Beıjiń kún sanap shógip barady
Halyqaralyq ǵalymdar toby Qytaı astanasy – Beıjiń qalasynyń birte-birte shógip bara jatqanyn baıqaǵan. Buǵan jerasty sýlaryn mólsherden tys soryp alyp, túrli qajettilikter úshin paıdalaný sebep bolyp otyr eken. Osynyń saldarynan Qytaı astanasy jerge jylyna 11 santımetr batyp bara jatsa kerek. Bul týraly maqala Remote Sensing jýrnalynda jarııalanypty.
Shógý, ásirese, aspanmen talasqan bıik úıler kóp salynǵan Chaoıan aýdanynda qatty baıqalýda eken. Bul jaıt bıik ǵımarattarmen qatar, kólik týnnelderi úshin de úlken qater tóndirip otyrǵan kórinedi. Jalpy, Beıjiń – jazyq jerde ornalasqan qala. Sondyqtan onyń astyna sýlar myńdaǵan jyldar boıy molynan jınalǵan. Shahar men onyń mańaıyndaǵy sý soratyn san júzdegen skvajınadan alynǵan sýlar osylaısha qalany shóktirip bara jatqanǵa uqsaıdy.
Úshten biri EO-dan shyǵýdy qoldaıdy
Germanııanyń árbir úshinshi derlik turǵyny, ıaǵnı 29 paıyzy eldiń Eýropalyq odaqqa músheligine qatysty referendým ótkizý týraly ıdeıaǵa qoldaý bildirgen. Saýaldama 26 maýsym, jeksenbi kúni uıymdastyrylypty. Bul málimet Bild am Sonntag gazetinde jarııalanǵan.
Aıta keterligi, suralǵandardyń 63 paıyzy mundaı usynystan úzildi-kesildi bas tartqan. Osynshama paıyzy Ulybrıtanııada ótken referendýmnyń qorytyndysyna baılanysty ózderiniń ókinetinderin bildirgen. 67 paıyzy Birikken Koroldiktegi referendýmnyń qorytyndysy Eýroodaqty túbirinen reformalaý qajettigin kórsetip bergenin kóldeneń tartqan. Tek 11 paıyzy ǵana brıtanııalyqtardyń sheshimin oń baǵalaǵan. Al búginde Fınlıandııada eldiń EO-dan shyǵýy týraly referendým ótkizýdi talap etken petısııaǵa qol jınala bastaǵanyn da aıta ketkenniń artyqtyǵy joq.
NATO úshin eń qaterli el – Reseı
NATO-nyń Eýropadaǵy birlesken qarýly kúshteriniń burynǵy bas qolbasshysy, amerıkalyq general Fılıp Brıdlav Reseıdi AQSh pen onyń odaqtastary jáne búkil álemdik tártip úshin naǵyz qaterli el sanaıtynyn málimdedi. Ol óziniń bul málimdemesin Foreign Affairs jýrnalyna bergen suhbatynda jasady.
Generaldyń atap ótkenindeı, qoldaryndaǵy tamasha qarý-jaraq pen basqa da qural-jabdyqtarǵa qaramastan, AQSh pen onyń Eýropadaǵy odaqtastary qazirgi zaman syn-qaterlerine múldem daıyn emes. Taıaý Shyǵys pen Soltústik Afrıkadaǵy turaqsyzdyq jaǵdaılarynda bul óte úlken olqylyq bolyp tabylady. Onyń ústine, Reseı tarapynan áskerı qater kún sanap arta túsip keledi.
Qysqa qaıyrǵanda:
- AQSh-tyń Batys Vırdjınııa shtaty sońǵy 100 jyldaǵy eń aýqymdy sý tasqynyn bastan keship jatyr. 22 maýsym kúni bastalǵan tasqynnan búginge deıin 24 adam kóz jumypty. Júzdegen adam qutqarylǵan, alaıda, kóp adam joǵalyp ketkender qatarynda.
- Qytaıdyń Hýnan provınsııasynyń Ichjan ýezindegi avtotrassada týrıstik avtobýs órtendi. 26 maýsym kúni oryn alǵan oqıǵa saldarynan avtobýstaǵy 56 adamnyń 35-i opat bolǵan. Júrgizýshi tiri qalypty, biraq ol kúdikti retinde qamaýǵa alynǵan.
