik elinde qazaqtyń tarıhy men mádenıeti jaqsy nasıhattalyp keledi. Osy jerde 2011 jyly halyq ártisi, kúıshi-kompozıtor Dına Nurpeıisovanyń 150 jyldyǵyna baılanysty saıabaq ashylǵan bolatyn. Byltyr Kechıóren aýdanynda Súıinbaı Aronulynyń 200 jyldyǵyna oraı saıabaq ashyldy. Sondyqtan, túrik jerinde halqymyzdyń mádenıetiniń damýyna zor úles qosqan tulǵalarǵa qurmet kórsetilip jatqany biz úshin zor qýanysh, úlken abyroı. Osyndaı mańyzdy sharalar túrki halyqtarynyń arasyn jaqyn­dastyra túsedi, – dedi ol. Atalǵan sharada TÚRKSOI uıymynyń bas hatshysy Dúısen Qaseıinov te túrki elde­riniń yntymaqtastyǵynyń mańyz­dy­lyǵyn atap ótti. Ol halyq kúı óneriniń klassıgi Táttim­bet Qazanǵapulyna arnalǵan saıabaqtyń qalanyń dál ortaly­ǵynda ornalasqanyn, osynyń ózi túrki halqynyń Qazaq eline degen ystyq yqylasyn bildiretinin aıtty. Sonymen birge, ol TÚRKSOI uıymy byltyrǵy jyldy hakas dastanshysy Semen Kadyshevqa, túrik jazýshysy Haldýn Tanerge arnaǵanyn, al bıyl ataqty oıshyl Júsip Balasaǵunıge qurmet kórsetilip, halyqaralyq konferensııalar uıymdastyrýdy qolǵa alyp jat­qanyn jetkizdi. Albına ÁShIM, «Egemen Qazaqstan» – Ankaradan