- Reseı astanasy – Máskeý qalasynda sport sómkesine 31 mıllıon rýbl salyp alyp júrgen er adam tonalǵan. Belgisiz bireýler aspanǵa tapanshadan oq atyp aqsha ıesin qorqytqannan keıin, sómkeni «Jıgýlı» jeńil kóligine salyp taıyp turǵan. Qaraqshylyq shabýyl faktisi boıynsha qylmystyq is qozǵalypty.
- Úndistanda ozat oqýshy qyz ózi mamandanǵan pánniń ataýyn durys jaza almaǵannan keıin qatań jaza qoldanylyp, qamap tastalypty. Bul týraly The Guardian habarlady. Oqıǵa Bıhar shtatynda oryn alǵan. 17 jasar mektep bitirýshiniń aty-jóni Rýbı Roı kórinedi. Atalǵan oqıǵaǵa baılanysty elde úlken janjal bolyp, endi oqýshy qyz ekinshi qaıtara emtıhan tapsyrýǵa jiberiledi.
Úsh el qol qoıǵan mańyzdy kelisim
Reseı, Qytaı jáne Mońǵolııa ShYU-nyń kezekti sammıtinde ekonomıkalyq dáliz qurý jónindegi kelisimge qol qoıdy. Bul ekonomıkalyq dáliz Máskeýdiń Beıjińmen jáne Ulan-Batormen baılanys, kólik ınfraqurylymyn damytýǵa yqpal etý salasyndaǵy yntymaqtastyqty nyǵaıtý úshin qurylyp otyr.
Sondaı-aq, bul joba júzege asqan jaǵdaıda elder arasyndaǵy ınvestısııa men saýda-sattyq artyp, mádenı baılanystar jaqsara túsedi . Bul kelisimniń arqasynda úsh memlekette de kólik ınfraqurylymy artyp, óndiristik qýat joǵarylaıdy dep kútilýde. Tıisti qujatqa Tashkentte QHR, Reseı jáne Mońǵolııa basshylary Sı Szınpın, Vladımır Pýtın jáne Sahıagıın Elbegdorj qol qoıǵan bolatyn. Atalǵan jańalyqty The South China Morning Post agenttigi habarlady.
Azııa aımaǵyna da aýyz sala bastady
«Islam memleketi» (Qazaqstanda tyıym salynǵan) óziniń Ońtústik-Shyǵys Azııa elderindegi strategııasyn jarııa etti. Bul týraly The South China Morning Post agenttigi habarlady. Sodyrlar jelide osy pıǵyldaryn bildiretin beınerolık taratqan.
Beınerolıkte sodyrlar ózderiniń óńirdegi jaqtastaryn Sırııa men Irakqa barmaı ózderiniń elderinde qalyp, top qurýǵa shaqyrǵan. Olardyń habarlaýlaryna qaraǵanda, óńirde qurylatyn sodyrlar jasaǵyna Abý Abdýlla basshylyq jasaıtyn bolady. Ol «Islam memleketine» ant berip úlgergen Fılıppınniń «Abý Saııaf» búlikshiler tobynyń serkesi eken. Malaızııanyń terrorızmge qarsy kúres jónindegi vedomstvosynyń basshysy Aıýb Han Mýdın Pıtchaıdyń pikirinshe, bul jaıt óńir úshin úlken qater bolyp tabylady.
Tabıǵat aldynda adam qaýqarsyz
Qytaıdyń shyǵysyndaǵy Szıansý provınsııasynda oryn alǵan daýyl men tornado saldarynan qaza tapqandar sany 98 adamǵa jetti. Shamamen 800 adam túrli deńgeıde dene jaraqattaryn alǵan. Muny provınsııa gýbernatorynyń derekterine silteme jasaı otyryp, China News Service basylymy habarlady.
Azamattyq ákimshilik mınıstrligi, óz kezeginde, 200-deı jaralylardyń jaǵdaıy múshkil ekenin kóldeneń tartqan. QHR tóraǵasy Sı Szınpın men el premer-mınıstri Lı Kesıan óńir basshylyǵyna jaralylardy qutqaryp, tabıǵat apatynyń saldaryn barynsha azaıtý úshin qoldan kelgenniń bárin jasaýdy tapsyrdy. Áýelde 51 adamnyń opat bolǵany týraly habarlanǵan edi. Al tabıǵat apatynan barynsha zardap shekken eldi meken Iаnchen qalasy sanalyp otyr. Apat aımaǵynan 20 myńdaı adam kóshirilgen.
Internet materıaldary negizinde ázirlendi
